Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 13, Aprile di u 2008


Corsica spressioni, Corsica nazioni ?





Ponasi a quistioni di l’evuluzioni di a sprissioni artistica in Corsica volta à ponasi a quistioni di l’aghja pertinenti di a creazioni.

Dittu in altri tarmini, mi pari chì hè propiu difficiuli d’attribuì un opara à a Corsica sì u spaziu culturali di l’isula ùn hè postu di modu chjaru in u quadru di un prugettu socioculturali, via puliticu.

Chì l’isula cù a so frastagliera tarra è mari ùn basta à fà spaziu. Hè certa chì i so cuntorni l’avemu ammaniti è belli pratichi par l’indentificazioni di un tarritoriu fisicu. Ma par ciò chì tocca à a sprissioni artistica a prublematica di limiti, fruntieri è ciò ch’e possu chjamà aghja di sprissioni si poni quant’è in altrò cù listessu fini cà in altrò : da duva partu, da chì pezzu di a diversità escu par virsà a me creazioni inde l’univirsali ? Chì sò i limiti di a lingua in sprissioni literaria ? Chì s’hè passatu in a storia ? Di chì parlu ? Da induva ? Chì musica ? Chì sprissioni estetica ?

À tempu sapemu quantu conta u censu di l’arti da fà i nazioni. Sapemu dinò quantu sò i sviati o i sbagli trimendi di i stati-nazioni culuniali inde l’apprupriazioni di l’arti di untali indivuduu o untali gruppu umanu. A cultura corsa, a sprissioni corsa avarà listessu caminu ideologicu cà i stati-nazioni classichi par difiniscia una sprissioni sputica ?

Quistioni propiu prublematica ancu par a Francia d’oghji par asempiu di pettu à una neo francufunia chì ùn voli più ghjucà u ghjocu di un egemunia culturali par firmà in un aghja à tempu meddu idintificata è plurali : Maghreb, Chebeccu, monda spazii africani. Dici u lessicografu Alain Rey1 « On en est arrivé à une acceptation des francophonies (au pluriel) internationales qui seules pourront avoir un poids mondial, interdit à toute limitation dans le « national » – pour beaucoup, aujourd’hui encore, hélas, le nom des langues renvoie strictement à l’espace validé par un passeport. » Hè cusì chì oghji l’avvena di i francufunii dipendi « da a so natura plurali è pluricentrica ».

Pensu cusì chì sì sprissioni corsa ci hè, ùn pò cà viaghjà da u so locu mondu à u mondu sanu in un pass’è veni appena frollu. U mondu sanu hè chjappu quì à u sensu di u creulista E. Glissant2 quand’iddu parla di « Tout monde ». Veni à dì chì par difiniscia l’aghja di sprissioni corsa, forsa ci voli à pinsà à un puntu d’arradichera (u so locu mondu) chì faci u censu di u so patrimoniu denduli nomu è chì à tempu si scrivi inde l’aghja larga di u « tout monde » duva a sprissioni hè franca « de toutes les horreurs identitaires et de tous les fauxsemblants de l’ethnie et de la race ». Eccu appena par un accostu di principiu chì mi pari fundamintali.

À sti cundizioni, si pò accittà chì u fattu di dà nomu è d’attribuissi un insemi d’opari esciuti da un locu mondu hè a più bella manera di fà nazioni. Chì osinnò à chì vali di parlà di cultura corsa ? Hè cusì chì à contu meu l’articulazioni di u Sittanta ferma u mumentu storicu più impurtanti inde l’evuluzioni di a sprissioni artistica corsa. Ghjust’à puntu parchì u sittanta s’acconcia cù a fini di l’imperu culuniali francesu è chì a cultura corsa si metti propiu « in idea » (l’indiatura) punendu u principiu di una patrimunializazioni è di una creazioni, veni à dì u principiu di una missa in sintesi, una missa in corpus di tutta a pruduzzioni storica è una vuluntà di porghja opari.

