Sti pochi tempi, leghjendu l'articulu zifratu da Nadia Amar in Corse-Matin à prupositu di sulidarità, riguardu à a racolta di “e pezzette gialle”, fàtta da migliurà a qualità di vita di i zitelli è i zitelloni uspitalizati, a ghjurnalista scrivia : In Francia, a campagna 2007 hà cusì permessu una racolta di 5,6 milioni d'euri ! in crescita di 30% raportu à l'annu 2006 !

Si dice chì pè a Corsica, grazia à quessa, varie operazioni sò state finanzate à prò di l'ospitale di Bastia è dinù, l'acquistu di un " mini bus " d'un valore di 12.500 euri da traspurtà i zitelli maladi, curati in lu serviziu di pedopsichiatria di u stabilimentu. L'autore di 'ss'articulu ùn hà micca dettu quantu soldi sò stati attribuiti per ciò ch'ella chjama : “i finanzamenti di varie operazioni à prò di l'ospitale di Bastia.”

S'omu si ferma à stu dettu, l'altri ospitali di Corsica ùn anu avutu nunda ! Ci vuleria quantunque à sapè di manera precisa ciò ch'ellu hè statu attribuitu à a Corsica sana ! perchè s'omu face u calculu, 12.500 euri ripresentanu solu 1/450e. di l'inviluppu tutale ! Una miseria ! tandu cum'è sempre : “baccala per Corsica !”

Allora eo, cummossu da sta manera di fà, lampu quì una sfida ! femu da per noi a racolta di e pezzette gialle è rosse in lu nostru paese !

A Corsica hè propiu generosa ; a saperànu l'organisatori di u “Téléthon” ! i corsi, raportu à a populazione sò i più larghi di borsa ; assai più di i francesi.

Pè sti maladi quì, zini in stacca ùn nè anu ! allora figuratevi pè ciò chì cuncerna i zitelli ! Chjameremu cusì à susteneci, ogni prufessione di salute è più particularmente l'Associu Corsu di a Salute, a Croce Rossa, a Croce di Malta ecc… Noi altri, ùn avemu bisognu nè di madama Chirac, nè di David Douillet postu chì, nantu à u nostru Trinnichellu, pè fà a racolta, questi quì ùn l'avemu visti !

Cum'è Adriana Karembeu pè a Croce Rossa, si chererà l'aiutu di a nosta bellissima Laetitia Casta ; ella puteria esse a cumare di st'operazione. Noi altri quindi, u ghjudiziu l'avemu, aghjusteremu dinù e pezzette rosse chì tutt'ognunu tene innu i scagni è chì, sin'ad avà, ùn servenu à nunda.

U nostru Trinnichellu, assaltatu da tutti i nostri puliticanti - li piacenu à fàssila valè -, ferà a racolta da Aiacciu à Bastia è da Bastia à Calvi ma dinù nantu a futura strada (o via) ferrata ch'omu spera, quella chì anderà da Casa Mozza à Bonifaziu ! Ogni associu culturale si derà di rimenu ; i grandi subvenziunati ancu di più ! Certi stampatori-editori - è sopratuttu quelli chì ricevenu soldi di u statu à banghate - furnisceranu à gratisi e scatulette di cartone ornate di a testa mora è di culore verde (quellu di a speranza). Queste quì si metteranu dapertuttu, in ogni negoziu, ogn'amministrazione, ogni speziali è medichi, ogni intrapresa ecc…Tandu videremu a capacità di mubilisazione di u nostru paese à prò di i nostri ciucci è di i nostri zitelli !

Oghje, a sfida l'aghju lampata ! Tutte e bone vuluntà sò benvenute ; si aspetta pruposte... Dopu à stu grande successu naziunale, a prussima sfida si ferà naturalmente: A creazione d'una Cumpagnia Marittima Corsa, poi di seguita, una Cascia di Risparmia Corsa, è à tempu, a nascita di una Banca Corsa è tira avanti... cusì, sta cruciata, principiata da e pezzette, si perseguiterà è strada facendu, per adattà ad usu nostru l'adasgiu talianu, ... eppuru si dicerà... Corsica fàce... è ferà da sè !! (1)

Petru Vachet-Natali

Stu 14 di lugliu 2007 ghjornu anniversariu di a pruclamazione di Pasquale Paoli generale di A Nazione in lu cunventu di A Casa Bianca. (14/7/1755).