Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 5, Ghjugnu di u 2007



Un statutu pà a lingua : u parè di Jean-Marie Le Pen



In lu misincu Corsica d’aprile di u 2007, Jean- Marie Le Pen, candidatu à a prisidenza di a Ripublica, dichjara chì a Cartula di e lingue minuritarie ùn arreca nisuna suluzione riguardu à a salvezza di a lingua corsa. Aghjusta in oltre chì a cagione principale di a so dibbulezza attuale tene à à a dibbulezza dimugrafica isulana. Abbona infine chì una certa ricunniscenza cuncessali ch’ella sia un bè più cà un male.

Prufittemu di l’occasione datuci da stu candidatu da mette (torna) in ballu a quistione di u statutu di a lingua. Si sà chì, da parechji mesi, l’Assemblea tarrituriale n’hà fattu una quistione di primura, particularamente dapoi a so deliberazione di u 1ma di lugliu di u 2005. Si pò leghje in le pruposte d’orientazione strategiche aghjunte à quellu ducumentu ufficiale chì a lingua hè u puntellu è l’assu maestru di a nostra cultura, ch’ella hè tinuta da parte escinziale di a nostra idintità è ch’ella spechja à l’infora l’essezza nustrale.

Ind’un certu modu, l’ultimi prupositi di Le Pen mintulati quì ponu ghjuvà da pian’ di fondu à l’affirmazione sulenne di l’eletti rigiunali : a lingua face oghje l’ogettu d’un largu accunsentu, par l’inseme di l’attori pulitichi, qualvoglia sia a so scelta ideulogica. Ed hè una bona pà u populu corsu, in la diversità di e so upinione.

U tira è tene stà oramai in la migliò manera di pudella prisirvà ed ancu spannà. Da issu puntu di vista, u so statutu ferma una quistione di fundalizia. Par via chì, à u pianu giuridicu, una prutizzione ligale impidisce ch’omu possa nuce in varuna manera à u mantinimentu è à u sviluppu di u so usu.

Attualamente, u prifettu pò purtà da nanzu à un tribbunale qualunque dicisione d’ufficializazione di a lingua, puru minima, par via di l’articulu 2 di a Custituzione. Dunque, pare nicissariu di toglie st’inforse aduprendu a Cartula, puru cù i so difetti, è mudifichendu in cunsiquenza quellu articulu 2. À stu prupositu, si pò custattà chì u numaru di i diputati in favore à st’iniziativu hà piuttostu tindenza à cresce da uni pochi d’anni. Chì crimine ci saria, in oltre, ad aduprà un scrittu ufficiale aurupeu, postu ch’è no femu parte d’issu cuntinente ? Chì crimine ci saria à mette a custituzione francese in cunsunente cù u drittu cumunu cuntinintale chì, à vulella o à ùn vulella, ci rege à tutti ?

Ma parlemu avà di u sigondu argumentu di u sgiò Le Pen : a currilazione trà dibbulezza linguistica è dibbulezza dimugrafica. In l’anni cinquanta, l’isula era spupulata da veru : pà u più ci stavanu circa 160 000 abbitanti. È si parlava corsu in ogni locu, in casa è fora, in cità è in paese. Ùn vale dunque l’argumentu soiu : a cagione chì u corsu sia rinculatu tene à parechji fattori, chì l’integrazione à u sistema marcante glubbale, in lu quatru d’un Statu munulinguu, principiata à l’entre di l’anni sissanta, ùn sarà statu micca u più minimu. Le Pen, baullu ùn hè siguramente micca. Dunque, cumu si pò spiigà simule sbagliu da parte soia ? L’idea piatta saria quì chì u populu corsu, u so vechju ceppu etnicu, s’addibbulisce è stà par isparì. Si ne volta cusì à un argumentu classicu di u Front national, a lingua hè l’incarnazione di u populu, cuncipitu in la so diminsione sclusivamente etnica. Hè u nidu è a ghjustifica di tutte e sclusione è di tutti l’intardetti à l’integrazione di chì vene da fora. Custattendu oghje a diversità di l’origine di a pupulazione isulana, u mantinimentu è u sviluppu idintititariu ùn pò stà cà indi l’affirmazione sirena d’un principiu d’apartura.

A lingua hè, di siguru, pusessu di u vechju ceppu isulanu, quessa ùn si tratta di nigalla. Ma hè dinò un prugettu, un’ offerta fatta à u scalaticciu chì hà voglia di fà a so vita sopra à locu. O cà sinnò, cumu spiigà ch’elli sianu turnati Corsi i figlioli di tanti Lucchesi, di tanti giandarmi è funziunarii ghjunti à stabbulissi quì ?

Tocca dunque à ùn lasciassi purtà da i missagi subliminali sparti cun arte è talentu da unu chì a cunnosce longa in quant’è à u versu di a rittorica pulitica.

Pasquale OTTAVI