À tempu, u Sittanta ùn avarà presu u risicu di a sterelizazioni sviendusi in una caricatura d’iddu stessu ? Si pensa quì à sta tematica di l’esaltazioni d’una Corsica libera, cù un corpus semioticu chì si chjudia di più in più nantu à l’ostentazioni simbolica : testa mora, parulaghju ingagiatu (canzoni o puesia cù « libertà » ripitutu deci volti), figuri storichi senza spessori…Iè è nò. S’iddu si pidda l’avviata teatrina di Tognotti, u prughjettu literariu di Rigiru, l’andatura sinematografica (ancu cun pochi mezi) di Degli Esposti o Dumenica Tiberi o a pustura di riacquistu di Canta u Populu Corsu, si pò dì chì a sprissioni artistica corsa tira u prò di « l’idea » chì faci nazioni. Arreca una vera rivuluzioni di u dì chì poni i baroni di l’aghja culturali corsa fenduni un locu di sintesi storica, duva a rivolta nutrisci a mudernità.

Hè certa chì ogni nazioni in anda hà bisognu di « una fola d’identità » (diciaria Ghj. Thiers), ma risicu ci era di cascà in un appuvariscimentu di u versu sittantescu cunfinendulu à a spera naziunali è à a rivolta ludata sempri. Curciu à chì hà scrittu o pruduttu arti cà in issa indiatura quì. Ci sò stati è l’anni novanta l’acciaccarà moltu più chì l’idea di nazioni, pur d’ùn avè sviluppatu di più u so cuntinutu, rimandarà a maghjina di a sbrisgiulera assassinia trà naziunalisti.

À tempu, tutta a creatività corsa ùn si pò metta à contu di l’indiatura. Ma dopu à u Sittanta, più nudda sarà com’è nanzi in tarmini di spaziu di creazioni. È puri in i cundizioni pessimi di l’anni 90, l’abbriu di u Riacquistu sona com’è una ricunniscenza. U nomu hà fattu a cosa è l’essenziali hè quì.

Tandu, una volta postu chì l’articulazioni di u Sittanta ferma puntu di riferimentu ci voli à guardà comu si facini l’evuluzioni novi. L’oparata di a patrimunializazioni hè in via grazia à attrazzi culturali strutturanti di più in più parfurmenti (università, sinemateca, musei, teatri, bibiutechi, lochi di mostra, pulitichi tarrituriali in crescita qualitativa è quantitativa,…). Pari chì ci simu parsuasi chì hè dinò l’attrazzu chì arreca a pruduzzioni è micca solu u cuntrariu. À tempu, l’anni di a dillusera, senza tumbà a via identitaria ma senza l’esaltazioni di u Sittanta, hà avviatu un arti più realista, autocritica (par i scrivani : Ferrari, Biancarelli, Desanti, Thiers,…), più lena (rilatività di a lingua, cuntatti è mischji), più aparta assai : temi varii, impustatura miditarrania (si pensa à u centru di fotografia di Marcel Fortini o à l’oparata di Maddalena Rodriguez-Antoniotti), raportu à l’altru più riccu è infini un arti più varia : creazioni in cantu sacru, ballu, pittura, sapè fà,...

A cunniscenza patrimuniali mossa trenta anni fà arreca dinò cuntinuti di finzioni di più in più ricchi : rumanzi com’è L’acelli di u Sarriseu di Casta, Mazzeri.com di GL Moracchini pè a lingua corsa è tutti i finzioni storichi di issi pochi anni. Finominu novu, issu fondu sempri più diviziosu parmetti scenarii di polar in corsu o in francesu (Comiti, MH Ferrari, E. Milleliri o JP Santini) à tempu à una pruduzzioni tiatrali ricca (ammintemu tutta a pruduzzioni di U Teatrinu è a leia cù l’IITM, istitutu internaziunali teatru mediterraniu frà altri). Si ni risenti dinò tutta a pruduzzioni audiovisiva chì si svarsa oramai nantu à Via Stella.

Via, u censu saria troppu longu è l’analisi esaustiva dumandaria un libronu. Ma u fattu stà chì issa accolta ammaistrata, chjamata da a ricerca universitaria « uparata di patrimunializazioni » crea à contu meu u solu arrembu naziunali pussibuli è u buddori attuali ni moscia tutta a vitalità. Aghja lena, spaziu liquidu o frollu, ma rifarenti in elaburazioni chì dopu à l’affaccata di un’ essezza puri sempri in neguziati, lascia sbuccià è sbucinà un fà nustrali in brama d’universali.

Alanu Di MEGLIO

1. Le Monde (des livres), 17 mars 2006
2. Edouard Glissant (1995) Tout monde, Folio