Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 3, Aprile di u 2007



Università Pasquale Paoli : u Riacquistu



Pè a prima volta, in l’annu 1964 d’ottobre in Parigi, fù decisa in un’addunita organizata da i studienti Corsi U.N.E.C. (Union Nationale des Etudiants Corses) è u F.R.C. (Fronte Regiunalistu Corsu).

Si passò in una stanza sott’à un caffè situatu di punta à a scola Politecnica, riclamava a riapertura di l’Università corsa di Corti, eramu una quindecina. Fù à l’occasione di u scontru di pallò Aiacciu-Laval à u Parc des Princes. U stadiu era ingiratu di bandere corse è di grandi scrittoghji neri nant’à lenzuloni bianchi è neri chì dumandavanu un’Università in Corti.

- Ti ricordi, dissi à a miò surella, quand’ella hè stata issa manifestazione ?

- Vulerai chè ùn mi ne ricordi ! Era sbarcata a sera nanzu in Parigi, u lindumane mi purtavete anc’à mè ! Appena ghjunte à a stazione di Mettrò Porte de Saint-Cloud vidimu davanti à noi l’amicu Felice cù u so pacchettu di stampini sott’à u bracciu è ci mettimu à corre versu ellu per aiutallu à distribuilli.

Ùn ci fù tempu à li tempi, una decina di pulizzeri li si sò lampati addossu è u s’anu purtatu in un “fourgon” di pulizza è ùn hà vistu u “macciu”.

U risultatu di u scontru ùn lu sò più, credu chì u GFCA avia guadantu, purtatu da noi altri. Ma eccu cum’ell’hà cuminciatu u riacquistu di l’Università Pasquale Paoli.

In u settanta, si fece l’Università d’estate : cù posta di una lastra chì amparava à a ghjente a riapertura di l’Università à u Palazzu Naziunale, cù cunferenze, discorsi, teatru : “A Rimigna” di Dumenicu Tognotti, cantavanu e miò puesie (scritte in Parigi), racolte da Danielle Maoudj è da Jackie Lucchini: “ I vostri nomi seranu sdrutti è per sempre ghjistimati”, ecc. Jackie m’hà dettu ch’ella si ricantava pè l’interru di Marcellu Lorenzoni in chjesa d’Aiacciu, cù dinù canti, scambii, è pruposte à buzeffu !

In u 1975, Aleria, è di nuvembre u decretu di creazione di l’Università di Corsica, scelta di Corti (a vi cunteraghju un’altra volta), apertura micca ! A lotta cuntinueghja dura !

Ci hè vulsutu à aspettà l’ottant’unu cù a vittoria di a Manca è di Mitterrand per ottene l’apertura. Dapoi ùn s’hè mai più arrestatu u riacquistu ! Tuttu ghjè in bullore ! Scrittori, pittori, sinemà, sinemassocii, travaglianu senza solli. I giovani regista piglianu i solli è si ne vanu in altrò, i furesteri piglianu i solli di a cullettività è giranu in altrò ! Pè i pittori, litessa cosa : i solli vanu à certi ! Attenti dinù à ùn creà academisimi ! “Cù l’ochju di a C.T.C.”!

Decuncentrazione di u statu ùn hè micca pè ricreà a situazione di “I Persi di Montesquieu”, issu colpu d’Aiacciu !

I solli devenu serve pè creà a ricchezza di issu populu, di tuttu issu populu : u spampanime di a so giuventù !

Ghjè què dinù a legge di finanze !

Maria Teresia POLI