Accolta
Accolta Cap'articulu Interviste Attualità Cultura Crunichette Sport Lingua


Articulu di u numaru 15, Lugliu di u 2008


“Un passu, un antru, torna un antru, è acquistà ad ogni passu !”

Umagiu à Aimé Césaire



Aimé Césaire hè natu u 26 di ghjunghju 1913 in Basse Pointe, in Martinica. Elevu rimarchevule à u liceu Schoelder di Fort de France, hè bursieru à u liceu Louis le Grand in Parigi. Ghjè custì in issu stabilimentu ch’ellu incontra à Leopold Sédar Senghor divintendu u so prutettu. Hè da tandu ch’ella nasce a so forza di cuscenza di a situazione culuniale. Ci conta :

« Un ghjornu francandu una stretta in Parigi […] Un omu chì passava in vittura : « Eh o nigrachjò ! » Era francese . Tandu li rispondu « U nigrachjolu t’ammerda ! ». U lindumane prupongu à Senghor di scrive inseme cù Damas un ghjurnale : U studiante neru. Leopold : « Eiu ùn metteria què, u chjameria piuttostu I studianti neri . Ai capitu ? Ci hè lampata tal’è un insultu. Eh bè a ricogliu è facciu fronte. » Eccu cum’ella hè nata a « negritutine », in risposta à un scherzu. »

Addimessu à a Scola Nurmale Superiore, principia in u 1936 a redazzione di u so capi d’opera, Cahier d”un retour au pays natal. Agrecatu, volta in Martinica duv’ellu insegna, cum’è a so sposa, à u liceu Schoelder. Fonda in 1941, a rivista Tropiques incù u prugettu di u riacquistu da i martinicani di u so patrimoniu culturale. U guvernu di Vichy mette in ballu un regime ripressivu è piazza sottu à cuntrollu a rivista Tropiques. A guerra rimma dinò cù l’incontru d’André Breton, capimachja di surrealisimu raghjuntu da Césaire . Deputatu cummunistu in u 1946, hè cuscente di u periculu d’allienazione culturale minacciante per i so cuncitatini.

In cor’ di u 1950, fonda a rivista Présence Africaine duv’ellu publicheghja u so Discours sur le colonialisme, una critica velenosa è viulente è un’analisi tremenda di l’ideulugia culunialista aurupeana :

« Una civilisazione chì si mostra incapace di risolve i prublema nati da a so andatura hè una civilisazione da ripa à in ghjò.

Una civilisazione chì sceglie di chjode l’ochji dinanzu à i strapazzi i più impurtanti ghè una civilisazione addebbulita.

Una civilisazione chì si ghjoca di e so regule hè una civilisazione muribbonda. »

« Trà culunizadore è culunizatu, ùn ci hè piazza chè per a faccenda, e minacce, a pressione, a pulizza, l’arrubbecciu, a furzatura, e culture ublicatorie, u disprezzu, a malfidenza, a pritensione, a vanità, a scurtesia, di u fiore di e sucietà diccirbellate, di e folle avvilite […]

Sempre fidu è senza mai nigà i so principii per qualvogliasìa o per cosasìa,u 5 di dicembre 2005, Aimé Césaire, deputatu merre unurariu di Fort de France dichjara :

« Un accettu d’accoglie u minitru di l’internu Nicolas Sarkozy per duie ragioni :

1°ragiò persunali

2°per via chì, essendu autore di u Discours sur le colonialisme, restu fidele à a mo duttrina è anticulunialistu fermu.

E ùn mi puderia ligammi d’anima è di fede à issa lege di u 23 di ferraghju 2005. Vecu in tutta prupaganda fatta da tale ghjurnale martinicanu in quantu à un pussibule incontru Sarkozy-Césaire, una trappula in a quale ùn cascheraghju. »

Aimé Césaire hà publicatu più di quatordeci opere, racoglii di puesie, pezze teatrali è filmi prove.Si spinghje in Fort de France u 17 d’aprile 2008 à l’età di 94 anni. Tutti quant’è no’ simu, salutemu l’omu d’azzione è u babbu di a negritutine.

Ringrazii à tutti quelli chì anu participatu à st’umagiu.

Discours sur le colonialisme (1950) Aimé Césaire, ed.Présence Africaine,1989

Lisabetta Studd, Traduzzione : Antone Filippi