Un hè statu u locu di l’ultimu riposu…

Avia dumandatu in lu so testamentu, u Babbu di a Patria, d’esse sepoltu in lu campusantu di San Pancras, induve eranu interrati i stranieri di religione catolica. In 1867, i fratelli Ambrosiu è Emiliu Casabianca, Corsi di Bunifaziu stallati in Londra, avianu cuntattatu u Mere di Merusaglia è u Prefettu di a Corsica, avendu amparatu chì un prugettu di custruzzione d’una via ferrata minacciava u campusantu. (Oghje, ci hè, accantu à issu locu, una gara mudernissima : « St Pancras international »). À quella epica, i sforzi di i fratelli Casabianca ùn anu permessu di fà rivene u Generale Paoli in Corsica. Ma a so tomba ùn fù dannighjata durante i travaglii chì una parte sola di u campusantu fù distrutta, è qualchì annu dopu, in 1889, u Babbu di a Patria vultò nantu à a so terra tantu amata.

Avemu vulsutu visità issu campusantu, bellu - è serenu quandu ùn ci passa u trenu accantu - induve ferma un chjassu chjamatu « Paoli walk »…