Dopu à Séguéla, Kouchner, Jean Reno è Clavier,
quale serà u prussimu ?
Quale serà u prussimu pippol sarko-rocca serristu à
custruisce in Cala Longa ? Vutate !
A sapete bè, ciò ch’ellu ci vole à chjamà avà
L’Extrême Sud (ùn face digià più parte di a
Corsica...) hè diventatu una riserva di pippol amichi
di Sarko è di Camille de Roccaser (hè cusì chì ellu
prununzia u so nome, allora rispettemulu !).
Allora postu chì Christian Clavier, Jean Reno,
Bernard “frittella” Kouchner è Jacques Séguéla anu
mustratu a via, quale serà u prussimu ?
Ancu voi, avete u dirittu di vutà per quale vulete
vede scempie appena di più e nostre coste è custruisce
u so bellu bunker illegale in bor’di mare
autorizatu da a prefettura.
Eccu i candidati :
I fratelli BOGDANOV : sò a surpresa di i sustegni
di Sarko à a presidenziale. Ma si pò esse goffu è
bettunizà e coste, nò ?
MIREILLE MATHIEU : più nimu ùn ne vole, ùn
puderà finisce ch’è ind’è noi.
JEAN-MARIE BIGARD : hè stranu ch’ellu ùn sia
ancu statu ricevutu da u merre di Portivechju è chì
a CTC ùn li appia ancu finanzatu qualcosa...
GILBERT MONTAGNÉ : l’avantagiu cun st’amicu
ìntimu di Sarko hè ch’ellu pò custruisce à
l’Arinella, ùn s’avviderà di nunda.
ENRICO MACIAS : hè statu u primu à cantà
Solenzara in l’anni sessanta. Stu pistellu di u
Riacquistu meriterebbi anch’ellu d’avè u so casale
quì.
JEAN-PIERRE PERNAUT : hà aiutatu à a so manera
à Sarko à diventà presidente. Qualcosa li truveremu
anc’à ellu, nò ?
ROGER HANIN : amicu fidu è cugnatu di
Mitterrand, hà anch’ellu vultatu a so beretta pè andà
à sustene u chjucu. Truverà bè una piazza trà
Séguéla è Kouchner...
PLASTIC BERTRAND : cù un nome cusì, averà
ancu u sustegnu di u Fronte.
JOHNNY HALLYDAY : hà cantatu in corsu cun
Michel Mallory, ùn li manca più ch’è a villà in Cala
Longa.
PIERRE PALMADE : cumplettamente has been,
invechjatu, sminticatu da tutti. Hè u candidatu ideale
per diventà anch’ellu “un ami de la Corse”.
ARTHUR : tuttu ciò chì a Francia face di peghju.
Per quessa pò vene à sfragellà anch’ellu u nostru
liturale.
STEEVY BOULAY : Sarko li truverà bè una piazza
à Via Stella, nò ?
MICHEL SARDOU : ah nò, ellu ci hà sciappatu
l’orechje durante anni è anni è vulia ancu interrà i
so parenti à u cimitò di Zonza. Avà si n’hè andatu,
stumagatu da i so vicini... S’ellu pudia mustrà a via
à certi…
DIDIER BARBELIVIEN : scumettite chì anc’ellu
hà da finisce à fassi muntà a sega in Via Notte ?
Eccu u listinu hè compiu. Avà vutate !
U SGAIUFFU
