GHJOCU À BALLÒ

Aiaccinu di nascita ma titularu incù a squadra di i 18 anni du u Sporting, Filippu Gigon tene a doppia naziunalità francese è svizzera, pè via di u so babbone paternu. Di stu fattu, vene di esse ritenutu da a federazione svizzera à una reunione di i menu di 19 anni. L’aiaccinu di u SCB hà d’apressu à Filippu Anziani, u so intrenadore, assai mezi pè sperà fà una carriera in ghjocu à ballò. E cusì sia !.

Pieve di Lota in finale di a cuppa di Corsica ! Dopu avè vintu in meza finale contr’à l’EFB, a squadra di Ghjuvan Petru Acquaviva si trova in finale di a cuppa chì si ghjucherà in Furiani. L’altru finalistu à cum’è nome u Sporting. Ci vulia à falla, è i capi cursini l’anu fatta ! Bravi !.

Al’arrestu dipoi dui mesi, Greg Lorenzi hà ritruvatu a so piazza in centru di a difesa di Bastia. Appena o assai grazia à ellu, u Sporting hà ritruvatu una stabilità difesiva, perchè ghjè statu sette scontri senza perde.

Yohan Cavalli, titularu in Watford, squadra di prima leca inglese, hà da participà u 15 d’aprile à a meza finale di a « cup », di fronte à un certu Manchester United. Un scontru chì serà particularmente seguitatu in Aiacciu, cità di Yohan è figliolu di l’anzianu ghjucadore di u GFCA, Ghjuvan Michele Cavalli.


TENNIS-BALLÒ

Jecker vice campione. Eric Jecker, campione di Francia in 2000 è 2003, hà torna fattu parlà d’ellu. A più di trenta quattr’anni, u venachese hà persu in finale in Sète, ma chì esempiu pè a ghjuventù !


FUTSAL

Bastia campione di Corsica. A squadra di Petr’Antone Paoli hè diventata a prima campione di Corsica d’issa disciplina.


JUDO

250 in Aiacciu. U primu turneu di a cità d’Aiacciu, messu in ballu da l’ASPTTA à u Rossini, hà riunitu più di 250 persone.

Priscilla Gneto, di u dojo di Porti Vechju hà persu in finale di u campiunatu di Francia in Pariggi. Forse a prussima volta pè u campiunatu d’Auropa !


AUTO

Au 37e giru di A Giraglia, Pasquale Trojani hà vintu tutte e speciale di st’edizione 2007. Ghjuvan Ghjacumu Padovani hà finitu secondu è u terzu ghjè u « Babbu » Ghjuvan Petru Monzagol. Sti dui piloti anu fattu l’impussibule pè circà di finì u più vicinu di Pasquale.


RUGBY

Dui corsi incù u XV di Francia ! Laurent Emmanuelli è Pierre Mignoni sò stati ritenuti da Bernard Laporte, u selezziunadore di u XV di Francia.


CICLISIMU

Patrick Poli hà vintu a corsa di Bilia. 70 participenti anu fattu sti 15 chilometri. U secondu hè statu Cyril Vincenti.

Pè a seconda annata, Patrick Vega hà finitu primu di a corsa di « gentlemen di Porti Vechju ».


CROSS CUNTRY

Mourad amdouni hà finitu 38e di i campiunati di u mondu « juniors » à u Kenya ! primu europeanu, u zitellu di l’AJB è di Petru Bartoli u so presidente, hà mustratu in Mombasa ch’ellu avia una statura internaziunale !