Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 12, Ferraghju di u 2008


Alta Frequenza

À u serviziu di a Corsica dapoi 27 anni



À u principiu piccula radiu aiaccina, Alta Frequenza hà sapiutu tene è ingrandà malgradu a cuncurrenza è e difficultà. Oghje a stazione s’hè sviluppata è diffusa in a Corsica sana. Ancu megliu, e so emissioni è infurmazioni si ponu chjappà nant’à internet è cunnoscenu un bellu successu. Avemu postu qualchì dumanda à Frédéric Bertocchini, dirigente di a radiu è giurnalistu…

Frédéric Bertocchini, ci pudete presentà à Alta Frequenza per quelli ch’ùn cunnoscenu sta radiu ?


Alta Frequenza hè nata in Aiacciu in u 1981, l’annu induve fù liberata a banda FM da François Mitterrand. Di stu fattu, Alta Frequenza hè oghje a più vechja di e radiu corse, postu ch’ella entre inde a so vintisettesima annata. U scopu di a radiu era à stu mumentu precisu di a nostra storia, di dà a parolla à quelli chì ùn l’avianu forse micca è di participà à a so manera à u Riacquistu. A diffusione di canzone corse nant’à l’onde radioffoniche era, à l’epica, un attu militante forte. À pocu à pocu, Alta Frequenza hè crisciuta è hè diventata un media indipendente è ricunnisciutu chì funziuneghja cum’è un’intrapresa. Oghje, a radiu campa sopr’à tuttu di e so risorse publicitarie è hè diffusa nant’à sei frequenze in a Corsica sana (Aiacciu, Bastia, Calvi, Corti, Portivechju, Bunifaziu). Avemu una squatra d’animazione, ma dinù cummerciale. In quant’à a redazzione, hè cumposta di parechji giurnalisti prufessiunali chì anu a so carta è prupone una visione di l’attualità corsa cumpletta assai. Alta Frequenza hè diffusa 24 ore nant’à 24 è tutti i so prugrammi sò realizati in Corsica.


Chì sò l’emissioni maestre ?

Alta Frequenza hè una radiu detta “generalista”, chì realizeghja di più in più di talk, vale à dì emissioni parlate. L’emissioni impurtanti sò “Palisà” (u mercuri à dece ore è mezu) chì ci permette d’entre in l’intimità d’una persunalità chì appartenga à u mondu puliticu, assuciativu, culturale o spurtivu. “C’est le foot”, ogni luni trà sett’ore è ott’ore di sera addunisce tutti l’amatori di ballò è di e squatre corse. D’altre emissioni cum’è “Corsic’Associu” o “Alta Frequenza in Giru” sò l’occasioni di mette in luce associ corsi o gruppi culturali isulani. Avemu dinù emissioni fatte da studianti di l’Università di Corsica, trè sere à settimana, “Studientina”, senza scurdassi di l’emissioni temàtiche musicali “Rock Alive”, “Hè un’isula”, “On the Road” o magazini d’infurmazioni cum’è “E Nutizie di a Settimana”.


Ci hè un publicu particulare ch’è vo circate à tuccà ?

Ùn circhemu micca età precise, ancu s’è no ci truvemu in un furmatu dettu “giovani adulti”. Tucchemu in particulare i 25-45 anni, senza chì sta data sia sticchita. In realità, circhemu di tuccà sopr’à tuttu auditori corsi, primurosi di a so isula è di a so cultura, è dinù tutti l’innamurati di a Corsica. A radiu hà un’identità forte.


Alta Frequenza hà 27 anni, qualessi sò i mumenti forti ch’è vo ritenite ?

Fà campà Alta Frequenza durante vinti sette anni, senza suvvenzione, simpliciamente cù risorse publicitarie fù una cosa assai difficiule. Fendu parte di a generazione nova d’Alta Frequenza, aghju qualchì difficultà à risponde à sta dumanda.

