Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 8, Ottobre di u 2007

A crunichetta di Petru VACHET-NATALI


Version française

A multiplicazione di i telefoni
(miraculu oghjincu)



Sti pochi tempi, leghjendu u settimanale « l’Anatra incatenata » (le Canard enchaîné), un articulellu titulatu : « Combien selon la police ? » mi interpellò (permettite quì l’espressione quasi di circustanza). Appinzendu l’ochji da leghje ciò ch’ellu si scrivia di seguita, scupriu ch’avà, finiti i conti apprussimativi da stimà quantu ghjente ellu ci hè innu e manifestazioni.

In California, certi scientifichi anu trovu cumu quantificà di manera esatta è sicura e folle per via di i signali ch’elli mandanu i telefonucci, postu chì questi quì, permettenu a lucalisazione di l’individui chì u si portanu appressu !

U giurnale Le Monde, u primu di lugliu, à stu prupositu dice ancu : « Nous leur avons appliqué des algorithmes d’intelligence artificielle.» Cucculu !! Ùn aghju mancu a voglia di traduce postu ch’omu ùn ci si capisce un cavulu ! sola a parulla intelligenza, quì, pò esse tenuta à mente… perchè ?… sentite què’ !…Riflettendu una cria, diceraghju à tutti i futuri manifestanti, à tutti quanti chì anu da fà valè e so’ rivindicazioni, à i sindicalisti, i cigitisti (C.G.T.), l’esticisti (S.T.C.), l’ecologisti, l’artisgiani, i cumercianti, i naziunali, i marinari, l’agricultori, i sunadori di riebula chì si lagnanu d’ùn truvà più strumenti, l’omosessuali(e) di a Gay Pride è ancu, di quandu in quandu, à i sindicati di pulizzeri… Per esse cuntati assai numerosi dicu, cun quessu u sistema di calculu è postu ch’elli parlanu d’intelligenza, li prupongu d’arricà cun elli tutti i telefonucci di a famiglia ! quellu di a moglia (o u maritu), di tutti i figlioli, di a mamma, di u babbu, di a zia, di u ziu, di a mammona, di u babbone, di tutti i cugini, di a socera, di u soceru, di a cummare, di u cumpare è di tutti l’amichi… metteli tutti in una prisacca è vai ! camina puru ! S’omu pò, si puteranu aghjunghje à a folla i nostri vechji cù i so’ « pace maker »1, cù i « sonotone »2 da sente megliu mughji, stridi, canti è furgani. In più di quessa, ghjè capita, cuntabilizerànu , tutti i signali mandati da sta grande quantità di balise poste sottu à e vitture di i militanti naziunali chì staziuneghjanu da una parte è da l’altra di u traghjettu !

In Corsica, quandu i manifestanti falerànu u corsu Paoli in Bastia o cullerànu u corsu Napuliò in Aiacciu ci vulerà ad aghjustà tutti quelli, chì ùn piglianu partitu, posti nantu à i dui lati di i tighjati, chì guerderanu passà a manifestazione, è dinù, s’ella capta ! dentru, tutti quelli chì sò in li magazini è chì sgagianu l’onde anch’elli da i so’ telefoni !

L’amministrazione pulizzera di i Rinsignamenti Generali averà asgiu da divisà a sciffra di i signali telefonichi per trè o per quattru, - cum’ella a face sempre - è minurà u contu di i manifestanti, sta volta, dicerà quantunque : troppu ! ci n’hè troppu !

Ùn valerà à turzunà ; tandu, cum’è i preti, i pulizzeri di i R.G. ne perderànu u so’ latinu.

Cusì, s’elli sò astuti, si lascierànu stu modu di calculu inventatu da l’intelligenza di i scientifichi califurniani chì ùn avianu previstu, elli, l’intelligenza di i nostri cumpatriotti chì… di un telefonucciu… n’anu fattu dece !!

Stu 23 di settembre 2007 primu ghjornu di vaghjime

1. Pace maker : picculu apparechju ficcatu in pettu da stimulà u core ; parulla inglese chì, – pare fàtta apposta – vole dì : quellu chì reguleghja a marchja, u passu. Dunque, quelli chì ne portanu, serànu posti d’avanti !

2. Sonotone : nome di a marca d’un picculu apparechju auditivu ch’omu mette in l’arechja per sente megliu. Emette forse l’onde anch’ellu !