Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 2, marzu di u 2007



Ghjuvan Dumenicu Musso
novu prisidente di a Càmara d’Agricultura di Corsica Suttana

Staccassi da l’immobilisimu



Avà di pocu, vi seti trovu à u capu di a Càmara d’Agricultura di Corsica Suttana. Qualessi sò i principii maiò è i prughjetti di a vostra pulìtica ?

L’emu ditta duranti tutta a campagna : ci vò à staccassi da l’immubilìsimu.

Da parechji anni, i nostri pidicissori, si sò primutai più di a riprisintazioni di pettu à u Statu nanzi chè di dinamizà a pulìtica agrìcula corsa. Ùn ani prupostu nudda, accuntintèndusi di coglia ciò chì l’era datu, beddi bravi, da pudè essa in ogni sirata «champagne et petits fours».

Sta lògica ùn hè manc’appena a noscia. A dici u nosciu slogan «Produce per Campà» : bisogna dinamizà, strutturà, sviluppà i sturmenti di pruduzzioni chì sò i spluttazioni agrìculi, abbadendu a ricchezza di a Corsica in prudutti identitarii di qualità, prudutti d’alta valutazioni, è chì i nosci sistema di pruduzzioni sò accurdati à i nosci righjona.

À a struttura «Càmara» li tocca à essa u sturmentu da vulgarizà l’infurmazioni è a tècnica. Li tocca à essa u prima punteddu di sta nova urganizazioni è di sta dinàmica di modu à tuccà ogni agricultori di Corsica Suttana.


Si pò aspittà chì un’urganizazioni nova di a nostra agricultura ci pudissi indià versu una pruduzzioni chì suddisfarìa i bisogni alimentarii di a Corsica è in cunsiquenza di fà calà u prezzu di a vita.

Ci vurrìa monda imaginazioni, è in ogni modu, ùn hè micca certa chì a propia pruduzzioni alimentaria calessi u prezzu di a vita.

In manera generali, si pò dì chì un paesi hè riccu di a so ecunumìa. L’agricultura hè una cumpunenti maiò di a Corsica. Pruducia bè hè a strada da valessi da sè, è dinò da a spurtazioni da pudè impattà u bilanciu cummirciali. Tandu, pudaremu à veru custatà a calata di u prezzu di a vita.


Si trova a Corsica, com’è tutti i paesi, in u marcatu mundiali, veni à dì ch’edda hè in ubligazioni d’impattà i so scambii cummirciali. Sarìa pussìbuli, sicondu vo, di rinfurzà una pulìtica di prudutti di forti valutazioni (idintitarii o nò) è qualessi sarìani i sittori d’attività à metta in òpara ?

A Corsica hè dighjà intigrata in u marcatu mundiali. A Corsica ùn hè micca un paesi pruduttori, bensì propiu edda stessa hè un veru pruduttu, ciò chì pesa mori nant’à à u nosciu sistema pruduttivu.

A Corsica hè à discàpitu, a so imàghjina hè à l’abbalìa è l’ecunumìa corsa s’avvìa di più versu a prestazioni di servizii chè versu a pruduzzioni.

Ùn vulemeu micca divintà l’alibì turìstichi o di i prufissiunali di u “tuttu turìsimu”. Vulemu campà di i nosci pruduzzioni chì, s’eddi sò identititarii, sò par ciò d’alta valutazioni. Bisogna prumova i pruduzzioni tradiziunali chì fin’à oghji sò i valori sicuri di l’agricultura corsa. L’agricultura hè sola capaci d’impidì esodu rurali, d’occupà, è di metta in valori unu spaziu tarrituriali oghji abbandunatu.


Chì ci pudeti dì oghji nant’à a PAC ? Comu sarìa pussìbuli chì l’agricultura di a Corsica si ni truvessi bè ?

À vulè simplificà tuttu, succedi chì Bruzelles cumplichessi l’affari : u principiu d a nova PAC hè inabburdèuli è a so littura hè impussìbuli pa a forza parti di l’agricultori. Pensu eiu chì Bruxelles, da tanti anni, cerca di fà currisponda a pruduzzioni di tutti i paesi d’Auropa cù a so capacità di cummirciallizialli.

À contu meiu, è di manera sìmplicia, v’eccu ciò chì a PAC hè, è à pettu à i nosci sistema pruduttivi, à pettu à a situazioni di l’agricultura corsa, ùn pensu micca ch’eddu ci cuncirnessi da veru. Semu à sensu cuntrariu di i currenti maiò di i pruduzzioni europei, par vìa chì semu in sottupruduzzioni guasgi in ogni sittori pruduttivu corsu.

Hè quì chì a Corsica pò ricavà benefizii strutturali è qualitativi.


Ind’è no u cunniscimu u pesu di a struttura giacubina. Pinseti chì oghji, s’edda sbuccessi una forza di cuntistazioni in l’agricultura corsa, si pudarìa cambià i nostri rapporti cù Bruxelles ?

I strutturi giacubini pèsani assai nant’à u nosciu sistema pulìticu par vìa chì sò senza contrapesu.

Ùn hè una forza di cuntistazioni pulìtica in senu di l’agricultura corsa chì pudaristi mudificà i nosci rapporti incù Bruxelles. Sarìa piuttostu una forza di travagliu è di pruposti, capaci d’essa in un tempu puliticamenti attiva in Bruxelles è d’essa dinò un contrapesu di cuntistazioni in u nosciu sistema pulìticu, una forza di travagliu è di pruposti chì, sicuramenti, sbarsarìa largamenti u campu agrìculu.


L’alizzioni di a Càmara d’agricultura di 2007 ani purtatu una cambiazioni impurtanti in Pumonti è dinò in Cismonte. Pinseti dunqua chì u rinforzu di a Càmara righjunali pudissi impona una certa unità d’azzioni avviata à una pulìtica agrìcula nova è chì sta nova pulìtica pigliaristi in contu i bisogni di un’ecunumìa chì ferma à custruì ? È chì, à listessu tempu, rinfurzarìa a parti di l’agricultura in l’assistamentu è a cunsirvazioni di u fundiariu corsu ?

A dinàmica di cambiazioni devi andà à fini.

Infatti, u rinforzu di a Càmara Rigiunali devi pudè dinamizà un’azzioni unitaria capaci d’unificà a Corsica Suprana è a Corsica Suttana in una struttura rigiunali, è d’impona una nova pulìtica agrìcula pà a Corsica. Una pulìtica chì rinfurzarìa u sturmentu ecunòmicu riprisintatu da l’agricultura corsa, ciò chì pirmittarìa di ralintà l’esodu rurali, d’occupà è di valurizà l’insemu di i nosci righjona è d’impidì a spiculazioni fundiaria. Pirmittarìa dinò, arammazzè à i nosci puduzzioni, di participà à l’emergenza di una vera ecunumìa pà a Corsica.

Ma quissa hè un’antra storia ancu à scriva.

Intarvista fatta da Ghjacumu Faggianelli, è assistata in corsu da Rinatu Coti.