Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 2, marzu di u 2007

A Rubrica spurtiva di Dany VALDRIGHI



Detti, putachji è… verità



BOZZA

Mourad Azzemhand, campione di « Provence Juniors » dopu à a so vittoria in Marseglia incù l’arrestu di l’arbitru à a seconda ripresa. Hà solu dicessett’anni è un bellu avvene !

U 31 di marzu, u campiunatu di mondu di Kick Boxing si hà da tene nentr’à a sala Pasquale Rossini in Aiacciu. Samir Mohamed, principe di i ring serà à l’affissu d’issa reunione.


RUGBY

Originariu di u paese di U Viscuvatu, Pierre Mignoni, titularu di a squadra di Clermont Auvergne, hè statu ritenutu da Bernard Laporte, selezziunadore naziunale, pè ghjucà u Turneu di e sei Nazioni cù a Francia, chì hà vintu st’edizione 2007. Forse, serà dinò selezziunatu pè a Cuppa di u Mondu chì si tenerà d’auturnu.

Altru Corsu, à fà parte di i quaranta preselezziunati, Laurent Emmanuelli « un zitellu pienu di qualità » secondu Laporte.


KARATE

U Shito Karate Do Biguglia si porta bè. Più di centu elevi sott’à a rispunsabilità di Sébastien Levan è Henri Mariani, un presidente cinta negra.


BICICLETTA

U « Corsica Giru », messu in ballu da Dumè Bozzi, hà da parte da Bastia u 17 di maghju pè compiesi trè ghjorni dopu in Aiacciu. Dopu à trè anni d’arrestu, era ora di vede nant’à e strade di Corsica una cusì bella manifestazione spurtiva.


JET SKI

A prima tappa di u campiunatu di Francia di « scooter di mare » hè prevista in A Sulinzara da u 27 d’aprile à u 2 di maghju. Un spettaculu à vede, s’è u tempu hè di a partita.


KARTING

E 24 ore di A Gravona s’anu da tene i 19 è 20 di maghju, è ci seranu da quattru à dece piloti. Torna una reunione à scopre. Venite Numerosi !


CROSS CUNTRY

E meze finale di u campiunatu di Francia, urganizate da u GFCO Aiacciu, anu riunitu più di 2000 spurtivi, l’ondeci di ferraghju in Carbuccia. Una riescita pè u cumitatu d’urganisazione chì hà messu i grossi mezi, nantu à u situ d’Aiacciu.


TRUFFEI 2006 CORSE MATIN / RCFM

Hè statu rimessu à Jean-François Exiga « u super truffeu 2006 ». Titularu di a squadra di Volley Ball di Cannes è « liberò » di a squadra di Francia, l’aiaccinu vene di succede à u buzzore Bernard Inom. Tantu meritu pè ‘ssu spurtivu d’altu nivellu chì hà fattu i so primi passi à U Gazelec d’Aiacciu.


UMAGIU À JEAN PIERRE ETCHEVERRY

Bascu di nascita ma Corsu di core, dipoi u 1971, Jean-Pierre era un omu tantu appreziatu da tutti. U gimnasiu d’Aiacciu porta oramai u so nome.

Novanta volte internaziunale di Hand Ball, era un esempiu pè a giuventù di u nostru paese.


RALLYE

Pietri à l’onore ! L’ottesimu rallye Sartè Valincu hà vistu a vittoria di a squadra Pietri-Courreges (306 RC) davanti à Casalta (2u) è Leandri (3u).


SECONDU RALLYE STORICU

Più di centu squadre anu da participà à u secondu « Rallye Storicu Corsica » di ghjugnu nant’à e strade di i Dui Sorru è dui Sevi.


GHJOCU À BALLÒ

Arbitru di ballò durante quarant’anni, Paul Curck hà ricevutu un truffeu umaggiu da Petru Cangioni è a redazzione di Corse Matin/RCFM. Un truffeu più chè meritatu pè l’amicu Paulu, scontru, o quante volte, a dumenica sopr’à i terreni di ballò.

Nicolas Penneteau torna in vista. L’anzianu purtiere di Bastia, titularu in Valenciennes, puderebbe ritruvà l’annu prussimu à Jean-Luc Ettori è Dédé Biancarelli in Monacu. E ciò chì si dice ind’è i mezi spurtivi specializati.

San Nuculà in Bastia, s’ellu nè vera… perchè nò ! Dopu à qualchì tempu à u CAB, Florian Lucchini (ex AC Aiacciu) vene di firmà un cuntrattu in favore di u Paphos Football Club di l’isula di Chypre. Tant’auguri di riescita da a nostra parte.

In Bastia era « o Pè ! ». Petru Aussu, a piccula « ala » caleduniana di u Sporting 1978. Hà ritrovu, incù tant’emuzione u stadiu di Furiani… 25 anni dopu. O quanti ricordi s’è ramintatu, guardendu i ritratti incù Rep, Papi, Marchioni, Orlanducci è tant’altri cum’è Pierre Cahuzac è Ghjuliu Filippi. Un’ altra epica, un’ altru tempu… ma chì squadra !