Si pò cummincià per
un picculu apperitivu
tranquillu, in i caffè
di u Vechju Portu per
esempiu, o quelli di a
Piazza. Ambienza soft
pè principià nanzu a
viulenza di l’isteria di
u sabbatu sera. Si pò
sceglie dinù di tuccà
un bichjeru à u Sax,
unicu locu bastiacciu
induve si ponu sente e
canzone di Carlu
Rocchi o di I Voci di a
Gravona à l’ora di
l’apperitivu, piuttostu
ch’è tutte ste canzone
loundge chì s’assumiglianu
tutte è chì
v’addrumentanu.
Per cuntinuvà, perchè micca
sciaccassi un bichjerinu di
vinu ? Prufittemune chì ghjè a moda.
Quindeci anni fà ùn eranu ch’è i peghju briacunacci
chì s’inturcavanu à u rossu in i caffè. Oghje ancu e
zitelle e più fashion ci si sò messe. Allora seguitemu
u muvimentu ! Ci hè a Cave Salducci à u principiu
di u Carrughju Dirittu o u Zanzibar nanzi di u
Teatru per quessa. Si beie u vinu, ma di manera
classa è in bona cumpagnia.
Ma vene a voglia di cambià d’aria chì avà a serata
s’accelereghja. Siguramente micca in sti caffittacci
di a Piazza : a ghjurnata và bè, ma ghjunta a sera ùn
ci si passa mai nunda. Si pò sceglie d’andà à vede e
facce à u portu di Toga. Ma attenti ch’ellu ci vole à
piglià a vittura è i flicchi ùn anu più a voglia di ride.
Pudete dinù sceglie d’allungà a lista di u club di
quelli chì si sò fatti caccià u permessu. Què dinù hè
assai tendance ! Eppò cusì puderete cuntà i vostri
prublemi cùn l’omi turchini chì v’anu fattu suffià in
u ballò. « E quale simu » ? Dunque in Toga
avemu a scelta, da l’ambienza più giovana di u
Maracana à quella più calma di u Cézanne, da u
Mariana à a Pinta induve ci hè sempre un gruppu
chì animeghja e serate a duminicata. Dopu à essesi
sciaccatu qualchì bieraccia custì, femu a scelta di
vultà in cità. Avà cumminciate à esse rossu imbachericciatu
sott’à l’effettu di l’alcool, da l’aria calda
di i caffè è di a musica chì v’accionca.
Vultemu in cità per vede ciò chì si passa à L’Alba,
nant’à u Quai des Martyrs. Hè quì u locu à a moda
in Bastia. Ne serà forse astrimenti da quì à sei mesi,
ma per avà hè cusì. Tuttu ciò chì Bastia conta di ghjente bè s’hè data appuntamentu quì. Ma fate
attenzione, ci vole à esse vestuti in circunstanza.
Avete interessu à esse vestuti à l’ultima moda di
preferenza cù i vestiti i più cari pussibule. Tantu
peghju s’elli sò goffi, basta ch’elli sianu cari ! O
sinnò vi fidighjeranu di traversu… Eppò nò, di tutte
e manere vi fidighjeranu di traversu quantunque.
Eccuci dunque in u tempiu di a notte bastiaccia, cù
un DJ chì v’infiara a pista è cù una musica varia, di
l’anni 80 è 90 à l’ultimu tube. Dop’à qualchì buttiglia
di johnnie, avà ballate è ughjulate ancu voi
nant’à a pista, appena sbragagliulatu è spettinatu,
ma sempre in piena forma. È si u vostru bichjeru hè
viotu, basta à dumandà à i vostri frat* chì tenenu a
buttiglia di fà u pienu.
Vulite forse andà à piglià appena d’aria è rifiatà una
stonda. Casca bè, U Mercà hè à dui passi. Avete a
scelta, stu locu conta dui stabilimenti rispettevuli,
Le Penalty è u Corsica. Cù appena di liccia ci serà
ancu qualchì canterinu chì briuneghja i più grandi
successi di e canzone di a lotta. S’ellu ùn ci hè nimu
chì hà massacratu A Palatina o Populu vivu, puderete
mette qualchì pezzaccia chì vi ferma in e vostre
stacche pè alimentà u juke-box di u Corsica. À u
prugramma avete a scelta trà Michel Mallory è e
vechje canzone di L’Albinu. Avà ch’è vo vi site
rimessu l’edee in piazza, pudete cuntinuvà, chì ci
vole à prufittà di a notte.
Site appena stancu, ma ùn avete quantunque micca
da andà à chjinavvi cù e ghjalline nò ? Direzzione
L’Apo à a Marana ! Ah nò hè vera, avete sempre a
lucidità per arricurdavvi ch’ella hè chjosa. Allora ci
hè La Onzième chì hè vicina. Ondecesima chè, ùn a
sapete sempre micca ma ùn ci ferma più ch’è custì
à andà. Ci saria bè A Stella, ma chì strapazzu di
piglià a vittura. Dunque cummandate à u comptoir
qualcosa pè caccià a vostra sete, chì ùn site sempre
saziu. Gira l’ora, è avà puzzate ch’impistate l’odore
di a sigaretta. Ùn avete più voce ch’avete stridatu
cum’è un persu pè favvi sente è site più ch’è zuffu.
Feremu malgradu tuttu un ultimu girettu. Avete
trovu à qualchissia chì hà a vittura è ch’ùn hà micca
betu ? Avete fattu a cunniscenza d’un fraté ch’ùn
hà toccu mancu una goccia di whisky, ma à quale
ferete mette a soia ? Miraculu ! Pigliemu a strada
di E Ville di Petrabugnu è attippemu. Quassù ci hè
l’aria pura, a biera fresca è à st’ora quì ci hè sempre
qualcosa à buscà. U tempu di sbriagà appena è vi
ritruvate à mezu à e vampate di u Pietrabugno Bar,
cunnisciutu per i so gruppi chì ghjocanu tutta a
notte. Ma l’ultima vodka fala male è avà pudete
riparte cù a vostra scimia.
U ghjornu hè vicinu è u celu cummencia à schjarisce.
À mumenti spunterà u sole è site abbambanatu.
Hè ch’ellu hè stancante di fà l’acellu di notte
mirà ! In più di quessa avà hè ghjunta Mamma
Piera, avete a fame ! Hè per quessa chì per compie
a nuttata, vi ferma d’andà à manghjà un buccone
ind’è Babaorum o in qualchì fornu. Saccu viotu ùn
tene arrittu ! Andate à sciaccavvi un pane à a cicculata,
serà dinù l’occasione di fà u debriefing di a
serata cù a vostra squatra di burdata. Ma casa ùn
avete ? Avà tocca à rendesi, face ghjornu è sapete
ch’è vo avete da mette tutta a ghjurnata di dumenica
pè rimettevvi di sta nuttata, cù una pena in capu di
quelle maiò… Eppò ci vole à ripiglià e forze chì
sabbatu chì vene si ricumencia…
I sumeri nuttambuli
