Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 2, marzu di u 2007



U PADDUC

è i quistioni da Ghjacumu Orsoni*



Àsenta un parè cumunu, è chì cunteni parti di virità, u non sviluppu duratoriu hè a càusa di tanti dificultà subiti da i Corsi. Hè, in principiu, da sfrancà stu difettu chì a Cullittività Tarrituriali di Corsica hè in càrica d’elaburà un Pianu d’assistamentu è di sviluppu duratoriu di a Corsica, u famosu PADDUC, chì si ni parla tantu senza sapenni nienti. Or v’eccu chì una virsioni ricenti di u prughjettu, chì data da nuvembri 2003, prisenta i risultati di i studdi fatti sin’ad avà. St’ozioni avarìani da essa ratificati da i nosci eletti à cap’è à calchì sittimani.

Da migliurà i cundizioni di vita in l’Ìsula, i ridattori di u testu prupònini di sfassi di a lògica di l’assistanatu è ambiziunèghjani di fundà a pulìtica di sviluppu cù i propii avantaghji di a nostra terra. Cù stu prughjettu, d’altrondi propiu ghjustificatu, passarìami da una sucetà di u frazu à una sucetà di pruduzzioni. Ma comu fà ?

Cunveni, sicondu i pianificatori, ad avviassi in una pulìtica unicamenti urientata versu u turìsimu d’altu lussu è di favurizà l’ecunumìa risidenziali.

Ci vol dinò à prumova un’agricultura di qualità, diversifichèndusi cù l’aiutu di l’agroturìsimu. S’arrèmbani à sti dui urientazioni uni pochi d’allusioni à i pussibilità ufferti da l’attività dipindenti di u mari (cruceri è acquacultura), i novi tecnulugìi è i servizii à i parsoni.

Scuprendu stu testu, u lettori s’impinsirisci è stà in parapatenti, chì a virsioni di 2006 ùn prisenti alcuna nuvità di pettu à diffarenti prughjetti chì si sò multiplicati da l’anni. Par un dettu, un rapportu di 1988, urdinatu da l’Assemblea Rigiunali di tandu ci prupunìa dighjà turìsimu di qualità è ancu a criazioni di un’ecunumìa «golfique [sic] !» Or hè sapiuta chì u sviluppu annunciatu, in l’annati 1990, ùn s’hè micca fattu, è fù ancu l’èpica a più pèssima da a nostra ecunumìa.

Una quistioni s’imponi sùbitu : comu hè chì i nostri sviluppadori s’arràncani à u stessu scinariu senza circanni d’altri ? Avarani l’idei cusì pòvari ? Ùn saremu quantunqua po micca cundannati à un avvena dicritatu in eternu da una divinità diciarbiddata. D’altrondi, parchi a rializazioni di u PADDUC l’ani cunfidata à scagni di studii fora di Corsica, quandu altri istitutzioni corsi, tali l’Università, mai sò stati cunsultati ?

Sarà chè no semu cusì incumpitenti ?

Eppuri, magaru sta pèssima mancanza di criatività, magaru sta prucedura dubitosa, l’ùltima virsioni di u PADDUC ùn hè micca fatta à quel versu. Hè u risultatu di un longu studiu di i cummissioni chì si sò aduniti. Ma allora parchì l’ozioni scelti sò tinuti sicreti, parchì ùn pruducìni micca dibàttiti in a cità ? I quistioni ecunòmichi, quant’è l’altri, mirètani d’essa palisati è discutitti da tutti di fattu chì i dicisioni presi fùssini d’ampiu accunsentu. Ùn hè chè cusì ch’eddu si sghjunghji à una sucetà più participativa, veni à dì più dimucràtica.

I scelti dicisi da u PADDUC sò grevìssimi da a Cosica è da i Corsi par vìa chì, sicondu a Leghji, u prughjettu aduttàtulu ùn si mudificarà micca intali à un longu tempu è s’impunarà, par un dettu, in quant’à l’infrastruttura.

À l’accorta, u PADDUC ùn si pò micca accittà tali è quali eddu hè. S’è no vulemu migliurà stu prughjettu, importa d’urgenza d’infurmà è d’apra un dibàttitu in l’Ìsula sana è cù a diaspora. I pochi mesi in più cunsacrati à currèghjalu ci farìani prò da acquistà annati di benistà è di paci.

Traslazioni da u francesu di Rinatu Coti

*Prufessore emeritu à l’Università di Corsica