Hè durante u prucessu di Matignon chì hà
parturitu a lege di u 22 di ghjennaghju 2002
ch’ella hè nata l’idea di u Pianu
Eccezziunale d’Investimenti. Era bona è ghjusta
st’idea perchè s’omu ùn pò paragunà a Corsica à
certi lochi d’Africa, ùn si pò micca paragunà la à a
megalupola europea. A sapimu ch’elle mancanu
l’infrastrutture di tutte e mamme in Corsica è chì u
costu
di a so mancanza hè bellu più altu ch’è quellu di a
so custruzzione. S’hè pagatu, per esempiu, in vite
umane, una sera di maghju in Furiani. Dunque, ci
anu cacciatu u PEI da a so baretta da rimpattà u
ritardu « storicu » di a Corsica. Cridianu forse fà un
attu di pentimentu ?
U PEI : dui soldi pè cumprà e cuscenze
Qualchì annu dopu, u risultatu hè pocu. Invece di
diventà un arnese à prò di u sviluppu, ci avvidimu
chì rinforza u clientelisimu invece di prumove una
pulitica di prugettu à prò di u cummunu. È ancu,
quandu spunta un prugettu, sti soldi di u PEI,
invece di ghjuvà da investisce, cum’ellu a dice u so
nome, hè adupratu per u funziunamentu. Hè cusì
chì d’un PEI si ne face un Pianu Usuale di
Funziunamentu. Fattu è fine chì u PEI ùn ci porta
nunda di novu è divente cusì una chjoppula biota,
una bucia. Pianu logicu cuncepitu à u livellu regiunale,
ùn ci n’hè. L’Eccezzione di tamantu affare, ùn
c’hè mancu ella, postu chì i scarsi investimenti
fatti, passanu tutti indentru à u PEI è chì si tratta di
pocu affare, cum’è innanzu. In quantu à
l’Investimenti, si facenu custì à cortu andà, per tene
si un merre nanzu à un elezzione o da copre e spese
regulare.
U PPP : per u privatu o per u publicu ?
Tandu, hè spuntata un antra cacciata. Si tratta avà di
u PPP. Hè u Partenariatu Privatu-Publicu o Publicu-
Privatu, secondu u puntu di vista. À sapè s’è u privatu
accumpagna un bisognu publicu o s’ellu hè u
publicu chì aiuta un bisognu privatu… Pare chì u
PPP hà da diventà a regula in Corsica cum’è in
altrò. Ci sò omancu trè ragiò. À u Statu francese, li
mancanu i soldi è ùn pò, in pettu à l’UE permette si
d’accresce u debitu. Da tandu, sò intraprese chì sò
chjamate à sustene u Statu da ch’ellu offri à a
ghjente servizii di più di menu pari à quelli di
nanzu. Ci sò intraprese chì anu vistu quì una
manera d’investisce senza risicu. Eppò, quandu
calanu i soldi publichi, si guarda di più l’adopru
ch’omu ne face. A demucrazia è l’individualisimu
portanu l’idea chì una struttura hà da esse pagata da
l’usanti. Per esempiu, tocca à i sustenidori di
l’ACA di pagà u stadiu. U cuntribuente chì ùn và
mai à guardà una partita di ballò è chì ricusa di vede
i so soldi parte per qualcosa chì ùn li ghjove da
nunda pesa nant’à a scelta di l’eletti, perchè puderà
vutà, a prossima volta, per un antru(a) candidatu(a).
A mancanza d’idee piatta quella di i soldi ma ùn ci
caccia u bisognu.
In Corsica, hè una piccula revuluzione. A ghjente
cridia à a fola chì cuntava ch’ellu era una prutezzione
tremenda u Statu. Ma pianu pianu, s’hè tufunata
a so stacca. Oramai, hè à paghjolu. Per tene e
so ubbligazione imposte da a lege, cerca l’aiutu di
u privatu. A custruzzione di u stadiu François Coty
in Aiacciu hè u primu esempiu di a realisazione
d’un PPP ind’è noi. Serà dinù, 15 anni dopu à u
drama di Furiani, u primu stadiu veru in Corsica.
Era ora ! Ma l’intraprese, pare ch’elle ùn si sterpinu
per purtà prugetti incù u Statu o l’altre cullettività
in Corsica. Perchè ? Prima, si sà chì a Corsica s’hè
liticata, omancu dipoi a lege duganera, incù l’intraprese.
Sò scarse ind’è noi è sò poche poche, quelle
chì puderianu, à fiancu à u Statu, purtà un prugettu
impurtante. Secondu, ci vole à dì la, in Corsica,
simu i tercani di a pulitichella ma quandu si tratta
d’avè idee nove, u brainstorming penciuleghja.
Terzu, l’idea nova d’Ange Santini, pare ch’ella sia
abbandunata ind’è i paesi chì l’anu promossa. In
Inguilterra, duve hè stata purtata st’idea sott’à u
guvernu di John Major, si sò avvisti chì i PPP costavanu
più ch’è l’investimenti fatti da u Statu perchè
e banche imprestavanu soldi cun tassi d’interessu
più alti chè quelli chì u Statu pudia ottene.
Tandu, fattu è fine chì e strutture custruite cù un
PPP custavanu ancu più caru chè nanzu, postu chì,
ch’ella sia cù l’impositi o incù a cunsummazione, a
struttura, bisogna à pagà la. Cusì, sott’à u guvernu
di Tony Blair, sò calati i PPP.
Da u PEI à u PPP, si vedenu duie filusuffie pulitiche
sfarente ma dinù a mossa di a gestione di i soldi
publichi. Da a penitenza falsa di u Statu à u sustegnu
interessatu di u privatu, scambianu e parolle
ma sintimu sempre listessu versu è ne simu sempre
à sicutera. Invece di sviluppà a Corsica, una manata
di puliticanti ci porta di fole in canzone. Più chè
d’incantazione simule, avemu bisognu di l’azzione
individuale d’ognunu à prò di u cumunu.
Sébastien QUENOT
