Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 14, Maghju di u 2008


Edgar Morin

« U mudellu di u Statu naziunale ùn vale per l’avvene »



Avete passatu dui ghjorni in Corsica per i primi scontri giovani / circadori urganizati da l’Università di Corsica, u CNRS è a liga corsa di scacchi. Serà a prima volta chì venite in Corsica ?

Sò digià venutu parechje volte. Mi piace assai st’isula per trè ragiò. Prima, vogliu parlà di i so paisaghji tremendi. Sò una ricchezza chì ci vole à difende à tutti i patti. Eppò, mi piace a gastrunumia corsa. A manghjusca mediterranea mi garba assai. Peccatu ch’ella si perda, salvune in certi lochi duve elle si mantenenu e tradizione, cum’è quì. Infine mi piace assai a psiculugia corsa. Ci hè sta leia, st’arradichera à l’identità è attempu, un apertura nant’à u Mediterraniu, nant’à u mondu dinù. Mi campu quandu sò quì !


Avete travagliatu assai nant’à a quistione di a cunniscenza. Qualesse sò e caratteristiche di a sucetà di a cunniscenza ?

Arrigistremu oghje una mansa di nutizie è di cunniscenze. Ma sta situazione vene paradussale. À rombu ch’elle s’accatastessinu e cunniscenze, u mondu si face di menu capiscitoghju chè nanzu. Perchè ? Ci mancanu i mezi d’urganizà ste cunniscenze. Pensanu certi ch’ella hè l’ecunumia chì spiega u mondu, pensanu d’altri ch’ella hè a demugrafia, d’altri e religione, e credenze. D’altri dicenu chì sò e lotte etniche… Di fatti, avemu tuttu attempu, intricciatu, in interazzione unu nant’à l’altru, unu cun l’altru. Di e volte, vene difficiule à capì u perchè cumu d’azzione chì inghjennanu cunsequenze inaspittate. Si dice chì simu in a sucetà di a cunniscenza. Ùn hè vera ! Simu in a sucetà di e cunniscenze spiccate. Ciò chì ci manca, sò strumenti capaci à cuncepì sti capatoghji.


U fenomenu maiò chì pesa nant’à a nostra vita ghjurnalaghja hè a mundialisazione o a « globalization » in inglese. Qualesse sò e so caratteristiche ?

Si tratta d’un fenomenu à doppie facce. Hè principiata l’epica pianetaria incù a scuperta di l’America. Avemu vistu tandu a duminazione, a culunisazione, u sviluppu di a schjavitù. In listessa mossa, ghjente cum’è Las Casas o Montesqiueu è Pasquale Paoli à l’epica di i Lumi, chì anu suminatu idee nove in Europa. A racolta di sta sumenta s’hè fatta bellu aspessu à prò di i populi offesi. A pianetarisazione hè dunque doppia. Ci sò versi pusitivi è d’altri negativi.

A mundialisazione serà più pusitiva chè negativa ? Ad avà, spuntanu classe mezane in Asia è aghje nove di miseria, in u circondu di e megalopule, in capanacce citadine. Per u più, sò ghjente sradicate à a so terra chì stanu in a dipendenza. A so miseria hè bella più pessima chè a puvertà in a quale stavanu nanzu. Un antru esempiu : a fine di l’URSS hè stata qualcosa di propriu salutariu ma l’ecunumia di marcatu ci hà datu un ecunumia di mafia. Ùn hè micca a cuncurrenza vera. Tandu, vene difficiule di disciuplicà u pusitivu di u negativu.


Qualesse sò e cunsequenze di a mundialisazione à u pianu lucale ?

U prucessu d’assestu di u pianeta per a glubalisazione hè di fatti un prucessu d’uccidentalisazione di l’usi, di a manera di campà. Ci avvidimu chì st’unificazione currisponde incù spartere, rumpiture, balcanisazione… L’anziana Iugoslavia s’hè sbrisgiulata in centu pezzi è ùn ne finisce più di spiccà si.

Tuttu què accade cusì, à casu, o serà a mundialisazione chì inghjenna sta sbrisgiulera ? Serà u prucessu d’uccidentalisazione chì face chì quindi è cullandi, i populi si sentenu minacciati in a so identità ? Volenu elli, avè a so propria supranità nant’à u territoriu duve elli stanu. Avemu dunque assai viulenza è à e volte, nant’à cose fundamintale.


A diversità culturale s’acconcia pocu è micca incù l’unifurmisazione purtata da a mundialisazione ? A si prova u marcatu di sguassà e fruntiere per incascià u prufittu u più maiò. Averanu, e culture, da arrimbà si à u marcatu per pudè campà ?

Ci hè una tendenza à a sdrughjitura di e culture anziane. Sò sicuru, per contu meiu, chì in ogni cultura, ci sò sapè, sapè fà, saviezze, ma dinù illusione, tazzeghji, mancanze. A lotta contr’à l’analfabetisimu hè propriu pusitiva. Ma s’ella diventa attempu negativa, sciugliendu, incù l’analfabetisimu, a cultura d’urigine di e pupulazione tuccate, quella chì i so antenati li anu lasciata, ci hè un prublema sicuru.

