Avete pigliatu a merria di Bunifaziu di marzu,
mettendu à palesu una rumpitura cun a vechja
municipalità. Oghje, si custruisce sempre in
Cala Longa è da fora, pare chì tuttu sia rimessu
in quistione. Di manera cuncreta, ch’hà purtatu
allora, d’avè vutatu per voi ?
Cunniscìate u cuntenutu di u nostru prugramma
eletturale chì avia previstu di mantene a custruttibilità
di a zona di Cala Longa, cù una vuluntà forte
di vedeci una urbanizazione cuntrullata. Sta
vuluntà s’hè materializata u ghjovi 29 di maghju,
quandu à u Cunsigliu Municipale avemu lanciatu
una mudificazione di u regulamentu di zona per
permette di limità l’impatti visuali è nant’à l’ambiu.
Però, a nostra pretensione à incarnà a rumpitura
hè sempre forte, perchè chì à u cuntrariu di i
nostri predecessori è di i nostri avversarii, ùn previdemu
nisuna custruzzione nant’à i siti sensibili di
Balistra, Tonnara è Cannetu. Dinù, avemu l’intensione
di riesce nant’à u pianu suciale, chì dapoi u
1986 in Bunifaziu nisun allogiu suciale hè statu
custruitu. Ci travagliemu. A rumpitura ùn si riassume
sola à i cartulari di Cala Longa è di l’urbanisimu,
d’astri cartulari impurtanti sò da
agguantà.
In a campagna eletturale, avete annunciatu chì
u PLU ùn serà micca mudificatu. Tenerete sta
prumessa o cuntribuerete à a prutezzione di
certe zone cum’è Balistra è Tunnara o cappià
davant’à e pressioni di i gruppi finanziari,
cum’è a Banca Lefèvre ?
À u cuntrariu di ciò ch’è vo dite, ci semu chjaramente
ingagiati à rivede u PLU, revisione digià
principiata da i nostri predecessori chì avianu
cum’è ogettivu di rinfurzà a custruttibilità nant’à u
Piali. Quì ci hè una attesa forte di i nostri cuncitatini.
Di siguru, avemu dinù pigliatu l’ingagiamentu
d’ùn stende micca a custruttibilità nant’à u liturale.
Cum’è dettu nanzu, durante u nostru mandatu,
ùn si ferà nunda in Tunnara è Balistra (siti
chì avemu prupostu à u Cunservatoriu di u Liturale
di cumprà, incù u scopu di prutegeli). Inquant’à a
pressione di i gruppi finanziarii sò d’accusentu cun
Gilles Simeoni chì prupone di rende à a Corsica stu
patrimoniu fundiu.
Dop’à a decisione di u TA di Bastia autorizendu
e custruzzioni di e casi Séguéla, Delsol è Sulitzer,
è à l’attaccu in ghjustizia di a SCI Hameaux de
Piantarella, in tantu chè merre sucialistu, cumu
ghjudicate ste sfide pulitiche chì vi sò lanciate da
u putere di i soldi ?
Quandu si parla di l’urbanisimu in Bunifaziu,
aghju troppu l’impressione chì sott’à u cuperchju
di lotta ecològica, ci hè in fatti una intensione di
lotta di e classe. A nostra squadra municipale hè
custituita di persone d’orìgine pulitica diversa
(cumunisti, naziunalisti, membri di l’UMP è sucialisti)
chì anu sceltu u cumprumessu, cunvinti ch’elli
sò chì pè pudè sparte torna e ricchezze, ci vulia
nanz’à tuttu à crealle. Ma quantunque, semu cunvinti
chì u putere di i soldi ùn pò micca tuttu autorizà
è fà accettà tuttu. In tantu ch’è sucialistu,
m’impegnu per pudè presentà à a fine di u mo mandatu
un bilanciu chì dimustrerà un’ameliorazione
sensibule di u cutitianu di i mo cuncitatini.
St’ultimi tempi, si parla assai di Cala Longa. Trà
u TA di Bastia è l’associ eculugisti, esiste un
disaccordu in quant’à a definizione di u « mitage» et di u « pastillage ». U sintimu di u citatinu
lambda hè ch’ellu si ghjoca nant’à e parolle per
cunturnà a Lege Liturale, hè u vostru parè ?
