Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 4, Maghju di u 2007

A crunichetta di Petru VACHET-NATALI


Version française



E DUIE MARIANNE



Sti pochi tempi, a cità di Bastia hè stàta premiata pè a so’ bona gestione municipale in quantu à ciò chì cuncerna l’arrestu di a fughjita fiscale (à chjamanu : « l’évasion fiscale ! »). Civa ! quì mirà, à senteli, u soldu corre cum’è l’acqua di u fiumicellu Toga ed invece d’andàssine ver’di u portu di piacenza, soga si n’anderia – da ciò ch’omu dice - pè ‘ssi paradisi fiscali ; versu d’altre isule tale : l’isula di Man, l’isule Vergine o forse l’isule Caimani…saetta !

A pusizione (l’assiette) da calculà u percentuale d’impusizioni lucali era di 25M € in lu 1995 è oghje‘jornu seria di 34,5M €. Dicenu ch’ellu cala ma vegu piuttostu ch’ellu cresce ; ossinnò, ùn ci capiscu un cavulu ! Sta fisica, mi face pensà à ciò ch’ellu si dice quindi … sentitela in francese : « Elle augmente pas elle augmente ! »

U fattu stà, cun l’appoghji di u secretariu generale di e Marianne d’Oru, di u Presidente di u Senatu è quellu di l’Assemblea Naziunale francese, Bastia s’hè ingucciatu a Marianna d’Oru pè a so’ bella gestione municipale. Si spera quantunque ch’elli l’averànu rigalatu u bustu di Laetitia Casta, a nostra bella Marianna corsa, perchè l’ultima scelta d’Evelyne Thomas …ohimèlla !

Ma subitu dopu, u lindumane di sta grande nutizia, propiu u 19 d’aprile, Corse-Matin in le so’ pagine di Bastia, titulava : « Une pluie de « papillons » sur les pare-brise. »

Ùn ne simu più à a bella puesia di Ghjacumu Santu Versini chì dicia : « Neva, neva è neva fiori »… avà piovenu farfalle !… fora a puesia ! or’ di quesse e farfalle, ci ne passeriamu vulinteri !

U stessu giurnale dice à stu prupositu in « Le chiffre du jour » : 400 000 € di raportu pè a cità di Bastia !

Avà aghju capitu perchè ùn sò crisciuti l’impositi !…Indhè… cusì, neci nicioni, si rimpattanu bellu bè!

In pochi mesi, (postu chè no’ simu in perioda preeletturale), i pulizzeri municipali sò passati da 11 à 17 !

Hè capita, pè certe infrazzioni, devenu fàlle falà scudrate ! ùn sia chè per quelli (è spessu quelle) chì si piglianu e piazze di i stroppii o di i grandi maladi : « les handicapés ».

M’arricordu quandu eru pè ‘sse Francie, certi associi i difendianu appiccicandu stampini maiò speziali nantu à u vetru di u cunduttore ; di quelli chì ùn si spiccicanu più. Quessa sì ! ci vuleria à fàlla quì dinù per amparà à certuni (e) u calateiu !

L’amende, ci vuleria puru à mettele à quelli, sempre i listessi, chì staziuneghjanu in doppia fila ; arte nustrale digià trattatu quarant’anni fà da u ben’di Tintin Pasqualini u quale, macagnandu, dicia cusì : « Doppiafila Ange dit Sifflet ! »

Cumpieremu quì u fogliu ; magaru, mentre certi festighjeghjanu sta nova Marianna d’Oru, noi altri, assai numerosi, semplici automobilisti, per via di tuttu stu pulizzame zelatu, prontu à fàccile falà à colpu di barabattule (1) salite, noi altri dicu, ghjuria cumposta da parechje millaie di cunduttori…à a municipalità di Bastia, per tutti ‘ssi strapazzi, li attribuimu oghje… a Marianna di Piombu !!

Stu primu di maghju festa di u travagliu è sopratuttu, cosa strana, ghjornu di riposu.

(1) Barabattule : sinonimu di farfalle ma quì u « battule’ » ci stà in incantu !