L’hà palisata u raportu di
l’INSEE esciutu di ghjennaghju
scorsu chì i giovani corsi eranu
sempre più numerosi à parte.
Cumu hè ch’ella cuntinueghja
sta situazione ?
Hè bella sicura chì a partenza di a ghjuventù
hè un affare nurmale. Ùn si pò tene
à ognunu nè mancu impedì a ghjente
d’affaccà si. In ogni paese, ci sò giovani chì si ne
vanu in altrò per travaglià. Per esempiu, ci sarianu
300 000 francesi in Londra ! Questi quì, sò qualificati
assai è lascianu a Francia perchè
l’Inghilterra li permette una crescita suciale più
impurtante cun paghe più alte.
In Corsica, a sapimu, hè impurtantissimu l’esiliu.
Sarebbe culturale, endemicu. Ind’è u vintesimu
seculu, hè stata a sola isula di u Mediterraniu à
perde u pocu è tantu di ghjente chì ci campava.
Quale ùn hà un ziu, un cucinu, un babbone chì ùn
hà travagliatu è campatu pè isse France ? Quantu
voltanu solu l’estate ? Quantu sò à bramà u nostru
paese ?
Tempi fà, andavanu à occupà un impiegarellu in e
dugane, a pulizza o i PTT. Oghje ch’è oghje sò
cambiati l’affari. Sò studienti chì si ne vanu in
d’altre cundizione. L’apertura di l’Università hà
permessu a dimucratisazione di l’insignamentu
superiore in Corsica. Eppuru, a mubilità suciale
ferma debbule è l’esiliu sempre altu.
Dopu 25 anni, l’Università è l’altri urganisimi di
furmazione anu inghjennatu un capitale umanu
maiò chì ghjove pocu è micca à a crescita ecunomica
isulana. À l’usciu, hè u disertu pè i diplumati.
Poche imprese, dui cummerci è una manata
d’impieghi publichi ùn bastanu à dà pane à tuttu
ognunu. À chì hà u corpu à viulinu è face u sacrifiziu
di parte pè impiegà si à u so livellu, à chì si
sbroglia buschendu impiegarelli ma sacrificheghja
tandu a so carriera.
Hè bella è bona ch’ella pruduca giovani diplumati
ma ùn basta. À prò di i giovani è di tutti, bisognu
ci hè d’imprese chì impieghinu sti diplumati,
bisognu c’hè dinù chì a creazione d’imprese
venissi più faciule è menu risicatu. L’eletti clanisti
stanu zitti è muti. Ùn mutanu a so andatura.
Hè a miseria chì i mantene. Ùn hè à casu ch’ella
hè stata un scumpientu a prova di a tennopola
d’Erbaghjolu in Bastia…
L’imprese, ancu puru quelle furestere sò ghjuvative
pè i Corsi. Li permetteranu di stà tuttu puru
tenendu impieghi qualificati. In Irlanda, u livellu
suciale di a ghjente era u più chjucu d’Europa.
L’anu fatta elli à sviluppà a so isula. Hè vera chì
e stituzione ùn sò listesse… A fiscalità di stu
paese hà interessatu una mansa d’imprese. Frà
elle, c’hè Microsoft di Bill Gates. Sbarcheranu
ind’è noi ?
Ùn hè colpa à a viulenza s’è l’imprese furestere
impurtante ùn ci sò in Corsica. In u 1962 c’eranu
solu 160 000 persone in Corsica è micca travagliu
altru ch’è l’assestu di tamantu esiliu da i clanisti
! Ci vulia à passà sott’à e so forche. Dipoi, a
ghjente s’hè rivultata è sarebbe colpa soia s’elle
mancanu l’attività ecunomiche ? Hè bella sicura
chì ci sò riescite. Sò da salutà moltu più chì sò
poche ma ùn ci vole micca ch’elle piattinu a realità
dinù.
Pò scioglie stu prublema u statutu fiscale. Fù in
core à e rivendicazione anni passatoni. Oghje
ch’hè oghje, ùn si ne parla più ben’ chì u bisognu
fussi tamantu à l’esilii. Cum’ella a dice quella
canzona di a Filetta, simu di stu paese, tandu
demu ci i mezi per pudè ci campà !
Sébastien QUENOT
