Sti pochi tempi, a D.N…A.T. (chì porta cusì bè
u so’ nome), face assai rimusciu in Corsica
sana, da ch’ella hà principiatu a messa in
carta di tutti i naziunalisti è al dilà. Avà, più nimu à
si pò francà. Se vo’ ricusate di dà u vostru A.D.N.
(l’anglo-sassoni dicenu D.N.A.), un ghjornu o l’altru,
vi assaltanu à cinquanta, à tempu à l’alba, vi
sfracelleghjanu l’usciu plasticandu a serratura chì
spessu, zirla tale una cannunata, da ficcàssi in faccia
innu u muru o a mubilia vicina. Furtuna chì
sin’ad avà nisunu si truvàva daretu ! Pare chì una
volta entruti in un trostu spaventosu di scarpi
grossi, incappucciulati è armati sin’à l’arechje, vi
lampanu tutt’ognunu for’di lettu ; vechji, giovani,
zitellucci, donne pronte à perturìsce ; passu nantu à
i detagli ! À una trà d’elle l’anu ordinatu di spugliàssi
è… ùn mi si pare mancu vera… richjestu i
sottu vestiti i più intimi ! Ch’ellu accadessi affari
simuli in lu nostru paese…mancu pensàlla !! Chì
vergogna ! Sò quessi l’usi ch’elli ci volenu impone
? In Corsica l’anziani, e donne, i zitelli sò sacrati !
È ci volenu dà lezzioni ! Povera Corsica ! Induve
sò i nostri eletti ? sempre pronti à cundannà à smanichittà
è indignàssi per un si o per un nò. Attenti !
un ghjornu o l’altru, tutt’ognunu serà toccu !
Cum’ella hè scritta nantu à u fruntone di u campusantu
di A Penta di Casinca : « Oghje à mè
dumane à tè. »
In casa, vi mettenu tuttu sottu sopra è l’A.D.N.
sapete u racoglienu pigliendu sia e vostre brosse pè
i denti, sia quelle pè i capelli o puru un bichjeru lasciatu
nantu à u tavulinu ! C’incartuleghjanu tutti da
ch’elli sànu chè vo’ sìte naziunalisti o puru sè v’
avete amicizie naziunale. Si per disgrazia vi portanu
à u cummissariatu è ancu in Parigi per 96 ore
d’interrugatoriu, siate attenti d’ùn servevi nè di furcina
nè di cuchjara, ùn lasciate un pezzucciu di «
sandwich », biite solu à cannella è ùn vi sciusciate
in un mandile di carta postu chì l’A.D.N. custì dinù
firmerà !
O zitè fate pianu ! perchè à mumenti, spienduvi,
(di e balise ne aghju parlatu in l’ultimu numeru di
A Nazione) s’anu da impustà è di notte, quand’è
vo’ ghjunghjite d’un caffè o d’una cantina, s’ella vi
vene a voglia di piscià, di quella chì ùn pò aspettà,
ch’ella vi scappa, da urinà vicinu à u vostru parcheghju,
sò capace d’esse piatti daretu à un
buschettu è cù una sciringa tiràssi u liquidu caldu
caldu da racoglie subitu u vostru A.D.N.
Sè vo’ a vi spassighjate un ghjornu nantu a piazza
Santu Niculà’ o piazza di u Diamante sìate attenti
d’ùn spulà u vostru « chewing-gum » perchè certi
ochji chì vi seguitanu – ci n’hè dapertuttu – u si
riguarerànu, sempre caldu caldu, da esse analizatu
quasi sopr’à locu ! Pè i fumatori ùn ne parlemu !
zigari è zigarette, tuttu ghjoverà. S’anu ancu da
requisìsce i vostri capelli indè i pillucheri ! Ùn
v’avisàte dinù di mandà per posta pè scarzu o pè
dispettu - ghjè digià accaduta à Jean-Claude
Rogliano – una carta merdosa à qualchissia perchè
custì mirà’ l’A.D.N. bolle ! A nova spressione di
macagna, avà ghjè: … “Ti puzza l’A.D.N. ?”
Sta crunichetta, pulitica ùn hè, perchè tutte ste cose
trapassanu a pulitichella l’affare hè intrisicatu è
gravissimu, a vi dicu : ci anu propiu da incartà tutti
cum’è à quelli tempi chì ùn sò tantu luntani. Avà ùn
ci hè più bisognu nè di stelle gialle nè di tatuasgi
nantu à e braccie ! Ùn ci n’hè più bisognu chì ci hè
l’A.D.N. Eo, l’A.D.N. u cunnoscu chì ghjè un
pezzu, l’aghju ancu studiatu in le scole estetiche
postu ch’ellu si ne trova innu e crème di bellezza;
ne aghju vindutu assai ma quellu era A.D.N. di vacche
o di boi. Attenti avàle ch’elle ùn sìanu prestu
fàtte…cun l’A.D.N. di i naziunali !…Tandu sì chì
ste crème ferànu prò !
stu 30 di nuvembre 2007
ghjornu di a Sant’Andria.
