Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 4, Maghju di u 2007



Paoli Anton Battista (Paoli di Tagliu 1858-1931) :

A « literatura di l’abandonu »



« Nacquì à Taglio, in cinquant’ottu,
Fù di marzu à l’attrachjata
Nudu cum’è un pernicottu,
Frescu cum’è un’ insalata,
Nizzulandu, grassu è tondu,
Feci entrata nu lu mondu. »(1)


A so biografia, l’hà fatta da per ellu, è in rime, Paoli di Tagliu. Aghjusteremu quantunque qualchì elementi… Hè statu neguziante è pruprietariu in lu so paese di Tagliu Isulacciu, in Tavagna, sergente maiore in l’armata, ma dinù autore : « à le mio ore d’estru è quandu ne aghju u tempu, mi divertu à scrive in lingua corsa operette curiose è ridicule… »(2)

Hà scrittu in parechji giurnali è riviste: « A Tramuntana »; « L’Annu Corsu » ; « A Muvra » ; « L’Altagna » ; « La Corse Nouvelle »; « La Nouvelle Corse » ; « Le Réveil de la Corse » ; « L’Echo de la Corse » ; « Le Petit Bastiais ». Ghjacumu Fusina u presenta cum’è « influenzatu da referenze literarie italiane è purtatu nantu à a creazione puetica tradiziunale »(3). U so parlatu hè quellu, sputicu, di a Tavagna. A so penna hè bella è savurita, spessu cummuvente.A so produzzione hè impurtante : « U Muntese » di 1924 parla digià di « numarose canzone è più di 150 sunetti »(4). Ma Paoli di Tagliu hè sopratuttu cunnisciutu per u so miticu « Lamentu di u Castagnu ».

À quella epica, si tagliavanu issi arburi preziosi per appruvisiunà l’usine di tanninu. In issu lamentu, publicatu parechje volte è spessu cantatu, a sorte di u castagnu simbuliseghja l’evoluzione di a sucietà corsa, cum’è l’abandonnu di a rocca in lu so puema « A Rocca di Mammona »(5). Issu tema, trattatu di modu metaforicu, si ritrova sottu a penna di parechji autori corsi, cum’è Ghjuvan Petru Lucciardi incù e so « Cose andate ». Pasquale Marchetti presenta u « Lamentu di u Castagnu » cum’è un mudellu di issa « Litteratura di l’abandonu »(6), chì si svilupperà durante anni è anni, sin’à u svegliu - è e lotte - di u settanta.(7)

Autore ricunnisciutu, persunalità di u mondu culturale d’u principiu di u XXu seculu, eccu Paoli di Tagliu, dipintu da u so parente Ghjiseppu Filippi : « U vecu cum’è s’ella fussi avà : diritu cum’è un pal’ di ferru, a so barba bianca – cum’è Victor Hugo – bella pettinata, andendu à passi lenti, i pollici infilati ind’è stacchine di u curpettu, l’ochji vivi è u surisu graziosu.»(8)

Quand’ellu si n’andò, « l’Annu Corsu » ramintò ch’ellu era statu l’autore « di tante opare appriziate » è « sopprattuttu di u Lamentu di u Castagnu chì vivarà quant’è a Corsica »(9).

Ghjuvan Guidu TALAMONI


(1) A mio Biografia, l’Annu Corsu 1924, p. 194.
(2) L’Annu Corsu 1924, p. 188.
(3) Dictionnaire historique de la Corse, opera cullettiva fatta sottu à a direzzione di Antoine Laurent Serpentini, Albiana, 2006, p. 728.
(4) P. 188.
(5) L’Altagna, Nu 3, 1mu marzu 1926, p. 18.
(6) Pascal Marchetti, La Corsophonie, un idiome à la mer, Editions Albatros, Parigi, p. 159.
(7) In issa abbundanta « litteratura di l’abandonu », si pò mintuvà, per indettu, « Ricordi amari » (Santu Casanova), « L’angunia d’un paisolu corsu » (Antone Bonifacio), « Vechji testimoni » (Peppu Flori), « U mio mulinu » (Dumenicu Marfisi) è quellu famosu « Chì fà, chì ci si pò fà ? » di i fratelli Vincenti, cantatu da Antone Ciosi.
(8) In quelli tempi…, in « U Muntese », Nu 85, ottobre 1962, p. 550.
(9) L’Annu Corsu 1932, p. 156.

Opere publicate
Fiori è Spine, A Muvra. Aiacciu, 1926
Risa è Pianti, A Muvra. Aiacciu, 1926
Nozze è Doli, ADECEC. Cervioni, 1990
Lamentu di u Castagnu à u Corsu, Limongi. Cervione