Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 2, marzu di u 2007



Chjami è rispondi in Pigna

Scontri di l’Improsa e di a Voce incù i pueti di l’Isule di e Baleare



Ind’è u quatru di l’elaburazione di u pianu di sviluppu è di diffusione di a lingua corsa, u Cunsigliu di a lingua è di a cultura corsa di a C.T.C. hà urganizatu in Pigna u 28 di dicembre scorsu una ghjurnata di « scontri di a voce » è di l’impruvisazione incu i pueti e i rispunsevuli di a cultura di l’isule di e Baleare.

Anu participatu à issu scontru pè a Corsica : tre eletti di u Cunsigliu di a lingua è cultura di l’Assemblea di Corsica, u prisidente di u cumitatu scientificu di a lingua corsa é u so rappurtadore, parechji membri di l’Associ Festivoce é a Falce – insignanti di lingua corsa – pueti di Chjama è rispondi, di penna é scrivani.

Pè l’isule di e Baleare quattru pueti, (trè omi é una donna) dui di Mallorca é dui di Menorca, accumpagnati da u prufissore Felip Munar i Munar “ doctor en filologia catalana i linguistica general ”, rispunsevule di u dipartimentu di l’insignamentu à u Cunsigliu di l’éducazione é di a cultura di e Baleare chì dipende di u Guvernu di l’Isule.

Iss’invitatu d’onore, oratore di prima trinca, ind’è à so cunfarenza hà spiégatu cum’elli anu criatu, incù l’impegnu maiò di i pulitichi é di u dipartimentu di l’educazione é di a cultura, scole di furmazione pè inizià i zitelli à l’arte di l’impruvisazione é di u cuntrastu. Ci hà dettu chi i zitelli si sò subitu primurati pè « a glosa improvisada », cum’elli dicenu elli, è ch’elli sò entrati vulinteri ind’è u ghjocu d’ issu modu pedagocicu chi parmette, di passiunassi di sicuru pè à puesia, ma dinù d’amparà à parlà a lingua.

I pueti corsi di Chajma é Rispondi chì anu participatu à l’ottesima « Mostra internacional d’improvisadors » à l’isula di Mallorca i 9 – 10 – 11 marzu di u 2006, si sò resi contu d’issu travaglione é sò stati surpresi di truvà sale piene à tappu cù ghjente chì si sbillicava da a risa in videndu, omi donne vechji é zitelli cunstrastassi annant’à e numaruse scene di Mallorca. Eppò chì publicu passiunatu, per ùn dì furmatu chì seguitava ogni cuntrastu di i « glosadors » lucali o stranieri incù a spiranza di vede l’unu o l’altru inciampà. Cum’ella si passa ind’è noi... L’amicu Felip si hè dettu ottimistu per l’avvene, vistu chì oghje i granelli suminati anu fattu fiori é frutti. Simule scole esistanu in paese bascu é anu listessu successu.

Allora perchè ùn si puderia fanne altre è tantu ind’è noi, pigliendu copia di à so spirienza é di u so modu pédacogicu tuttu in adattendulu à a nostra manera d’impruvisà.

U dopu meziornu si hè trattatu di manera più larga, di u nostru Chjama é Rispondi incù a magnifica cuntribuzione di Petru Santucci, u pueta di i Perelli d’Alesgiani, cuntribuzione à una furmalisazione di u Chjama é Rispondi chì tratta di regule, di pedi, di rime nesche, doppie, nesche mozze, eccetera. Si hé parlatu dinù di l’impurtenza di l’improsa urale chì pò fà esce a lingua corsa da e scole per falla vive in carrughju. Sò stati mumenti di spartera ricchissimi chì aprenu andati novi à seguità se no vulemu ch’elli ùn si tacinu mai, a voce, a rima, u filu, u versu é l’estru di à lingua di Cursichella.

U lindumani u vennari 29 in Casa Musicale di Pigna e voce di i pueti di l’isule surelle di Mallorca, Menorca é di Corsica in « glosa impruvisada » é in « rime fatte à l’estru » si sò imbulighjate per fà Chjama é Rispondi pè u piacè d’un publicu incantatu é numarosu. Stonde sebiate é prelebate é magia d’issa ghjustra orale antica é universale duve u ghjocu hè di tene testa trà dui impruisadori. Maravigliosu é eternu Chjama é Rispondi oghje ch’hè oghje sempre arradicatu ind’è u mediterraniu é ancu sin’à i cunfini di a Russia, induve cum’è quì, l’usu hè di cuntrastà in puésia. Chì furtuna, ma ùn ci vole ch’ellu si perdi !...

Francescu SIMEONI