Diceraghju chì i grandi mumenti fubbenu : u passagiu da u benvulè à u prufessiunalisimu cù l’apportu di a publicità ver’di u mezu di l’anni ottanta. U sviluppu di a stazione in Corsica sana ferma di siguru un mumentu forte. Bastia à a fine di l’anni ottanta, eppo’ Corti à a fine di l’anni novanta, è infine Portivechju, Calvi è Bunifaziu in 2007. Si ponu ritene dinù tutte l’attività in giru à a radiu, cum’è l’organizazione d’evenimenti impurtanti ch’è no’ multiplichemu da qualchì annu. À u filu di l’anni è di a so storia, Alta Frequenza hè diventata, d’una certa manera, un’istituzione chì hà permessu d’assigurà u so funziunamentu.


A vostra radiu face una gran’ piazza à e canzone corse, pè a lingua à chì ne simu ?

A lingua corsa hà una piazza maiò nant’à a nostra antenna, vistu chì 30% di a nostra prugramazione hè cunsacrata à a canzona corsa. U bislinguisimu hè assai presente, postu ch’è no’ avemu emissioni d’animazioni realizate pè una gran’ parte in lingua corsa u dopu meziornu (“L’incantu di l’onda” da quattr’ore à sett’ore), ma dinù ripurtaghji è interviste diffusate in corsu. A lingua corsa hè dinù presente assai in “Studientina” è d’altri prugrammi. Oghje, u nostru “habillage antenne”, vale à dì jingles, sò anch’elli bislingui. Hè dinù più ch’è pussibule chì in i mesi à vene l’habillage novu sia à 100% in corsu.


Cumu vidite l’avvene d’Alta Frequenza ? Chì sò e vostre brame, pruspettive di sviluppu ?

Alta Frequenza hà sappiutu tene capu in a nostra isula à parechje radiu cuntinentali chì in realità ùn sò ch’è punti d’appoghju di cummunicazione publicitaria. A cuncurrenza hè sempre più forte.

Purtroppu, cùn l’autenticità di i so prugrammi, a vicinanza cù i so auditori è a pertinenza di e so infurmazioni, Alta Frequenza hà cuntinuvatu à campà è ancu à ingrandà. Nant’à u cuntinente, e radiu regiunali cum’è a nostra sò guasi tutte smarite.

Ùn sò ch’è e più strutturate, e più solide chì anu tenutu. A mo brama saria di fà chì stu media indipendente in Corsica cuntinuvessi à spannassi in l’isula, ma ancu al dilà. Francamente, pensu, à u risicu di passà per un pretensiunutu, chì a Corsica hà bisognu d’Alta Frequenza. In quant’à u sviluppu, si realizeghja da per ellu cù a zona di diffusione chì si stende. Avemu oghje l’ambizione d’emette in a regione PACA, ma sin’à avà tutte l’autorizazioni di u CSA ci sò stata ricusate.

Custattemu ch’ellu hè assai faciule per una radiu cuntinentale di vene à stallassi in Corsica, è ch’ellu hè assai difficiule per una radiu corsa di fà u caminu in l’altru sensu.


Cù l’emergenza d’internet i media tradiziunali sò scuzzulati... Chì cambia per voi ?

Internet ùn hà micca purtatu tortu à Alta Frequenza. À u cuntrariu ! Assai in furia, avemu capitu chì stu novu mezu di cummunicazione pudia cuntribuisce à u sviluppu di a nostra radiu. Hè per quessa chì subbitu in u 1999 avemu firmatu una cunvenzione di partenariatu cù a Sitec per chì i nostri prugrammi sianu presenti nant’à internet. Stu partenariatu fù dinù l’occasione di lancià una web radio 100% canzone corse chì si chjama “Alta, Canzona Corsa”, chì si pò ritruvà nant’à www.alta-frequenza.com.

Sta web radiu esiste dapoi più d’un annu è cunnosce un gran’ successu. Oghje, Alta Frequenza conta circa 2.000 auditori per ghjornu nant’à internet, hè tremendu. È stu numeru cresce ogni mese. A maiò parte di st’auditori sò quelli di a diaspora. Sò dunque quelli ch’è nò ùn averiamu pussutu tuccà sì internet ùn esistia micca.