GHJOCU À BALLÒ

Federiccu Antonetti, l’intrenadore di Nizza, un tempu minacciatu dopu gattivi risultati è una classifica pocu in rapportu cun l’ambizioni di ‘ssa squadra, hè statu cunfortu à u so postu di tecnicu da u “tandem” Cohen- Giudicelli, i presidenti nizzardi. È ghjustizia quandu s’è vistu Nizza tene capu à Liò in Gerland.

Forza Fred, semu cun tè ! Cappellu bassu à Pasquale Berenguer ! u curtinese hà messu una reta di trenta metri in cuppa UEFA in Bâle, in svizzera, cun a so squadra di Nancy.

Corsu di mamma, nata Versini di Cristinacce, Gérard Gili, l’anzianu tecnicu di Bastia, hè diventatu u rispunsevule di a squadra olimpica di A Costa d’Avoriu, in cerca di qualificazione pè i prussimi ghjochi olimpichi di u 2008 in China.

U zitellu di Guagnu, Mathieu Flamini, titularisatu da Arsène Wenger, intrenadore di Arsenal, hè statu l’artisgianu di a vittoria di i “gunners” faccia à Liverpool. Una bella reta è tanti cumplimenti di a parte di a stampa spurtiva inglese… è di a Nazione ! Un altru corsu à mette in valore ! l’aiaccinu Patrice Luzi-Bernardi cun a so squadra belgica di u SC Charleroi. Un purtiere d’avvene, second’à a stampa specializata !

U statu hà datu 1,6 milione d’Euri pè u futuru è nuvellu centru di furmazione di u Sporting, in U Borgu. Tuttu serà prontu da quì à u 2010. Robert Nouzaret, intrenadore di u SCB in finale di a cuppa di Francia di u 2002, hè à u capu di a squadra naziunale di a Guinea.

Prince Daye, l’anziana « ala » manca di u SCB è in cerca di un club in Auropa. À 28 anni pò torna fà i belli ghjorni di parechje squadre…è perchè micca in Bastia !

In Sainte Tulle, a selezzione corsa di i menu 14 anni hà finitu pè due scunfitte, di fronte à a selezzione di U Mediterraniu.

Valerio Chiari, anzianu pensiunariu di u centru di furmazione di l’AS Roma, è ghjucadore di u CAB s’è vistu prupone una prova à u SCB. Pè via di i prublemi incù a DNCG, u SCB deve aspettà a fine di a stagione pè pudè pretende rinfurzà a so squadra. U GFCO Aiacciu hà vintu nant’à u stadiu di u Bastiò, in Furiani, in faccia di u CAB, davanti un publicu numarosu. Un derby passiunente è passiunatu !

Pasquale Camadini dopu esse rivenutu in Bastia l’annu scorsu, hà firmatu un nuvellu cuntrattu (18 mesi) in favore di Strasbourg, a so anziana squadra.


MOTO

Michel Marchini hà compiu u Dakar di u 2007 à u 7u postu di a classifica generale, è primu amatore. Eranu 132 à l’arrivata. L’aiaccinu hà fattu forte !


AUTO

Pascal Trojani hà vintu incù Verduri (307 WRC) u rallye naziunale di a Balagna. Dopu u 2001 è u 2002, ghjè a terza vittoria pè stu ‘ssu pilotu in forma ottima.


VOLLEY BALL

A sala Rossini, in Aiacciu, in festa dopu u 1/8u di finale di a cuppa di Francia trà u GFCOA è l’AS Cannes. Troppu forti, i ghjucadori cannesi, è un certu Jeff Exiga, coleader di a “Pro A” hanu sfattu a squadra aiaccina chì hà fattu l’impusibile pè tene capu.


TENNIS DI TAVULA

I giovani di Bastelicaccia hanu vintu u dirittu di ghjucà in campiunatu di Naziunale 2, certu difficiule ma à chì sà.


BOZZA

L’elevu di Petru Paoli, Bernard Inom, hà vintu di fronte à u Bulgaru Borou, u sabbatu 13 di ghjennaghju in Aiacciu. Un cumbattu di preparazione in vista di u prussimu campiunatu d’Auropa à u mese di ferraghju in Aiacciu. U campione si chjama Andrea Sarritzu.


JUDO

Delphine Delsalle hà persu a finale di u campiunatu in Dijon di fronte à Audrey La Rizza.


RUGBY

Grazia à Dédé Giamarchi è à Tony Gandolfi, u scontru trà a Francia è l’Italia (-21 anni) puderebbe esse messu in ballu di marzu di u 2008. U 9 di marzu di u 2007, un scontru amichevule trà u Stade Français et Clermont Auvergne si ghjucherà in Bastia, à u stadiu di Furiani


Dany VALDRIGHI