Chì saria u Sporting Club di Bastia
senza i so sustenitori ? Sì u publicu hà
sempre ghjucatu un rollu impurtante
puntendu a squatra bastiaccia versu à a
vittoria, dapoi qualchì annu pare chì i
Corsi appianu persu a strada di
Furiani…
Semu di ghjugnu 1972. Sò millaie di Corsi à francà
u mare per raghjunghje à Parigi. U so scopu : sustene
a so squatra ghjunta in finale di a cuppa di
Francia contr’à l’OM. Studienti, corsi di a diasporà,
vechji è giovani si ritrovanu innù a capitale francese
bandere corse in manu. L’affare ùn s’era mai
vistu ! È si u SECB perde a so finale, i numerosi
sustenitori à avè fattu u spiazzamentu sò felici
d’avè fattu tale dimustrazione di forza… Innù e tribune
di u Parcu di i Principi si canta u Culombu è
s’alzanu e Teste di Moru.
Tandu si pò dì chì nasce una leia forte trà i Corsi è
u Sporting, chì di squatra di a cità di Corsica
suprana diventa squatra di tutti i Corsi, ch’elli sianu
di l’isula o spalluzzati innù u mondu sanu. Hè avà
luntanu u tempu di l’amaturisimu, quandu i
Bastiacci si tazzavanu trà partigiani di l’Etoile, di u
CAB è di u Sporting. U sabbatu sò centinaie di paisani
à ghjunghje in Furiani, ch’elli sianu di u
Fiumorbu, di a Balagna, di u Taravu, di u Valincu o
di u Capicorsu. Ci sò forse ancu di più fresteri ch’è
Bastiacci innù e vechje tribune d’Armand Cesari.
L’Epupea di u 78 accresce stu sentimu furtissimu
trà u Sporting è u populu corsu. Innù i so viaghji à
traversu l’Auropa, da Lisbona à Iena si ritrovanu
tanti Corsi à sustene i turchini. Si conta ancu chì
parechji s’arruvinanu per pudè seguità a squatra di
Papi è di Rep è cuntinuà à fà sti cari viaghji per
vedeli ghjucà... U ricordu u più forte essendu
ben’intesu u scontru in Torinu, induve 15 o 20.000
Corsi si ritrovanu à u Stadio Comunale di a cità piemuntese
per vede i picculi Bastiacci ridiculizà a
grande squatra taliana cù tutti i so internaziunali.
Nova dimustrazione di forza in u 1981 per un’antra
finale di cuppa di Francia, vinta sta volta. Innù e tribune
i partigiani turchini facenu tantu rimore
ch’ellu ùn si sente a Marseillaise. Di ritornu in
l’isula, a cuppa di Francia cumencia un giru di i
paesi chì ferma sempre innù e mente.
U sporting cummencia tandu à piglià a falata. A
gestione ùn hè sempre micca chjara, i soldi mancanu,
ùn ci hè micca prugettu à longu andà. In u
1986 u Sporting, diventatu SCB, si ritrova in
segonda divisione cun pochi mezi. In Furiani ùn ci
vanu più ch’è l’accaniti, ma sempre da tutti i paesi
di Corsica. U Sporting interessa menu, sin’à u so
parcorsu in u 1992 in cuppa di Francia. Ci vole à
custruisce tribune pruvisorie pè pudè accettà tutte e
dumande di biglietti per a meza finale contr’à u
grande Marseglia. È tandu a Corsica cunnosce
l’episodiu u più neru di st’ultimi cinquant’anni. 18
morti è più di 2.000 feriti, mentre chì 10% di a so
pupulazione si truvava in Furiani quella sera. Si
passa da a gioia è a festa à a strage è u dulore in
qualchì minutu. Dopu à a catastrofa era ancu vergugnosa
di parlà di ballò, ùn s’avia u core à quessa. U
SCB si ritrova senza soldi è senza stadiu, cun pochi
ghjucadori è dirigenti. Si pensa d’altronde chì sta
tragèdia serà fatale à u club.
Tandu seranu unepochi di sustenitori à circà di
salvà u Sporting. Sempre cù u rispettu di e vittime,
l’Associu per a salvezza di u Sporting è po l’associu
Testa Mora 92 vede u ghjornu, cù u scopu di
cuntinuvà à aiutà u SCB innù una Corsica culpita.
Per guasi una stagione sana ùn si pò ghjucà nant’à
u terrenu di Furiani è ci vole à francà à Vizzavona
pè ùn riceve « à domiciliu ». Mezavia. Tutti quelli
chì anu campatu stu periudu si ricordanu di un
mumentu difficiule, cun spiazzamenti fastidiosi, ma
d’intensa emuzione è di cummunione cù i ghjucadori
bastiacci. A strage di u 5 di maghju averia pussutu
fà sparisce u Sporting. À u cuntrariu, hà fattu
accresce a sulidarità trà u club è i so sustenitori.