Ma a tendenza à l’umugeneisazione culturale hà i so limiti. Per duie ragiò. Avemu vistu dipoi u principiu di a preputenza di u sinemà americanu ch’ella era impussibile d’avè dui filmi simuli. À ogni filmu, li tocca à avè qualcosa d’inventivu, d’uriginale, di singulare. Ben ch’omu cerchi u prufittu u più altu, un realizadore pò fà la à impone un idea è creà un capi d’opera. Ci hè una lotta cuntinuva trà a pruduzione è a creazione. In u mondu sanu, vidite spuntà sinemà uriginali. Ci era u rumanzu inglese, quellu francese è tira avanti è tocca ma avà, si pò cunosce l’opare literarie di tutti i paesi. Ancu quelle esciute da e piccule nazione cum’è Ismail Kadaré per l’Albania. A musica flamenca praticata da i gitani si perdia ind’è l’anni cinquanta. E leve nove anu vulsutu tene st’arte è l’avemu vistu rinvivisce, rinasce. Appena cum’è ciò ch’avete cunnisciutu per a cultura corsa. U Flamencu l’hà fatta à campà nun solu per via di sta vultata à l’urigine ma dinù perchè s’hè adattatu à a mudernità.


Pare chì a mundialisazione limitessi u pesu chì ogni citatinu pò avè nant’à u so avvene. I prublemi ùn si ponenu più à listessu pianu chè nanzu. U Statu nazione ùn pò più intervene di modu fattivu nant’à l’ecunumia di marcatu. A quistione di u cambiamentu climaticu ùn pò esse regulata da un « Grenelles di l’ambiu ». Sò quistione chì cuncernanu l’umanità sana. Da tandu, cumu si puderà custruisce l’avvene stituziunale di u pianeta ?

Ind’è stu prucessu di mundialisazione, vidimu a furmazione di l’infrastruttura d’una sucetà-mondu, à u pianu di u pianeta. Hè propriu sfarenta da quella di u Statu-nazione. Diceraghju ancu chì u mudellu di u Statu-nazione ùn vale per l’avvene. Perchè ? Per ch’ellu ci fussi una sucetà, ci vole un territoriu incù mezi di cummunicazione. Ci vole à avè un ecunumia cummuna. Ci vole à avè stituzione leghjittime.

Per avà, ùn l’avemu. Ci vole dinù una cuscenza cummuna, capce à furmà una « cummunità di destinu ». Avemu tutti listessi capatoghji fundamentali : u risicu d’una guerra nuclearia, u clima, i penseri ecunomichi…Di fatti, furmemu una cummunità di destinu ma ùn n’avemu micca cuscenza. A crisi pianetaria in a quale simu ci impedisce di custruisce e strutture chì puderianu permette ci di scioglie i nostri prublemi. Avemu per esempiu i mezi d’impedisce a Mammapiera in u mondu ma ùn la femu micca per via d’intoppi ideulogichi o scagnicratichi.


Cumu vidite a trasizione ver di a sustituzione di u Statu-nazione da stituzione altre ?

A vecu à dui livelli. À u pianu supranu, ci saranu stituzione cumpetente per trattà di e quistione vitale chì una sola nazione ùn pò scioglie, cum’è i prublemi eculogichi. Sò per l’Europa ma sò attempu partigianu d’un auturità pianetaria. Ma ind’è listessa mossa, a mi pensu chì averemu bisognu d’un soffiu à l’internu di a nazione, trà l’anziani rughjoni. Incù l’Europa, certi territorii si sviluppeghjanu incù quellu d’un paese altru, cum’è a Savoia è u Piemonte. À a Corsica, li tocca à sviluppà cuuperazione incù isule è lochi di u so circondu, ancu puru al di là di a Sardegna è di a Liguria. Dunque, per contu meiu, vecu chì a nazione, per di sottu, è per di sopra, ùn serà micca squassata ma perderà a so supranità assuluta, u so putere stracentralizatu.


Nicolas Sarkozy vole mette in ballu una « pulitica di a civilisazione ». Aviate publicatu un libru nant’à stu particulare. Qualessi sò i so fundamenti ?

A nuzione di « pulitica di civilisazione » difesa da u Presidente ùn hè micca propriu quella ch’o difendu eiu… Partu da u diagnosticu chì a civilisazione uccidentale chì hà pruduttu assai virtù è qualità, pruduce oghje mancanze è difetti di più in più pisivi. Dunque, ci vole à piglià un antra strada. A via di a criscitura ecunomica ch’omu ci prupone hè un scumpientu. Ci vole à avvià si ver di una pulitica chì pigliessi a pratesa di u megliu campà nant’à u benestà materiale. A criscitura, pare ch’ella fussi a sola suluzione mentre hè ella u penseru maiò di a nostra sucetà. Cresce, sì, ma per chì fà ? Cuntinuemu à tene per suluzione fundamintale ciò chì ci porta à u scumpientu fundamintale. Ci vulerebbe una ricunversione fundiva di e mente.


