Un evenimentu à u teatru di Bastia, u quindeci di ferraghju scorsu. « I Chjami » anu fattu un festivale pè i so trent’anni di scena. C’era un mondu scemu, tutte e generazioni ma assai giuventù s’eranu riuniti pè festighjà u ritornu d’issu gruppu, figliolu di Canta u Populu Corsu.

Fecia digià un pezzettu chì ùn i sentiamu più inseme… quì è quallà un cantadore solu fecia u so cuncertu, avianu lanciatu un osteria ò caffè tantu in Calvi chè in Marana… Sperienza à aghjustà a a sperienza !

Eppoi eccucili ! in forza ! à l’anu imburrata ! Testa Mora, affirmazione di sè, nant’à u screnu : e vesture nove tenenu u filu cù a vechja ghjacchetta chì hà tantu purtatu !

Quattordeci canterini, una canterina di trinca (ci sò l’eredi), un orchestru (viulini, contrabassa, ghitare) cù duie donne belle cumè soli chì sunavanu di viulinu, trè donne in scena…i tempi mutanu…s’aprenu e porte…Voci schiette, parulle schiette è i i giovani sò quì, i figlioli d’Anna Rocchi è di Petru Guelfucci.

Musiche di quì è d’altrò : scelta di u jazz, issa musica nata da a suffrenza è da a lotta, spressione di i schjavi neri cacciati da a so Africa nativa. Dopu, annuncianu « jazz manouche », simbulu sempre : i gitani venuti da l’India è chì sò stati sempre messi fora da a ghjente.

U spettaculu cumencia dolce è pianu pianu à misura ch’elli passanu i minuti, colla è s’ingonfia l’armunia.

A presentazione di Paulu Felice Nasica, in maestru di ceremonia, precisa è putente cù a so risetta scherzosa ma sempre curtesa, puntilleghja a sfilarata di i canti : « Guerrieri », « Populu vivu »… Ricordi rapidi di u principiu è poi u populu arrittu, pugnu tesu in segnu d’accunsentu cù u fundiu di a canzona « festighjemu a vittoria, si tratta di u Borgu ! »

E vera à partesi d’oghje festighjeremu torna, cum’è elli, a vittoria !

A ringraziavvi tantu I Chjami Aghjalesi, diceraghju sta sera chè vo site i fratelli di Canta !

Maria Teresia POLI