In issa annata di
cummemurazione di
a morte di Pasquale
Paoli, ci pare impurtante
di ramintà chì, trà
mezu à i numarosi libri
scritti nantu à u Babbu
di a Patria, in lingua
francese è in talianu, ci
n’hè unu scrittu in lingua
nustrale, u «
Pasquale Paoli è a
Rivuluzione di l’89 »
di u ben di Andria Fazi.
Ghjè dinù l’occasione
di rende umagiu à issu
militante di prima trinca di a cultura è di a causa
corsa. Fù elettu à l’Assemblea di Corsica induve
nimu ùn s’hè scurdatu d’ellu. Quand’ellu hè mortu,
in 1989, u Presidente di l’Assemblea, Ghjuvan
Paulu di Rocca Serra, hà prupostu di crea un
« Premiu Andria Fazi ». Issu premiu hè rimessu
tutti l’anni à i giovani chì anu avutu e note più alte
in lingua corsa à u baccaloreatu. U « Pasquale
Paoli » di Andria Fazi hè una opera maestra. Incù a
so lingua linda, a so cultura è a so cunniscenza di a
nostra storia, l’autore ci parla di a Corsica di l’89, di
Bonaparte, di Paoli è d’Elliot… Schjarisce dinù uni
pochi di punti storichi induve d’altri anu purtatu a
cunfusione. Eccu ciò ch’ellu scrive nantu à quellu
famosu dicretu di 1789(1) :
« Di istu dicretu di u 30 nuvembre, tuttu un currente
storiograficu hà vulsutu fà ne, l’attu d’integrazione
« definitivu » di a Corsica à a Francia,
un attu chì avaria scatinatu in tutta l’isula feste è
manifestazioni populari di gioia. (…)
U simplicisimu di simule affirmazioni avaria da
esse evidente. Quale eranu i riprisententi di a
Corsica à l’Assemblea ?
- Per u cleru, Carlu Antone de Peretti della Rocca,
un nobile.
- Per a nubiltà, u Conte Matteo di Buttafoco, maresciale
di campu di l’armate di u Rè, fattu da questu,
conte è pruvistu in terre è in soldi, per prezzu di u
so tradimentu di u 1768.
- Per u terzu statu, Cristofanu Salicetti avucatu à u
Cunsigliu Superiore, è u conte Petru Paulu Colonna
di Cesari Rocca.
Eranu stati eletti in Bastia, è micca senza cuntrastu
(l’elezzione durò più di quindeci ghjorni) da ottanta
quattru « diputati di e ghjuridizzioni », tutti scelti
da l’autorità frà i sgiò, è duv’elli si truvavanu quasi
tutti quelli chì avianu benefiziatu di l’editu d’annubilimentu
di u 1770. È di più, a scelta fatta, era
stata dopu sottumessa à u guvernatore per accittazione.
In fatti, quessi i riprisentanti eranu tutti
“figlioli di a cunquista è privileghjati selezziunati di
l’occupazione”2. »
Tuttu hè dettu.
Ghj. G. Talamoni
1. Pasquale Paoli è a Rivuluzione di l’89, La Marge
édition, Aiacciu, 1989, p. 62.
2. Quì, nota Andria Fazi : « Vede Pasquale
Marchetti, Une mémoire pour la Corse. »
