À prupositu d’un testu ineditu d’Hölderlin evuchendu à Paoli.
Pasquale Paoli, figura emblematica di a
resistanza corsa hà riprisentatu per l’
« intelligenzia » di l’Europa detta di i
lumi un mitu raghjente. « A Corsica era firmata
assai tempu u spechju nantu à u quale si giravanu
tutti l’ochji. » (Goethe « Puesia è Verità »).
Eroe di a libertà, legislatore dettu “nuvellu
Solon”, fundatore di un statu da u quale u populu
ghjè a surgente leghjittima di u putere, creatore di
una Università, u “generale umanista” hè statu
vistu sia da i filosofi sia da certi despoti “éclairés”
di u seculu di i lumi, cum’è un veru mitu. Un
mitu chì ghjera bellu spessu l’alibi i più cumplessi
di strategie pulitiche. (Catarina II, Federiccu II),
ma dinù d’interessi particulari (Voltaire, cliente di
u duca di Choiseul o Jean-Jacques Rousseau
« utopista custituziunale ») o puru Boswell « crunista
turisticu-puliticu d’alta magia », creatore di
miti.
Eppuru, si a storia ghjè una mitulugia, e so favule
si elabureghjanu dinù, rapportu à fàtti incuntestevuli.
L’onestà murale di u campione di a libertà corsa,
nisun’dubitu fàce. Ad alte cime hè a so cultura
d’umanista, bella assicurata, a so’ intelligenza è u
so’ pragmatismu raportu à la so’ guvernanza sò
ricunnisciuti.
Ci vole dinù à cunsiderà u rolu d’un mitu litterariu,
cum’è iniziatore di a storia, in esempiu sti
miti innu i quali certi scrittori, per dà una fiura
ideale à i so’ eroi, i cuncipiscenu è l’investiscenu
da i so’ propii fantasmi.
Hè particularmente interessante u casu di u grand’
pueta alemanu Hölderlin, u quale cumpunì in lu
1800 una nuvella puetica « Emilia à a vigilia di e
so’ nozze », splendidu puema in lu quale ellu
evucheghja l’imagine d’un Paoli « paternu eroe »
babbu di a patria chì accoglie tale u so’ figliolu un
giovanu vuluntariu alemanu, Edouard.
Hölderlin (orfanu di babbu), di Pasquale Paoli, ne
fàce non solamente un « patre spirituale » ma
per via di l’imaginariu, u patre spirituale di a rigenerazione
di a patria alemana. Edouard, u giovanu
suabe, porghje a so’ spada à Paoli perchè perdandu
u sensu di a libertà è di e so’ virtù germaniche,
l’alemani si sò imbastarditi.
Ellu truverà un’ eroica morte nantu a terra corsa
« inviulata » dendu cusì à i so’ cumpatriotti
l’esempiu di a strada à seguità. D’altronde, u
puema esalta a natura corsa è custituisce una spezia
di « discorsu fàttu à a nazione alemana »,
annunziatore di quelli di Fichte.
A Corsica « isula beata » diventa u locu sacru di
u sacrifiziu, a gesta di l’eroe, u caminu iniziaticu
pè a libertà.
Cusì, certi capi d’opera di a litteratura, pònu
arricà a so’ cuntribuzione à a storia.
U mitu litterariu, u quale, propiu in l’opera di
Hölderlin, ripone nantu à un fundamentu storicu
(Paoli eroe di a libertà) diventa, ellu dinù, u vettore
d’un mitu novu, quellu di u « paese patria »
(Heimat-Vaterland) magaru, s’ellu trova a so’
spressione pulitica innu a nazione, s’abulisce si a
patria perde u sensu di a libertà.
Marie-Jean VINCIGUERRA
Traduzzione Petru VACHET-NATALI
