Mentre chì in Corsica si parla di « désanctuariser
» u liturale è di custruisce unepochi
di golfs pè turisti ricchi, in Sardegna è in
Spagna si cerca à u cuntrariu di prutege ciò
ch’ellu ferma di vèrgine.
In Sardegna, u presidente Renato Soru hà
pigliatu una misura forte pè prutege u liturale
di l’isula surella : e custruzzione nove vicine
di u mare sò difese nant’à 1.760 chilòmetri. À
cantu, a nostra piccula « banda di i centu metri
» face piuttostu pietà. Prugetti di cumplessi
tùristichi sò stati suspesi nant’à a Costa
Smeralda. A Sardegna vene dinù di creà un
organisimu incaricatu di cumprà e piaghje pè
prutegelle, nant’à u mudellu di u Cunservatoriu
di u Liturale.
U presidente di a regione sarda hà dinù creatu
una tassa nant’à u lussu : i prupietarii di yachts
è di jets privati devenu pagà un impositu specificu.
Impositu novu dinù pè i prupietarii fresteri
di residenze segundarie chì devenu pagà
una tassa prupurzunaria à a taglia di a so villà.
A dice Renato Soru : « Ci sò circa 300.000
residenze segundarie in Sardegna chì ùn appartenenu
micca à Sardi, in i più belli lochi, allora
ch’elle ùn ci raportanu nunda »… Aghjustemu
chì i soldi racolti prufitteranu à u sviluppu di
l’internu di l’isula. Bellu esempiu di spartera
ghjusta di e ricchezze.
In Spagna dinù, si cerca di prutege ciò chì
ferma da prutege. A costa spagnola hà suffertu
assai da u sviluppu di u turisimu è scarsi sò i
lochi à essesi francati a frenesia d’un’urbanizazione
anàrchica. U guvernu di Jose Luis
Zapatero vole circà di pulisce e zone liturale
scempiate da u bettonu : ricuperà i terreni custruiti
à menu di centu metri di u liturale pè rendelli
à a natura. A pruposta pruvucheghja a
zerga di i prupietarii, ma u guvernu pare decisu
à tene bonu.
È in Corsica ? Si và cumplettamente à l’oppostu
da e vie scelte in Sardegna è in Spagna.
Si cuntinuveghja d’incuragisce un turisimu di
residenze segundarie, si torce a lege liturale, i
« spazii rimarchèvuli » sò minacciati è si
diventa una « réserve naturelle de vacances »
pè ripiglià a publicità di l’ATC. In tantu, i Corsi
sò messi fora da i prezzi di l’immubiliare. A
prussima tappa serà di diventà una riserva
naturale d’indiani ?
Petru Paulu de CASABIANCA
