Sò quattru l’amichi ad avè decisu di mette in sesta issu viaghju ricordu. Silvia Casalta, Stella Castela, Ghjuvan Petru Defendini è Pasquale Valentini, tutti guide interprete, appassiunati di Storia, innamurati di u so paese, anu purtatu una cinquantina di persone in Londra, nant’à i passi di Pasquale de’Paoli. Ci contanu cum’ella hè venuta l’idea d’issu viaghju.

A Nazione : Perchè avete sceltu d’andà in Londra pè u ricordu di u bicentinariu di a morte di Pasquale de’Paoli ?

À u principiu hè un’idea è un sognu di Ghjuvan Petru. Eranu dui anni ch’ellu ci ne parlava. È un ghjornu ci simu adduniti in un caffè di a piazza San Niculaiu, in Bastia è ci simu detti, perchè nò ? Eranu digià numarose e ceremonie previste in Corsica. Avariamu pussutu dinò andà in America, induv’ellu ci sò parechje cità avendu un raportu incù Pasquale de’Paoli.

Ma, hè in Londra chì Paoli hà vissutu 33 anni. Più di un terzu di a so vita ! Tandu, emu decisu di fà stu viaghju nant’à i so passi, pè circà à capì cumu fù a so vita, à quale scuntrò, cum’ellu fù ricevutu, qual’esse funu e so gioie ma ancu i so guai. Era ancu un mezu per noi di ringrazià l’Inglesi chì, dui seculi fà, avianu accoltu u babbu di a nostra patria.



A Nazione : Hè statu difficiule d’urganizà issu viaghju ? Avete avutu aiutu sopr’à piazza ?

U più difficiule fù d’avè l’autorisazione di Westminster di pudè fà una ceremomia ufficiale intornu à u bustu di Paoli è di a lastra di u ricordu.

Per noi, era u più impurtante è avemu urganizatu u viaghju intornu à st’avenimentu. Emu decisu di fà una cunferenza nant’à a vita di Paoli in Londra è di visità issa magnifica cità in carru incù una guida. Eppò issu prugettu ci hà permessu d’esse in cuntattu incù l’associu di i Corsi di Londra. Ci anu aiutatu pè truvà a ghjesa pè u cuncertu pulifonicu incù u gruppu “Barbara Furtuna”. Emu scuntratu qualchì persona di l’associu chì sò vinuti à participà à u ricordu in Westminster è à u cuncertu pulifunicu ind’è a ghjesa taliana di Saint Peter’s. Speremu chì questa leia ùn si tagliarà micca è chì avaremu u piacè di scuntralli torna, per d’altre occasioni.

In Corsica, parechji anu trovu u prugettu interessante, ma quelli chì ci anu aiutatu sò pochi numarosi. U nostru sintimu era chì a maiò parte di e ceremonie eranu furzate. U nostru scopu era di caminà drittu, di fà issu ricordu incù u nostru stintu è u nostru core.


A Nazione : Chì fù per voi u core di stu vaghju ?

Quandu u Diu Vi Salve Regina hà ribumbatu sottu à e volte di Westminster.

Era una stonda d’emuzione tamanta. Di sente e magnifiche voci di u gruppu Barbara Furtuna à e quale si sò aghjunte quelle di Ceccè Buteau è di Ghjuvan Antone Orticoni era una maraviglia. Ci hè scappatu u pientu ! Eramu tutti cumossi. Tandu, hè statu cumu un scaricu chì ci hà fattu piglià a vera dimensione di l’avenimentu. Emu avutu un privilegiu maiò è ne simu cuscenti.

Simu stati ricevuti ufficialmente in Westminster, un locu « santu » per l’Inglesi. È soprattuttu, emu pussutu cantà u Diu vi Salvi Regina, à fiancu à Paoli. Nimu ùn hà mai avutu u dirittu di cantà quì, hè riservatu solu à i curisti di l’abbazia. Era propiu un mumentu unicu.

Eppò c’era u cuncertu pulifonicu ind’è a ghjesa Saint Peter’s. Vulariamu ringrazià i cantadori di Barbara Furtuna, chì ci anu datu una stonda di grazia, tutti adduniti, Corsi, Inglesi è ancu Taliani, per stà à sente ste voci trimende chì ci anu colmu di felicità.


A Nazione : Cosa vi hà purtatu stu viaghju ?

A Storia di Corsica è di i Corsi appartene à tutti. Oghje, hè impurtantissimu di purtalli un interressu maiò, di difendela. Per micca lascialla more, per pudè trasmettela è custruì un avvene fattu di ciò chè no’ simu. Stu viaghju ci hà permessu di mustrà chì in Corsica, incù i Corsi, si pò fà cose tamante.

Ringraziemu à tutti quelli chì ci anu fattu l’onore tamantu di vene in Londra per issu ricordu.

Pinsemu digià à u prossimu viaghju, incù lu stessu scopu : scopre è fa scopre pagine di a nostra Storia.