Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 13, Aprile di u 2008


A Repùblica ?



In Corsica à ghjorni d’oghje più nimu si dice francese ma tutti i particianti di a Francia si dìcenu « republicani ».

Ma eiu li dumandu “chì repùblica” ? Una forse di sse repùbliche di u Nordu di l’Auropa o a nostra ? O ancu di una di sse munarchìe chì, da u puntu di vista di a demucrazìa o ancu di u rispettu di i diritti di l’omu, hanu più lezziò à dacci chè à piglianne in Francia ?

À tutti ssi Republicani li pare chì a Francia aghja sempre campatu sottu à tiranìe è chì di colpu, in un ghjornu solu, u lume di a Libertà si sia accesu cume un lampu, à tempu pigliata a Bastiglia. È puru a realità fubbe altra s’omu cerca à arricurdassi di tutti i strazii vissuti da e pupulazioni chì campàvanu nantu à u territoriu francese. A presa di a Bastiglia ùn fubbe mancu à pena a rivolta d’un pòpulu sanu contra à l’inghjustizia nè menu a vuluntà di lampà fora un rè è un sistema di guvernu incarnizatu da un rè. Fubbe una manifestazione chì hubbe un risultatu incridìbule. Una mansa di disgraziati, mossi per u più da a fame, si chjappò una furterezza chì ùn fubbe mancu tantu difesa. Chì dopu, certi àghjanu circatu à fanne un attu di grande impurtanza, ùn si pò, hè certa, mette in dùbbitu nè menu ch’elli àghjanu riesciutu à fanne u principiu d’un regime di libertà. È cusì chì dopu, sùbbitu dopu, i privileghji fùbbenu scacciati è ci ne rallegremu. Ma solu i privileghji chì tuccàvanu à i diritti nubbiliarii fùbbenu ghjittati perchì à u dirittu di pruprietà ùn ci si tuccò.

Diu ne guardi ! è u dirittu di pruprietà fù ancu scrittu ind’a Custituzione ! è u 14 di lugliu diventò a festa naziunale. Certi hanu ancu dettu ch’ella era quessa una rivolta burghese.

Mancu quattòrdeci anni dopu, a Repùblica fubbe lampata à gambe à l’aria da un certu Bonaparte chì diventò cusì Napuleone u Primu è quessa si fece, ci vole à arricurdalla, cun l’allegrezza di un pòpulu chì avia troppu suffertu da l’inghjustizie è da a miseria.

A gloriosa repùblica ùn avìa duratu tantu, una quindecina d’anni mancu. Ma chì si era passatu in ssa quindecina d’anni ? Pochi affari per dà felicità è pane à u Pòpulu. I dirigianti chì si èranu fatti vede divoti per u bè di u pòpulu, si battìanu avà per u putere : un regime succedìa à l’altru senza chì el diàvule pudìssine scegliu u peghju. Ci fùbbenu dinò omi di virtù frà quessi ma u putere pudìa ancu cullalli in capu : ci fubbe ancu un certu Robespierre, da a so vuluntà di duminà tuttu per fà a felicità di un populu sanu, si mutò ellu in orcu sanguinariu. Detagliu : l’avìanu cugnumatu “l’incorruptible” cume s’ellu fussi statu un segnu per distìnguelu da l’altri, tutti l’altri chì èranu currotti. In ssu mentre i carrughji di e cità ribumbàvanu da a mane à a sera da e campanelle chi segnalàvanu e carrette carche à ghjente ch’omu purtava à u macellu. Era u tempu, pocu demucràticu, di u terrore. Sùbbitu dopu, u Direttoriu si segnalò cù una curruzzione generalizata.

(a sèguita venerà)

Francescu Maria PERFETTINI