Un si po mentuà Canta u Populu
Corsu senza fà a leia incù u
riacquistu è u bisognu di libertà
di a ghjente di Corsica.
Issu puntellu maiò di a nostra
cultura hà di fattu a so piazza
indè u nostru ghjurnale chì
prupone di vede l’andatura passata
è à vene di Canta u Populu
Corsu.
A Nazione : cumu hà principiatu Canta ?
Canta u Populu Corsu : Canta hè natu di un bisognu
di ritrovà i nostri canti, a nostra manera di
cantà, di sprimesi, in core. Ghjè statu è ghjè sempre
un omaggiu à a nostra mimoria cullettiva, d’un
ricusu di a sustituzione di a nostra cultura per un’altra.
Nò chì a nostra sia megliu o prepudente, mà
ghjè a nostra è ci tenimu. Porta in ella tutti nostri
malanni, i nostri strazii, i nostri affanni, ma ancu e
nostre gioie, e nostre sperenze, e nostre credenze.
Sò e nostre radiche, è senza radiche l’arburu, u
fiore, o puru l’omu , ùn ponu campà.
Hè quantunche un nome stranu, pretenziunutu
ancu : Canta u populu corsu ?
Un ci vole micca à piglià u nome di u gruppu cum’è
una manera di imponesi. Avimu vulsutu fà vede è
toccà chè no’ simu di tutti è chì tutti facenu unu. I
cantadori è musicanti venenu di tutta a Corsica, i
cumponitori dinù è di listessa manera quelli chì ci
porghjenu aiutu.
Tutti quelli chì sò passati à Canta u Populu Corsu
anu fattu chì u gruppu si hè nutritu d’issa ghjente,
sò passati, sò stati, per certi sò vultati, d’altri vulteranu.
In realità nimu ùn hà mai lasciatu à Canta…
tutti quelli chì ci so stati anu scrittu una pagina chì
si pò leghje ò stà à sente. Canta hè di tutti, per tutti,
hè fattu di noi altri chì speremu un avvene di luce
per i nostri figlioli.
Vuliamu fà in tutte e pieve, in tutti i paesi, generu
d’accolte di cantu, scole è soprattuttu scambii. Ci
hè tantu da fà per ritruvà i nostri fundamenti è al di
là, una manera cumuna è sulidaria di fà di u cantu
un attu di rivendicazione è d’avvene.
E pò ramintemu chì Canta u Populu Corsu hè natu
à l’orlu di l’evenimenti d’Aleria. Ci era statu tante
ghjente imprigiunate per avè sceltu a LLN è u
Fronte per manifestà u so esse è a so rivolta, chì
un’addunita s’era fatta ingiru à u nostru gruppu.
Aviamu tandu una missione di sustegnu. Giravamu
a Corsica, d’un paese à l’altru, senza mai piantà.
Eccu ciò chì spieca u bisognu di Canta u Populu
Corsu à l’epica. Bisognu sempre vivu anc’oghje,
forse ancu di più.
Canta, gruppu di cantu o gruppu militante ?
I dui. Militante di sicuru, ancu s’ellu ùn hè micca
ind’u sensu puliticu strettu (l’inglesi dicenu
« street » mentuandu l’idee corte, micca sugellate).
Militanti umanitarii dinù. Per i figlioli di u nostru
populu chì anu sceltu una via o chì sò incarcerati
senza raggiò, dumandemu una ghjustizia ghjusta.
Una ghjustizia chì sia a listessa per tutti, nè più nè
menu. Avimu fattu tuttu per chì Ghjuvanni Castela
è Vincente Andreuzzi sianu ghjudicati cum’ellu ci
vole. Un simu micca noi chì l’avimu fatti esce dà
prigiò, ma ci avimu participatu, à a nostra manera,
cù u nostru cantu.
Avà si pone à mezu à tanti altri casi u prucessu di
Yvan Colonna. I media ne parlanu assai è più. Una
volta di più seremu sulidarii per rivendicà una
ghjustizia ghjusta. Un Prefettu hè statu tombu – dispiace,
a vita di l’omu hè sacrata – ma a ghjustizia
deve esse ghjusta. Femu una campagna di signature
in Corsica è in altrò, nò per chì Colonna sia liberatu,
ma per dumandà ghjustizia. Micca di più… nè
di menu.
Cumu cuntate di travaglià à l’avvene ? In Corsica
ò al di là di e fruntiere ?
Femu sempre e nostre serate di statina in tutta a Corsica. Qualcuna d’inguernu dinù, è pò simu chjamati
fora di Corsica. L’invitu vene da u Paese Bascu,
da u Jurà, da e grandi cità di Francia, e grandi scene
cum’è u Bataclan ò l’Olympia. Tutti lochi induve
avimu l’opportunità di purtà u nostru missaghju è e
nostre sperenze.
Avite dettu sperenze, dopu tant’anni chì cuntate di
cambià ?
A sperenza d’una vita più bella indè noi, d’un altru
campà, più umanu. In armunia. Ci vole à ammaestrà
u prugressu, fallu nostru per chì a nostra ghjuventù
si ricordi di a storia di u so populu. Ci vole à fà chì
issu progressu sia à prò di l’omu. Senza scumbugliu.
Rende l’omu è l’umanità migliori.
A Scola di Cantu è e scole di corsu, duve ne site ?
A scola di cantu di Natale Luciani si mantene per u
megliu in Aiacciu. Ma fora d’Aiacciu ci hè pochi
affari. Per e scole di corsu, ghjè tutt’un’altra
dimarchja, ma avimu sperenza di riesce stu scopu
maiò chi mette in ballu assai strutture è organisimi
diversi, in Corsica ma soprattuttu fora di Corsica.
Avete sceltu una manera diceremu moderna di
cantà nantu a scena, incù batterie è lumi tanti è
più, perchè ?
Eccu. Simu nantu una scena, ci vole à fassi sente, è
esse capace di fà parechje serate. E poi ci sò giovani
indè a struttura è ind’è u publicu. Ci vole à tenene
contu. Ma diceremu chè micca più tardi chè l’annu
passatu, in Paese Bascu avimu cantatu ind’una chjesuccia,
à cappellà. Una sperienza rinuvellata à u
Jurà sguizzeru. Pudimu fà tuttu, ma per u rispettu di
u publicu simu chjamati à mudernizà a furmazione.
Ùn sò micca ghjustificazioni d’un fattu, ma una
scelta cullettivamente assumata.
DISCOGRAFFIA
Eri, oghje, dumane.
Libertà.
Canti di a terra è di l’omi.
A strada di l’avvene.
Chjamu a puesia.
Festa Zitellina.
Théâtre de la Ville.
C’hè dinù.
Sintineddi.
In Cantu.
Memoria.
Rinvivisce.
30 anni Giru 2003.
U dischettu è u DVD di u Bataclan.
È prestu un dischettu di canzone nove,
escerà versu Natale.
E DATE DI I CUNCERTI
In previsione :
Nizza, Tulò, Liò, Pariggi : u Bataclan
DI LUGLIU
4 Calvi
5 Cervioni
8 Corti
9 Mavella
11 Patrimoniu
12 Favona
15 Loretu di Casinca
17 Aiacciu