In Francia, si parla assai di a quistione di l’educazione è di u sistema educativu. E statistiche internaziunale paleanu una calata di u livellu di i zitelli. Si parla di a vultata à i metudi tradiziunali, di u ritornu di l’auturità. I prugrammi di u primariu anu da cambià. À contu vostru, induve hè u prublema ?

U nostru sistema d’educazione spicca e discipline di modu naturale o arbitrariu. Sta manera di funziunà scumparte è spicca settori di cunniscenza. L’ecunumia hà mezi di calculu putenti assai ma e so previsione, di modu generale, sò sbagliate è riaghjustate à sicutera. Ùn hè chjosa l’ecunumia. Hè scritta in un cuntestu umanu. Fatt’è fine chì e nostre cunniscenze custituiscenu un tippu novu d’ignurenza, una dotta gnuranta. Eccu ci in pettu à una cecità nova nova per via di a strema cumplessità di a realità. A cumplessità vole dì « tesse inseme ». Per pruvà à capì ciò chì si passa, ci vole à capì ci chì s’hè passatu.

Ci vole dunque à intruduce temi novi ind’è l’educazione. A scola ùn ampara micca à i zitelli, ùn li dà micca l’attrazzi da risponde à sta quistione : « cosa hè esse umanu ? ». Tutti i sapè sò spergugliati in una mansa di particelle è di scagnucci incapaci à spiegà u tuttu. Dopu, ci vole à schjarisce e leve nove nant’à u prucessu di mundialisazione chì scambia u pianeta dipoi u 15u seculu. U terzu puntu cuncerna l’incertezze. Ci vole à amparà à dà ci capu è à fà ci fronte. Ùn hè a scenza ella stessa chì integra oghje tante è tante incertezze ? Eppò, a capiscitura umana, ch’ella fussi trà e religione, i populi o ancu in u quadru d’una famiglia, hè un antru locu chì l’educazione si deve di visticà. Infine, ùn ci pudemu francà di a sensibilità à u dubbitu, à u sensu doppiu, à l’ambiguità da accustà u prugressu chì ùn ci arreca micca solu affari pusitivi. À fiancu à i prugressi di a medicina, avemu vistu u sviluppu di l’armi. L’industrialisazione hà inghjennatu a pruletarisazione. Spessu, l’azzione ghjunghjenu à u cuntrariu di ciò chì i so ispiratori anu vulsutu. Per accustà i capatoghji fundamentali è glubali, ùn ci pudemu piantà à una formula unica.


Da anzianu resistente, circadore, militante di maghju 1968, qualessu seria u missaghju chì vulete fà passà à e leve nove chì vi stanu à sente ?

Li tocca à fà fronte à e sfide di u mondu oghjincu chì li prupone a miseria, l’incertezza è periculi. Ma attempu, ponu vede chì anu da scuntrà elli e sfide e più maiò chì l’umanità ùn hà mai avutu à affruntà sin’à avà, incù u so risicu di succidu. Quandu elli mi dicenu i giovani chì sò statu furtunatu postu chì aghju avutu una causa maiò à difende, hè vera.

Fattu si stà chì a causa oghjinca hè bella più maiò ma l’indiatura vene più cumplicata. A facenu certi in ONG o associ umanitari, ma sta pussibilità ùn ci hè ancu. Simu in un epica duve, per revuluziunà, ci vole à mantene. Vole si dì chì s’è no’vulemu scambià u mondu, ci vole à fà la partendu da un casale culturale chì ci vole à tene. Bisogna à vulè tene e so radiche tuttu puru pensendu à l’orizonte chì ghjè quellu di u pianeta.


L’indiatura di i giovani, bellu aspessu, vene casticata da a miseria è a sclusione duve elli sò chjappi. Ancu puru s’elli palesanu di modu francu è chjaru, una vuluntà di scambiamentu, pare chì u sistema ecunomicu nutralizessi l’attori senza mancu fà pisà una cuercizione chjara è netta à nantu à elli. Cumu si puderanu indià da arregulà u marcatu o pisà nant’à e scelte demucratiche mentre a so integrazione dipende di a so participazione è d’una certa manera, di u so sustegnu à u sistema attuale ?

Più si sviluppa u pesu di u marcatu, più averemu bisognu d’un ritornu à a putenza publica. À rombu d’accresce a centralisazione, multiplichemu i danni in a pupulazione. Pigliu quì l’esempiu di l’uspitali chì vulemu caccià da e nostra campagne. Bisognu à rivitulisce a pulitica. Per disgrazia, i partiti pulitichi ùn la facenu micca, è peghju, ùn la facenu mancu à pensà chì si puderebbe fà. Per contu meiu, sò un individuu. A mi provu d’insignà micca una suluzione ma una strada. A sapite chì quandu ella hè secca a terra ùn ci spunta nisunu fiore. In Francia, ùn ci hè nunda chì spunta. Ùn si sà mai, ci vole à sperà quantunque postu chì affari belli incerti sò digià accaduti in a storia…