Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 1, ferraghju di u 2007

A crunichetta di Petru VACHET-NATALI


Version Française
English version

Pan ! Pan ! Cannoni è sugellu (1)



Sti pochi tempi, s’hè amparatu grazia à un grand’ articulu cù ritrattu in culore stampati in “Corse-Matin” chì u sgiò duttore Petru Ghionga, cunsiglieru generale di Corti, incaricatu di i musei dipertamentali, ricerca dipoi parechji mesi varii oggetti è documenti chì anu appartenuti à Pasquale Paoli. Quessa in lu quatru di a preparazione di e cummemorazioni di u bicentenariu di a morte di u Babbu di a Patria.

Tutt’ognunu sà ch’elle principieranu stu 5 di ferraghju ghjornu di a so morte in lu 1807. U sgiò duttore Petru Ghionga hà cusì sappiutu chì dui cannoni di l’armate di Paoli si trovanu innu a sala di i passi è veni di l’anziana merria di a cità di Trans-en-Provence vicinu à Draguignan. Si dice ancu ch’elli tunizeghjanu sempre i ghjorni di festa !

Seria tandu, u signore marchese Louis-Henri de Villeneuve, tenente-culunnellu di u regimentu d’infanteria reale Roussillon chì i si pigliò durente i cumbatti di Patrimoniu è Barbaghju. Quessa si passava in li tempi di « la campagne de Corse » durente u mese di ferraghju di u 1769, quandu Clemente Paoli è l’abbate Francescu- Antone Saliceti invece di fà l’attaccu di i francesi posti in lu paese d’Oletta fecenu cun Pasquale Paoli una disgrazievule operazione ver’di Patrimoniu è Barbaghju ; a quale fiascò.

L’abbate Saliceti d’Oletta, d’altronde, ci lasciò a vita. U generale francese, marchese d’Arcambal cumandava custì parechji ufficiali di u rè « Luiggi Piombu ».

Trà mez’à quelli ; u « Seigneur » Louis-Henri de Villeneuve marchese di Trans si spartetinu ùn sò quantu trufei ! tra i quali i cannoni di i naziunali corsi.

Hè capita, i trufei di guerra sò trufei ! Anu i soi, avemu i nostri ! Ma sempre secondu u sgiò Petru Ghionga, s’ampara chì a fundazione Calvet in la cità d’Avignon, seria in pussessu di u sugellu di Pasquale Paoli ! Pare chì tempi fà, digià, u cunservatore di u museu d’Aiacciu avia fàttu una dumanda à sta fundazione Calvet d’Avignon pè ricuperà stu sugellu à prò di u museu di Corti ma chì questa quì fù righjittata da u cunsigliu d’amministrazione !

Oghje, à l’orlu di e prussime ceremonie si pensa chì l’associi, l’amicale o puru tutt’ognunu, particularu una cria influente di sti rughjoni di Pruvenza si dessinu di rimenu pè’ ricuperà almenu unu di i dui cannoni è sopratuttu u sugellu di Pasquale Paoli. A chjama hè lampata chì l’affare hè d’alta impurtanza. Avà, si aspetta cun grande primura e risposte di i rispunsevuli di e cità di Trans-en-Provence è d’Avignon chì cunservanu sti cari tesori.

Per compie di manera leggera, chjameremu dinù à l’aiutu tutti i nostri amichi di i paesi di U Prunu è quelli di U Monte postu chì in li cannoni si pò dì ch’elli sò esperti…

Perchè tempi fà, l’abitanti di sti dui paesi vulianu una campana è certi li avianu dettu ch’ellu ci era un cannone di bronzu interratu pè ‘ssi lochi. Cusì, s’elli u truvavanu, si putianu fonde una bella campana ! l’anu circatu durente anni prima d’avvedesi ch’elli eranu stàti burlati è ghjucati à a ciantera(2).

Li firmò cusì u cugnome di : I Cannuneri !… Dipoi, ma’ ch’ella sia!… ùn dite mai BUM ! pè sti paesi chì a si piglierianu veramente à a male ! Allora, pè puntellà a nostra leghjittima richiesta, mi vene à mente sta canzona eletturale, a quale serà in breve(3) dinù d’attualità :

« Pan ! Pan ! campane à martellu Rendi la sciarpa è lu sugellu ! »

Ma quì, per l’occasione, si canterà sta parodia di circunstanza :

« Pan ! Pan ! campane à martellu Rendi cannoni è lu sugellu ! »

1. Sugellu: in fr. sceau.
2. Ghjucati à a ciantera : in fr. sujets de risée.
3. In breve: in fr. bientôt.