Quattru cantadori di « Barbara furtuna » anu fattu issu viaghju di cummemurazione : Massimu Merlandi (ghitara è seconda), Ghjuvan Petru Marchetti (terza), Andria Dominici (bassa), Ghjuvan Filippu Guissani (contracantu è bassa). Sò elli chì, incù Ceccè Buteau di « Canta u populu corsu », anu cantatu u nostru innu naziunale in Westminster. Anu fattu dinù un cuncertu in la chjesgia taliana Sant Peter’s. E so voci pure anu incantatu à tutti, anzianetti è zitelli, corsi o nò (parechji Inglesi eranu intrati in la chjesa, attirati da iss’ armunie da elli scunisciute).

Tuttu ognunu s’hè avvistu chì « Barbara Furtuna », in li so canti sacri o prufani, hà purtatu l’arte di a pulifunia à u più altu livellu.

Per isse stonde preziose, passate in Londra à stà li à sente, i ringraziemu.