GHJOCU À PALLÒ

U C.A.B : una gattiva surpresa !

Nantu à u stadiu d’Erbajolu, i ghjucadori di u presidente Antone Emmanuelli anu persu di pettu à a squatra di Cayenne l’occasione di cuntinuà a so strada in cuppa di Francia. Nimu ùn s’aspettava à issu risultatu tantu a differenza trà e duie squatre paria tamanta ! Stefanu Rossi, l’intrenadore di u CAB, vistu i poveri risultati dapoi u principiu di a stagione hà passatu a manu. Stefanu Franceschini hè divintatu u nuvellu tecnicu di i « Nigrachjoli ». À ellu di fà megliu !


G.F.C.A. : BRAVU !

Dopu essu statu qualificatu in cuppa di Francia, u Gazelec hè in traccia di fà parlà d’ellu in CFA. Ghjacumu Cristofari è i so amichi sò primi d’issu campiunatu, è pronti à fà parte di u prussimu « Naziunale ». Sempre vivu u « Gasu » !

U Curtinese Pasquale Berenguer è a so squatra di Nancy ùn mancanu d’ambizione vistu a piazza (seconda) daretu à Liò. L’annu prussimu, Pasquale puderebbe fà i so primi passi in cuppa d’Auropa ! Un altru Corsu, u Bastiacciu Lurenzu Moracchini face parte di u « staff » d’issa squatra chì vene di surprende a più parte di i media francesi è altri !

Francescu Bracci dirige à u Maroccu a squatra di Kouribga, campione in titulu. Gherardu Gili, originariu di Cristinacce (da a parte di a so mamma) hà in contu a squadra (- di 23 anni) di a Côte d’Ivoire. In « naziunale », dopu esse statu furmatu à u SCB, Gilles Cioni hè titularu à u Paris F.C. intrenatu da l’anzianu di Lens Jean-Guy Wallemme.


GOLF

Da Josè Heinrich à Badr Satori !

Dopu avè tenutu tanti anni a gabbia di u Viscuvatu, Josè s’hè messu à u golf. U Viscuvaccese vene di vince u primu titulu naziunale.

Anzianu ghjucadore di pallò, ecculu cusì bonu à u golf !

Dopu avè ghjucatu (o quantu bè !), à pallò à u Gallia di Lucciana, Badr hè divintatu rispunsevule di a scola di golf di Lucciana Borgu. Sempre ghjucadore ma dinù prufessore, Badr Satori, un altru anzianu ghjucadore di pallò chì vene di cambià di registru incù passione è talentu !


JUDO

23 ghjovani Corsi anu da participà à u campiunatu di Francia UNSS. I 26 è 27 di ghjennaghju prussimu in Parigi (Institutu Naziunale di u Judo).


CORSA À PEDI

Cross di l’ASPVA : Aurelie Didier è Franck Albertini, sottu à l’acqua, anu vintu issa corsa incù assai curagiu !

Mourad Amdouni (AJB) : un zitellu in oru !
Petru Bartoli, Presidente di l’AJB, pò esse fieru di u so elevu ! 6700 metri in 20’08’’, u capu di fila di l’AJB hè diventatu campione d’Auropa « Junior » à 19 anni. Ùn avvene sicuru, si pò sperà, fattu di vittorie è di gloria pè quellu chì i media chjamanu u picculu principe di Bastia. Cappellu bassu, caru Mourad, è à prestu in Biguglia !