Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 8, Ottobre di u 2007


Louis ORSINI
Maestru di Cunfarenza in fiscalità à l’Università di Corsica

« Ùn ci vole micca à lascià a ghjente ricca lampà ci fora »



- Cumu hè stata creata l’Agenzia Fundiaria di a Corsica ?

Hè un idea anziana digià. Ricolla à u principiu di l’anni 1981. I nutarii corsi anu postu u prublema di l’indivisione à u ministru Badinter. U prublema era chì in Corsica, pruprietarii ùn la facianu à purtà a prova chì assicureghja ch’elli sò elli i pruprietarii. In dirittu, a prova di a pruprietà, hè u titulu di pruprietà scrittu.


- Cumu hè ch’ellu si ponga solu in Corsica stu prublema ?

Certi anu dettu chì a Corsica era un locu di tradizione urale. Quessa pò, in fatti di dirittu, ùn hè vera, postu chì avemu tanti è tanti ceppi di nutarii ! E cause sò varie. Ponu esse liate à e storie di e famiglie, à e quistione dimugrafiche è à l’esodiu rurale.


- Cumu si scioglienu e trasmissione ?

Oghje, quandu more qualchissia, ci vole à piglià attu. Si pone tandu a quistione di a prova. Di e volte, vene impussibule di pruvà ch’è no simu pruprietarii di a nostra casa. S’ellu ci hè un ricorsu, possu esse spussessatu di a mo ropa. Hè per quessa chì i nutarii anu vulsutu creà tituli di pruprietà, da l’82 ! Venenu i testimonii chì attestanu nant’à l’onore chì tale o tale terrenu appartene à… Hè l’usucapion. Ma si hè postu u prublema di a persona chì l’hà da arrigistrà. Anu pensatu à i magistrati ma un ghjudice scioglie solu e letiche. Ùn arrigistreghja micca.


- Si pudia mette in ballu un dispusitivu ghjuridicu specificu ?

Iè, ma u ministru di a Ghjustizia di l’epica Chalandon ùn hà micca vulsutu intruduce dispusizione specifiche indentru à u Codice Civile francese chì, ci tocca à dilla, hè statu fattu da un Corsu !

I nutarii, frà quali u maestru Spadoni anu ripigliatu quellu discorsu à mezu à u prucessu di Matignon è quandu Sarkozy era ministru di e finanze, e cose sò andate più in furia incù a lege di u 23 di ghjugnu 2006 chì hà creatu stu Gruppu d’Intaressu Publicu… Vogliu dì dinù chì sarà finanzatu incù i soldi di u PEI. Hè un sprupositu !


- Qualesse sò e funzione di l’agenzia ?

L’agenzia hà duie funzione maiò. Prima, vole accatastà prove da pruduce i tituli di pruprietà chì mancanu. Secondu, hà da piglià in carica e spese inghjennate da tamante ricerche. Quessa detta, ùn si tratta mancu appena d’ubligà a ghjente à sparte.

Omu puderà stà ind’è l’indivisione. Ùn entre mancu, l’agenzia ind’è e vendite. Attenti, ùn si tratta d’apre un agenzia immubiliara !


- Quella agenzia, sarà un mezu pè i Corsi di ripiglià pusessu di u so casale o una manera di spachjà lu più in furia ?

A creazione di tituli di pruprietà rende pussibule a vendita di certe rope immubiliare. Ma a speculazione è a pressione fundiaria, e sintimu digià avà. Cavallu ùn hè nata incù l’agenzia fundiaria. Accantu à u Cunsigliu d’amministrazione, ci serà u Cunsigliu Supranu d’Urientazione di stu GIP. Li toccherà di sicuru à definisce a pulitica di u GIP ma dinù, d’analizà u marcatu, e cunsequenze bone, pessime di a pruduzzione di sti tituli è di prupone suluzione. U risicu, u cunniscimu tutti, ma vene un antra cunsequenza à l’immubilisimu. Quandu una ropa immubiliaria ghjunghje senza pruprietarii identificati, divente subitu subitu a pruprietà di u rè. S’hè passata cusì quand’ellu hè statu fattu u Plan Terrier.


- U risicu di spuliazione, si puderà parà ?

Sicura ! Ma ci sò duie cundizione. Prima, ci vole una vuluntà pulitica tremenda. Secondu, ci vole à mette in ballu suluzione tenniche. Ùn sò fole ! Basta à guardà in altrò, in Europa, ch’ella fussi in Italia, ind’è e Dolomite, in Finlanda, ind’è l’isule Aland, o in Svizzera…

L’arnesi ghjuridichi ci ponu esse. Ci volerà forse à difinisce un antra cuncipitura di a citatinanza è, di modu più largu, u statutu di a Corsica. Sta quistione, ùn la pudemu sfrancà. Altrimente, basta à dì ch’è no simu in una fasa finale è chì a cummunità storica hà da cambià di natura. Ùn si tratta d’esse razzisti, ma ùn si tratta mancu, dinù, di lascià a ghjente furtunata lampà ci fora.

Interviste fatte da Sebastianu Quenot