Hè un prublema di fondu l’assestu di u territoriu.
Moltu più per un isula muntagnola
cum’è a nostra. Tempi fà, a creazione di a
Terra di u Cummunu hà permessu l’articulazione di
l’attività agricule è pasturale. S’hè intrecciatu u
liame à a terra è à a so pruprietà incù u liame suciale
trà i paisani, a so dignità è u so travagliu.
A fine di stu sistema di scumpartera di a terra, incù
a calata di l’attività agro-pasturale, u sviluppu di u
turisimu è di i trasporti, hà inghjennatu una situazione
di cunflittu, dipoi a messa in valore di a
piaghja d’Aleria, à prò di i pedi neri, è ch’elle sò
spuntate e prime scimizie immubiliare. Omu sà
cum’elle sò state accolte da i Corsi...
Eppuru, a quistione di a terra ùn hè ancu sciolta. Hà
pigliatu un antru versu dipoi dece anni incù a multiplicazione
di a custruzzione di case secundarie è a
crescita di i valori immubiliari.
Segregazione vulsuta è patuta
Quale ùn la sà ch’elli sò cullati i prezzi di u bastimentu
? In quattru è trè sette, a Corsica hà rimpattutu
u so « ritardu » nant’à i prezzi di e cità francese.
Per tene un alloghju, a ghjente s’indebiteghja
per vinti cinque o trenta anni. D’altri, ùn ponu più
cumprà è si ne stanu in HLM, in cità o in paese, à
fiancu à case è casoni chì spuntanu sempre di più.
Quessi, sò sempre chjosi è ùn sò nostri, sò per
quelli chì tenenu caru à a Corsica è à a so chetudine.
A multiplicazione senza limitu di case secundarie
hè dunque un prublema suciale perchè crea lochi di
« ghetto », azzeca dinù a ghjelusia è u rancore.
Invece di prumove l’integrazione di pupulazione
nove, accresce a segregazione vulsuta di i più favurizati
è quella patuta, imposta à a so mani d’opera,
per u più magrebina o purtughesa, chì tene impiegatelli
lasciati da i corsi. Per falla à l’accorta,
omancu trè mondi chjosi campanu unu à fiancu à
l’altru, spessu unu in pettu à l’altru1.
A vendita di a terra :
suluzione o palliativu
A custruzzione di ste case secundarie hè una cunsequenza
di u prublema ecunomicu è stituziunale.
Compranu i furesteri perchè i Corsi anu bisognu di
i so soldi, à quandu per campacciulà, à quandu, ci
vole à dilla dinù, per manghjà si u casale di l’antichi,
in quattru è trè sette fendu a spacca. Di e volte,
si vende à furesteri invece di vende à un corsu per
ghjelusia.
À certi, li si pare chì a vendita hè una suluzione à
longu andà ma hè solu un palliativu perchè i so
figlioli ùn averanu mai abbastanza soldi per cumprà
si una casa in un paese duve ellu colla sempre di più
u valore di a terra. Quandu a fame tocca, ancu u
pane pare torta…
U valore di a terra ùn face
ricchezza
Sta suluzione pratica à u prublema ecunomicu chì
cunsiste à vende una parte di u casale inghjenna
l’affaccata d’industriali furesteri. Si buscanu quì un
pezzu di paradisu. Subitu dopu, sò elli chì tenenu
l’artisgiani di u paese postu chì sò i soli à pudè si
stallà è dà li u travagliu. Ogni ghjornu, si manghjanu
un pezzu di « parmigiano » talianu perchè u
casgiu corsu, à quandu ùn lu ponu più cumprà, à
quandu ùn ci hè più. Oramai, l’industria di a
Corsica, più chè a bellezza di i so lochi, hè u silenziu
di i so paisoli è di i so paisani. Certi scalaticci si
lagnanu ancu di u tazzu ch’elle facenu e campane2
! Aiò, ùn hè a paghjella ma u silenziu chì
l’incanta !
A dualità di l’ecunumia
è di l’istituzione
U sbagliu di i puliticanti tradiziunali hè di vede ecunumia
è stituzione cum’è s’elle fussinu un dualisimu, duie cose spiccate. Invece, sò intrecciate assai
è si tratta di dualità. Quellu di i naziunalisti hè d’avè
incalcatu troppu nant’à u versu simbolicu di l’istituzione
fin’à fà perde di vista à u populu e so funzione
ecunomiche è pratiche ind’a vita ghjurnalaghja.
Spustatu chè n’avemu u nostru sguardu nant’à e
strutture suciale, vidimu avà un ecunumia abbambulita
da u Statu pruvidenza francese ma dinù di a so
scaduta3, da u clientelisimu lucale, da u pocu d’ambizione
è di u laziu di e ghjente, da e banche rancicone,
da u mitu o da u racontu chì mintuveghja a
riescita suciale di u ladrone in pettu à i strazii di i
travagliadori…
Sò elli chì ci vole à difende. L’agricultori ùn ponu
più tene o cumprà terre da stallà si per via di a speculazione.
In quantu à l’artisgiani, travaglianu è si
ne stanu ind’è i paesi per via di ste pupulazione
nove è furtunate. Hè u fattu d’un determinisimu,
d’una custretta suciale più chè una scelta libera s’è
tanti giovani si voltanu versu l’amministrazione. À
l’agrottu di a ricchezza ch’elli sò, impiegati è funziunarii
ùn anu abbastanza mezi per indià si di più
ind’a vita ecunomica è purtà prugetti innuvanti. Ùn
hè colpa à u so ADN s’elli sò pocu asgiati incù l’intraprese
i corsi. Fora, anu riesciutu è bè…
Cuscenza, discorsu è pratica : hè
l’ora di a scelta pulitica
Femu la finita incù l’incantazione anzianotte nant’à
a cuscentisazione di e ghjente. A risposta à u capatoghju
di e case secundarie è di u fundiariu di modu
generale hà da vene da tutti, ind’i fatti. Dì chì ùn ci
vole micca vende, quessa pò ùn basta. Si sà chì u
patriuttisimu discursivu vene prestu scarpighjatu da
a pratica liberale è da a luce di duie baiocche. Micca
fola ma stalvatoghju, certe ghjente imbarettate
naziunaliste vendenu ancu elle à furesteri…
Hè l’ora di a scelta chjara d’un prugettu puliticu.
Simu ghjunti à « li punti stremi ». Ùn ci hè pesciu
senza lische. E risposte à u particulare di a terra, sò
da visticà da e parte di a nostra reazzione à a mundialisazione,
à l’individualisimu è à l’eculugia4.
S’ella si vende torna a terra, i Corsi, da populu, anu
da sparisce. Hè a Corsica sana chì serà « orfanella
di stu mare5 »… Mentre s’omu mette in ballu unepoche
di misure pulitiche cunnisciute è appiecate in
altrò, si puderà sperà torna ind’a so salvezza nun
solu per ella ma dinù per a pace suciale.
Ohimè ! Quellu prugettu, serà u PADDUC ? Plan
d’Aménagement pour le Développement Diffus de
la Côte o per a Dissolution Durable des Corses, ùn
anu ancu sceltu ?
Sebastianu QUENOT
1. Cf l’affare di Palasca d’agostu 2007.
2. Idem
3. À sente à Fillon, a Francia sarebbe à paghjolu…
4. GIDDENS A, BLAIR T, 2002, La troisième voie,
Le renouveau de la social-démocratie, Seuil, Paris.
5. Luciani Saveriu., Cavallu, in u dischettu Isula di
Petru Guelfucci o Rinvivì di Canta u Populu
