Napulione dicia sempre pudè sente i muschi di a machja ancu nanzu di vede e sponde corse.

L'Astratella hè una chjuca intrapresa casana situata in Lumiu dapoi una vintina d'annate, producendu oglii essenziali bio, à parte da flora isulana, chi ùn hè micca sempre endemica à l'isula.

Sò colte isse piante in a prupietà o in a natura issa racolta hè regulata d'una manera stretta (altura di tagliatura, quantità di poti, racolta cù u falgone, cù u putaghjolu, ecc…). Certe piante ponu esse colte tuttu l'annu, secondu s'elle sò distillate e fronde, e radiche o e curtecce, d'altre anu un'epica ben'precisa, per esempiu a murza chì hà di più forza chè l'arnica per guarisce ematome, è chì fiurisce di ghjugnu.

Sò colte a mane, e piante per esse distillate u dopu meziornu, certe piante sò macinate per facilità u passaghju di u vapore, ma a maio' parte sò ammansate in e conche di ramu chì ponu cuntene 350 chilò di piante in suchju, sapendu ch'ellu ci vole una tona di murza per ottene 1,800 chilò d'oglii essenziali. A distillazione hè faciule : u vapore hè assurpatu da a catasta di virdura in e conche, è si carca di u suchju ; rinfriscandusi in u serpentinu diventa suluzione acquosa. Nentru à l'essenzieru, l'ogliu più legeru chè l'acqua, serà coltu da un natellu, è spiccatu da l'idrolatu o acqua florale.

L'Astratella vende oglii stratti di calittu, di ghjineparu, di murza, listincu, pistachjagju, mortula helychrysum italicum, clementinu citrus reticula, larice, pinu marittimu, piumbone, talavellu, finochju, rosumarinu officinalis veberoniferum.

Una rimarca quantunque nantu à u rosumarinu corsu : ùn ci scurdemu chì i cumpunenti d'un erbigliula, (d'una listessa erbigliula) ponu esse spari secondu u sole, l'altitutine, u terrenu, ecc… Avariazione induce cambiamenti chimichi di a pianta è di u so strattu, per esempiu si trova rosumarinu à ogni sponda Mediterrania, ma u rosumarinu corsu ellu, deve a so particularità à un percentuale altu di verbenone (terpena) chì li dà i più piacenti muschi è chì u distingue da tutti l'altri chì nascenu in u cuntinente.

L'Astratella si hè messa in un mercatu di u più bon'raportu : laboratorii di farmacie, di cosmetichi, magazini bio, ecc…, è ancu particulari. L'oglii essenziali sò venduti caru, chì ci vole assai piante per avè poc' ogliu è forte hè a cuncurrenza. Issu marcatu si sparghje sempre di più incù una dumanda sempre di più impurtante per medicina dolce (aromaterapia, fitoterapia, naturaterapia, ecc…), medicina chì tratta è cura u malatu d'una visione glubale, è dinò per a passione di i produtti bio.

Assuciata à Helychrise di a " Vallée de la Roya ", vicinu à Grasse, l'Astratella prupone furmazioni in fito-aromaterapia in stasgi di trè dumenicate.

Ringrazii à Noëlle Irolla, GAEC l'Astratella, Lumiu, Corsica