Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 9, Nuvembre di u 2007

A crunichetta di Petru VACHET-NATALI


Balisate !



Sti pochi tempi, in la miò crunichetta di u mese scorsu, (A Nazione Nu.7) aviu mintuatu ch’ellu s’era scupertu balise sottu à e vitture di i naziunali da seguità i so’ traghjetti è cusì, cunnosce tutti i passi è veni di quelli spiati da st’arnesi surnioni. Paria ch’o a sentisse vene !…

Sta dumenica 28 d’ottobre, Corse-Matin, in la so’ rubrica « Politique » titulata : « Quatre balises retrouvées dans les voitures de nationalistes » ne mustràva una è un bellu ritrattu in culore l’esponia davanti à una duzina di militanti di U Rinnovu, di I Naziunali, di Ghjuventù Paolina è d’Andatura.

Sta balisa radio era presentata cù u so’ micro ma dinù…cù a so’ « puce Orange ». Volesi dì chì tutt’ognunu era non solamente seguitatu da u satellite ma dinù…ascultatu !

Oghje chè oghje, ghjornu di a venuta di u Presidente Sarkozy cun tutti i membri di u cunsigliu di i ministri, pensu chì ste manere di fà anu di sicuru un raportu strettu cun st’evenimentu strasordinariu chì , ci vole à dìlla, costa una furtuna à a cullettività.

In l’articulu, si dice dinù ch’omu hà trovu camere numeriche cun dischi duri poste in li camini d’accessu à e case di certi militanti.

Sta volta e balise ùn eranu piazzate sottu à e vitture cum’è di solitu… ma dentru !!

I servizii speziali pulizzeri anu cusì apertu e vitture, viulendu u drittu di a pruprietà privata ! Quessa, sin’ad avà ùn era mai accaduta ! Si dice in più di què’ chì un militante sindicale sia statu anch’ellu « imbalisatu » !

Trattendu di puce, ùn anu micca sceltu una Bouygues ne menu una SFR ma una Orange val’à dì quella di France Télécom a quale in più d’esse a più « patriotta » per via di u so’ nome, hè quella chì capta u megliu postu ch’ella passa in ogni paese di muntagna.

Avà, qualessa serà a prussima tappa ?… l’affare anderà di sicuru criscendu !…

Oltre e puce, sò capace à sparghje cimice, pidochji ed altri Albo Pictus da inoculà u « Chikungungya » à i militanti naziunali ! Ùn vogliu mancu pensà à tutte l’altre pussibilitài ; aprendu e vitture è cusì introduce gasi periculosi tale a cloropicrina, u cianogenu, l’iperita è ghjà chè no’ ci simu elementi radio attivi chì basta cusì !… Ma per avà, ch’ella ùn ci pigli a paranoia ben’ chì, d’entre illegalmente in una vittura pòssa avè cunsequenze imprevisibile gravissime. Quale pò sapè cumu reagisce s’omu vede à qualchissia, di notte, dentru à a so’ vittura ? Quessu pò pigliàssi una baterchjata da sfragellàlli u capu. In Francia chjamanu què : « une bavure ».

I naziunali, - a scrive u giurnale -, pruponenu cun umore chì quelli chì l’anu poste venganu à riguaràlle. Eo, feria assai megliu ; inquatrerebbe sottu à un vetru ste balise da prisentàlle à u publicu pè tutte isse fiere di Corsica, in tutte l’amicale di Francia è di u strangeru per ch’ella servi pè u sempre di lezziòne !!

Oghje, per compie, diceraghju cusì : Prima ch’ellu accadessi qualchi disgrazia per quellu chì serà chjappu dentru à u veiculu d’un particulare, à quessu, avà chì l’affare hè palisatu è per ch’ellu capisca, (i Rinsignamenti generali a sànu postu chì sta crunichetta, l’aghju tradutta in francese nantu à Internet pichjendu : anazione.com). À quessu dunque, chjamatu forse in lu so’ serviziu « le balisier »1 … li si dicerà : à chì scelglierà a balisa…ch’ellu si fàcci prestu…a valisgia !!

1. Le balisier chì rima cun bétisier ma dinù : a balisa cù a valisgia !

Stu 1u di nuvembre 2007 ghjornu di I Santi