Prima, à l’elaburazione di u PLU, ancu se no
eramu favurebuli à a custruttibilità, ci semu interrugati
nant’à ste nuzioni di « mitage » è « pastillage
» nant’à u puntu di vista ghjuridicu. In quant’à
noi, averiamu difesu l’edea di cuntinuità d’urbanizazione
esistente. In tutti i casi, accetteremu e
decisione di i tribunali, i soli da pudè dì u dirittu.
Invece, ùn sò micca siguru chì a Lege Liturale chì
autorizeghja u paisolu novu, sia di più prutettrice
per l’ambiu ch’è u cuncettu messu in ballu chì
meriterebbe malgradu tutu d’esse inguatratu di
manera forte.
À u vostru livellu, in tantu ch’è merre, avete u
putere per frenà a tindenza attuale chì porta à a
balearizazione di a Corsica è di a vostra cumuna
in particulare ?
Cumminceraghju pè risponde à a segonda parte di
a vostra dumanda. Bunifaziu attira oghje nant’à
ella tutti i sguardi. Mettendu à palesu a mo
cumuna, ùn si face micca casu à tutte e pazzie urbanistiche
ch’ellu si pò vede in altrò in Corsica.
V’invitu à fà u percorsu Bunifaziu – Bastia è viderete
da per voi. In quant’à u rollu di u merre, pensu
ch’ellu hè più ch’è limitatu postu chì sottumessu à
e regule di u dirittu. Qualsiasi a so decisione, serà
sottumessu à tempu à u cuntrollu di a legalità da u
Statu, è à a vigilanza di diversi associi… Chjamu à
ognunu à tene u rollu chì hè u soiu.
Chì sò l’arnesi chì permetterianu di cuncilià
prutezzione di l’ambiu è sviluppu ecunomicu,
identità è turisimu ?
Dibattitu maiò…
Mi permetterete cù a vostra dumanda di situà di
manera curretta l’imbusche è u locu principale di
decisione : a Cullettività Territuriale di Corsica.
Appartene à a CTC di regulà u prublema di u
fundiu in Corsica, in particulare nant’à u liturale,
causa maiò di l’instabilità pulitica ch’è no cunniscimu
dapoi trenta anni. À titulu persunale, pensu
ch’ellu ci vole à incuragisce l’ostelleria, piuttostu
ch’è e residenze segundarie, troppu manghjatoghje
in fundiu è generatrice di troppu pochi impieghi.
Infine, ci vole à truvà l’arnesi ecunomichi è
ghjuridichi per chì a maiò parte di u liturale corsu
appartenga à un stabilimentu o una cullettività
pùblica (CTC, cumune, cunservatorii…) è prova
d’indennizà à u prezzu ghjustu, i pruprietarii chì
viderianu u so terrenu bluccatu in nome di l’interessu
generale.
In quant’à cuncilià identità è turisimu, perchè
opponeli ?
Cun un turisimu chì tene di più in più una dimensione
mundiale, a Corsica ùn puderà pretende cuncurrenzà
certe destinazioni nant’à a tematica di u
sole è di u mare cun solu dui mesi di sole à l’annu.
A nostra sola liccia d’avè un turisimu cumpetitivu,
di qualità è à l’annu hè di mette tuttu nant’à e nostre
ricchezze identitarie. Sentu : a messa in valore
di u nostru patrimoniu linguisticu, culturale, a
cucina, l’ambiu…
Site giovanu, autunumistu sucialistu, è avete siguramente
appena d’ambizione… Pudariate participà,
appena cum’è nant’à l’edea di a cualizione
chì v’hà purtatu à piglià a merria di
Bunifaziu, à una magiurità cun differente tindenze,
à l’Assemblea Territuriale in 2010 ?
Ùn si pò micca traspurtà l’imbusche d’una cità di
2.800 abitanti cun l’interessi d’una regione cum’è
a Corsica, ancu s’o credu chì Bonifacio 21 hè un
bellu esempiu di a cultura di cumprumessu, solu chì
permette à i prugressisti di ghjunghje à e rispunsibilità.
Sentu integrà una lista di manca, chì saperia
porghje a manu à tutti i prigressi chì voglianu travaglià
per u benestà di a nostra regione è di u nostru
populu. Per risponde di manera chjara à a vostra
dumanda, diceraghju sempliciamente : IÈ.
Petru Paulu de CASABIANCA
