Issu massicciu di
muntagna mezana chì
hà i pedi in l'acqua salita
ghjè un esempiu è un
paradossu. U caratteru
salvaticu di a so natura
cuntrasteghja incù una
densità di porti è
aeroporti senza paru
nantu à u cuntinente.
Contanu pocu, u
numaru è a qualità di i
so lochi pruttetti
(esempiari, ne riparleremu)
quandu si vedenu
certe pratiche (mancanza
di una vera filiera di trattamentu
segliativu di i ghjetti) è certi prugetti.
Durente anni è anni, a Corsica hè stata un
esempiu : Cumu hà pussutu, un territoriu cusì
chjucu nantu à i piani geograficu è ecunomicu,
mette in ballu duie riserve marine (Scandula è e
Boche) chì, in generale, viaghjanu bè ?
- Cumu, da quellu storicu GR 20 à u Parcu Naturale
Regiunale, l'impurtanza di a quistione di l'ambiente
s'hè trasfurmata in prugetti territuriali cuerenti ?
- Perchè, è cumu, u populu corsu hà sappiutu
apprupiassi a bellezza è a richezza di ciò chì d'altri
chjamanu u " paisagiu ", sin'à dà à quelli chì anu u
putere a vuluntà pulitica nicessaria à a creazione di
tale strutture ?
Oghje ghjornu, certi ci parlanu di prugetti tamanti,
chì anu i so fondi nantu à visione sceme. Ci hè da
pensà chì ci hè un sbagliu in qualchì locu, chì tuttu
què ùn hè chè una pazzia chì hà da esse abandunata
Di cosa si tratta ?
Certi grandi sapienti anu calculatu - è imbrugliatu i
sciffri per ghjunghje à sta previsione : da quì à 2015
(vale à dì dumane…), a Corsica hà da vede a so
frequentazione turistica (segiorni o passagii)
triplicata è ci vulerebbe, d'apressu à i nostri "
esperti " cummincià à appruntassi nantu à u pianu
di l'infrastrutture, ma cume ci vole ! Dunque a
creazione di un novu portu in Bastia (unu di più…)
s'impone cum'è un' evidenza, una imperiosa necessità
chì permetterà di riceve, incù una più grande
regularità, di più " ferries ", di più vitture, di più
camiò. È tandu risorte quellu serpu di mare di u
curridore stradale Italia Maghreb.
6 milioni di turisti in Corsica ? U doppiu di a
populazione di Parigi chì visiterebbe un territoriu
cumpostu di 80% di muntagne, pruvistu d'infrastrutture
previste per i so 270.000 abitanti, è micca
di più. Senza esse un capone è senza avè fattu alti
studii, basta à esaminà a reta stradale o a situazione
di certi ospitali per custatà chì, dipoi un bellu pezzu
" l'investimenti ùn seguitanu più ", per dila di modu
muderatu. Di listessa manera, ci parlanu d'un incineratore.
In primu locu, si sà chì issa technica ùn hè
chè a versione " technulugicamente è technucraticamente
curretta " di quellu vechju " rumenzulaghju
chì brusgia ". In secondu locu, ghjè à pocu pressu à
u livellu zeru di a dimarchja di valurisazione è di a
riqualificazione di i ghjetti, è dinù à u livellu zeru di
l'imaginazione. Ciò chì ci proponenu serebbe, ben'
intesu, l'ultimu mudelu (hè prumessa, senza diossina,
ma classificatu quantunque " Seveso ", chì ùn
si sà mai !) ma averebbe una capacità di trattamente
sprupusitata di pettu à a realità attuale, ancu
tenendu contu di l'evoluzione previdibile di a notra
produzzione di ghjetti.
Perchè un tale gigantisimu ?
- Ùn cunsidereghjenu micca, i nostri grandi planificatori,
chì u triplicamente di a frequentazione di
l'isula ghjè digià una cosa sicura ?
- Ùn puderebbe micca diventà, a Corsica, impurtatrice
di ghjetti ? Quandu si sà a difficultà di l'Italia
di u Sud à trattà issu prublema (ne manda una parte
di in Rumania è in Polonia) pone issa questione ùn
hè micca soladimente una custruzione intelletuale o
un scherzu…
Tutti issi prugetti, in più di e so cunsequenze nantu
à u pianu di l'ambiente, ùn ponu chè purtà scumbuglii
suciali, ecunomichi è culturali. Hè per quessa
chì, più chè mai, ci vole à dumandà à i Corsi :
- cum'elli vedenu u so avvene ;
- chì strada di sviluppu volenu piglià : balearisazione
o prugetti pigliendu parte à logiche territuriale
è di sviluppu durevule.
Senza un dibattitu publicu è una spertizia indipendente,
si pò teme chì a Corsica, chì sin'à avà hà fattu
vede u megliu, ùn abbia un ghjornu chè u peghju à
prupone.
Stéphan BEAUCHER
Respunsevule di "Campagne Océans"
Greenpeace France
