Per Persiani, ci hè vulsutu u librone di
Montesquieu. Per Curtinesi soca sarà statu
scrittu tuttu, ma s’omu ci ruspa torna una
cria, ùn si stà tantu à palisà chì l’affare ùn và cù
i so pedi...
Pocu fà, ci hè stata un’occasione di ragiunà ne in
modu più furmale chè pè e soliti discorsi ... dopu
cena: hè l’emissione “Place publique” di RCFM.
Quistione sempiterne di sapè s’ellu ci hè à
bastanza studianti, qualessu saria l’effettivu ideale
è quellu minimu chì sottu sariamu à l’addisperu,
s’è i studianti stanu à bastanza in Corti o s’elli
si ne scappanu in casa soia tempu compii i
corsi è po s’elli lascianu à bastanza soldi à i
cumerci curtinesi...
Si hè sfrisgiatu dinù l’altre cose dilicatissime :
l’alloghji in cità di u CROUS chì ùn bastanu,
puru s’è a percentuale curtinese hè statisticamente
impurtante, è po u prezzu di e pigione particulare,
ammintatu à scapponi. È po l’accuglienza di
i studianti di fora: sò una cinquantina di naziunalità
nantu à u campus : Corti locu chjosu? Ma
fate la finita ! È dinù i divertimenti, e strutture,
sale è furnimenti spurtivi è culturali chì ci sò o
chì ùn ci sò. Quasi quasi à rombu di pensà solu à
guadagnu è prufittu, à a “clientella” studiantina,
si lacava da cantu un puntu di primura “perchè
chì oh ! disse unu “i studianti, s’elli
sò à l’università di prima hè per studià”.
Allora, porghje è buscà arnesi di
furmazione più ammaniti chè franchendu
u mare ? Ùn saria micca
nunda, puru s’ellu fussi l’unicu
scopu di pupulazione arricata da
l’impiantu di l’università.
Ma, i strazii pè turnà à apre, quelli
per mantene è l’altri per sviluppà u
stabilimentu insegnanu un’altra
missione, più larga, duv’elli ci si
ritrovanu i Corsi tutti quanti, eri è
oghje, Curtinesi è altri.
A situazione creata da l’arrivu di
millaie di persone chì scumbattenu à l’università
hà messu cambiamenti maiò in un lucale di tradizione
agrupasturale, ma ùn hà scatavultatu
nunda. Mutazione benefica, mi si pare, ancu s’è
qualcusella si sarà spustatu in i mendi di u paese.
Ma ùn hè sola ch’ella sia crisciuta a pupulazione.
Hè cambiata. È mutatu a versura generale di u
campà curtinese. Ùn si tratta più solu di una
manera di campà corsu arrughjunatu in u curtinese.
Ùn hè nè chì Curtinesi di ceppu devissinu
cambià, nè chì residenti insignanti è studianti si
devissinu municipalizà... Hè cuncernatu u guvernu,
di mente è di prugettu, di u campà persunale
è cullettivu o, cum’ellu si dice spessu, di esse
presente à u mondu.
Hè un affare altru. Altu. Hè di accunsente à
l’identità nova chì si hè porta à noi cun l’apertura
è u sviluppu di l’università. Un altru modu di
esse corsu è di campà ne a citadinanza. Esse di
quì, di una cultura arradicata cù a so lingua, a so
terra è u prugettu suciale ch’ella inghjenna à i
ghjorni di oghje. È po citadinanza ci hè l’altra,
quella di u mondu, propiu cum’ella a dice a
parolla università.
Soca ùn sarà cusì faciule di accuncià una soma
chì sempre pende da quì o da culà. Ma hè bella
sfida per u Curtinese, chè ?
Ghjacumu THIERS