Hè cusì chì l’annu dopu u miraculu si pruduce. Cù
una piccula squatra è cun pochi mezi, u Sporting
crea a surpresa è face u so grande ritornu in prima
divisione. Innù a Corsica sana si face a festa è
schjoppanu e pistulittate. A sera di a cullata, hè un
curtegiu di centinaie di vitture chì cercanu à
ghjunghje innù u centru di a cità, a circulazione hè
paralizata per parechje ore. Pare esse quessa a
caratteristica di stu club micca cum’è l’altri. Allora
chì tuttu paria persu è finitu, allora ch’ellu ùn c’era
più ragione di sperà, rinasce u Sporting, più forte ch’è mai. Forse appena à l’imagine di u populu
corsu ? Hè per quessa chì stu club ùn murerà mai,
n’hà vistu troppu per piantassi cusì…
A prova si n’hè in u 2002, quandu u SCB torna à
vultà (cum’è à pocu pressu tutti i dece anni…) in
finale di a cuppa di Francia. Amagia di u Sporting
opereghja sempre. Ma a finale, mal preparata gira
à u fiascu. I ghjucadori sò destabilizati cun l’affari
di i fischji di a « Marseillaise ». Tandu nasce una
prima rumpitura trà u publicu è a squatra turchina.
Sta finale, fatta per u Sporting, cusì faciule à
vince, hè persa guasi senza ghjucà. I sustenitori
ùn a perduneranu mai.
In tantu, u ballò hà cambiatu. U cuntestu di u «
football business » incù a so mundializazione è a
so mediattizazione ùn arrangia micca e piccule
squatre. I ghjucadori cumprati, vinduti, prestati,
passanu d’un club à l’altru, senza fidighjà u
culore di a maglia. Hè u regnu di u soldu, è soldi
in Bastia ùn ci n’hè mai statu tantu. U publicu
diventatu esigente è stufu di ballò à a televisione
cumencia à abandunà a strada di Furiani.
A falata in segonda divisione ghjunghje innù un
cuntestu di chaos, cum’è una sanzione. Gattiva
gestione finanziaria, gattiva gestione di l’affare
Chimbonda, prima prutettu da i dirigenti nanzu di
ricunnosce u so sbagliu. U disamore trà Sporting
è u publicu hè à u più forte à l’estate 2005,
quandu u Cullettivu di i Sustenitori Bastiacci si
face sente. 3.000 signature sò racolte innù una
petizione chì dumanda di più chjarezza è a demissione
di i dirigenti.
Oghje a cicatrice hè sempre prufonda è ùn hè
ancu à chjodesi. Allora chì u Sporting hè innù a
corsa à a Liga 1 è chì a squatra pruduce un bellu
ghjocu, Furiani ùn face sempre micca u pienu. Per
avà i sforzi di una squatra nova à cummandu ùn
hà ancu cunvintu u publicu, chì li rimpruvereghja
sempre un mancu di chjarezza è d’ùn avè di
manera abbastanza ferma rottu cun l’antica gestione.
U publicu pensa dinù ùn micca esse abbastanza
cunsideratu è pigliatu in contu da i dirigenti.
In più di quessa, cumu ùn ammintà micca e gattive
cundizione d’accolta di u publicu in Furiani
? Stu stadiu, ùn ancu rifattu 15 anni dop’à a catastrofa
è cusì pocu asgiatu, hà purtantu custatu millioni…
Da dumandassi !
Ma basta pocu per chì a fiamma turnessi à piccià.
Ùn ci hè ch’è da vede l’ultimu derby in Aiacciu.
In Timizzolu ùn s’hè intesu ch’è i partigiani turchini,
mubilizati cum’è mai. Siguramente chì u
fattu d’avè pigliatu giovani ghjucadori corsi attaccati
à a maglia turchina cambia a mentalità di u
gruppu. I Leca, Lorenzi, Ghisolfi, Cahuzac o Ben
Saada (chì hè natu in Bastia è chì ùn hà cunnisciutu
ch’è un club dapoi chjucu, l’affare hè abbastanza
rara innù u mondu di u ballò prufessiunale
per sottulinealla !) trasmettenu u so entusiasmu à
i ghjucadori fresteri, hè quessa chì innù u passatu
hà fattu a forza di u Sporting.
U sporting durante l’ultimi trenta anni hà pigliatu
una piazza maiò innù a sucetà corsa è innù a storia
di a Corsica. Si dice chì a prima tappa d’integrazione
di i fresteri à u populu corsu hè
quand’elli cummencianu à sustene u SCB.
Sempre accant’à ellu innù i mumenti i più difficiuli
di a so storia, u « populu turchinu » ùn pò
esse lasciatu da cantu da i dirigenti, chì u Sporting
ùn si pò passà d’ellu. È si per avà u disamore trà
a squatra bastiaccia è u so publicu hè impurtante,
i sustenitori ùn dumandanu ch’è à infiarassi. A
passione hè sempre quì, basta di stuzzicà appena
u vespaghju…
Petru Paulu de CASABIANCA
