Tennis :

Marion Bartoli : " sò corsa punt'è basta ! "

Ben ch'ell'avessi principiatu hà ghjucà à Tennis à l'età di 16 anni, Marion Bartoli vene à 23 anni di scrive u so nome, u 9 di lugliu, in Wimbledon.

Certu hà persu in finale di fronte à un monstru di u Tennis, Venus William, chì ghjè stata très volte prima à a classifica mundiale di l'ATP, ma in meza finale s'hè permessa di sorte à Justine Henin, attuale numeru una mundiale.

Ma a stampa francese hà passatu quasi sottu à silenziu i risultati di a Corsa, chì second'elli sò stati picculi.

Allora, a nostra amica si nè pigliò à issa stampa dicendu chjaramente : " sò corsa, avete capitu, u rivendicheghju è dicu ciò chì pensu incù raggiò ". Medicu di furmazione, u so babbu hè diventatu u so intrenadore è d'apressu i nostri rissignamenti, u babbone di Marion sarebbe originariu di Corti. Si pò capì dunque a zerga di a nostra cumpatriotta in facia à i dettu di una certa stampa parigina. Si spera d'avè d'altre infurmazione nant'à l'avvene di Marion, una spurtiva d'un altu livellu chè no salutemu !.


Corsa di vitture :

Rallye di Biguglia !

Ghjuvan Marcu Manzagol, in associu incù Elodie Damiani, hà vintu pè a terza volta stu rallye.

Petru Benazzi hà finitu secondu è Cristofanu Casalta terzu. Hanu fattu l'umpussibile pè circà u podium, ma " Manza " era u più forte.


Scooter di mare :

Tony Manenti, solu amatore di sta corsa in Oleron, hà finitu nant'à u secondu scalinu di u podium.


Ball Trap :

In Alba Serena, Jerôme Cecchi hà vintu u campiunatu di Corsica a fossa ulimpica. Saez è Nuvoli hanu finitu darretu.


Judo club di Lucciana :

Eugène Nemesi, u prufessore, è Dumè Zattara, u presidente, ponu esse fieri si i so 200 elevi. Eccu un club chì va di l'vanti annu pè annu.


Corsa à pedi :

- L'ospetale

Pè u secondu annu, Thierry Eliot (H.A.C) s'hè impostu di fronte à Fred Giacomoni

- Corsa in muntagna

Franck Biaggi hà fattu soia " A Capicursina ". Una terza vittoria in faccia à Franck Albertini è Emile Hanciar.

D'altronde, Franck Biaggi, torna à ellu, hà vintu a corsa di " A Furmicula " chì si face ind'è l'altu Fium'Orbu.

Una volta di più, Hanciar, Bosch è Albertini si sò distinti ma senza fà trimà à stu furtissimu spurtivu chì hè Franck Biaggi.


Ciclisimu :

José Bartoli, campione di Corsica dopu avè battutu à Cyril Vincenti, disgraziamente vittima d'una cascatoghja à vinti mesi di l'arrivata.


Ghjocu à ballò :

- Battì Gentili vene di firmà un cuntrattu d'un'annu in Nantes, cum'è secondu intrenadore.

- Franck Massoni (Nebbiu) è Yohan Codaccioni (Bucugnà) sò stati sacrati migliori purtieri di a Divisione d'Onore.

- U centru di furmazione di u Sporting purtatu in categuria 2A pè a cumissione paritaria di a LFP. Vene à dì chì Bastia precede squadre cum'è Marseglia, Nizza, Sedan, Lorient…

- Hervé Sekli, fratellu di u nostru amicu Dédé, tenerà quist'annu e rete di u FAIRM Isula- Munticellu. Dopu esse passatu pè U Viscuvatu, u Sporting, Troyes, Aiacciu è " L'Etoile ", Hervé cuntinueghja a so carriera in Balagna. À seguità !

- U Club di i supporter parigini di u Sporting hà tenutu a so assemblea generale in u caffè Leatitia (15e). Petru Vinciguerra è a so squadra so torna pronti à aiutà Bastia issa stagione.

Dany Valdrighi