L’affare Séguéla hà avutu un mèritu : discità l’opinione pùblica nant’à u periculu di vede u nostru liturale sfracellatu da e case di i ricconi. Puntu negativu : i sguardi si portanu tutti nant’à Bunifaziu, è micca in altrò…
Dapoi chì di u Tribunale Amministrativu di Bastia hà datu a so decisione di lascià custruisce e villà di Séguéla, Sulitzer è Delsol in Cala Longa, pare ch’ella si sia discitata l’opinione pùblica nant’à a quistione di u liturale.>>>

Avete passatu dui ghjorni in Corsica per i primi scontri giovani / circadori urganizati da l’Università di Corsica, u CNRS è a liga corsa di scacchi. Serà a prima volta chì venite in Corsica ?
Sò digià venutu parechje volte. Mi piace assai st’isula per trè ragiò. Prima, vogliu parlà di i so paisaghji tremendi. Sò una ricchezza chì ci vole à difende à tutti i patti. Eppò, mi piace a gastrunumia corsa. A manghjusca mediterranea mi garba assai. Peccatu ch’ella si perda, salvune in certi lochi duve elle si mantenenu e tradizione, cum’è quì. Infine mi piace assai a psiculugia corsa. Ci hè sta leia, st’arradichera à l’identità è attempu, un apertura nant’à u Mediterraniu, nant’à u mondu dinù. Mi campu quandu sò quì !

Avete travagliatu assai nant’à a quistione di a cunniscenza. Qualesse sò e caratteristiche di a sucetà di a cunniscenza ?
Arrigistremu oghje una mansa di nutizie è di cunniscenze. Ma sta situazione vene paradussale. À rombu ch’elle s’accatastessinu e cunniscenze, u mondu si face di menu capiscitoghju chè nanzu. Perchè ? Ci mancanu i mezi d’urganizà ste cunniscenze. Pensanu certi ch’ella hè l’ecunumia chì spiega u mondu, pensanu d’altri ch’ella hè a demugrafia, d’altri e religione, e credenze. D’altri dicenu chì sò e lotte etniche… Di fatti, avemu tuttu attempu, intricciatu, in interazzione unu nant’à l’altru, unu cun l’altru. Di e volte, vene difficiule à capì u perchè cumu d’azzione chì inghjennanu cunsequenze inaspittate. >>>

Dopu à Séguéla, Kouchner, Jean Reno è Clavier, quale serà u prussimu ?
Quale serà u prussimu pippol sarko-rocca serristu à custruisce in Cala Longa ? Vutate !
A sapete bè, ciò ch’ellu ci vole à chjamà avà L’Extrême Sud (ùn face digià più parte di a Corsica...) hè diventatu una riserva di pippol amichi di Sarko è di Camille de Roccaser (hè cusì chì ellu prununzia u so nome, allora rispettemulu !).
Allora postu chì Christian Clavier, Jean Reno, Bernard “frittella” Kouchner è Jacques Séguéla anu mustratu a via, quale serà u prussimu ?>>>

Avete pigliatu a merria di Bunifaziu di marzu, mettendu à palesu una rumpitura cun a vechja municipalità. Oghje, si custruisce sempre in Cala Longa è da fora, pare chì tuttu sia rimessu in quistione. Di manera cuncreta, ch’hà purtatu allora, d’avè vutatu per voi ?
Cunniscìate u cuntenutu di u nostru prugramma eletturale chì avia previstu di mantene a custruttibilità di a zona di Cala Longa, cù una vuluntà forte di vedeci una urbanizazione cuntrullata. Sta vuluntà s’hè materializata u ghjovi 29 di maghju, quandu à u Cunsigliu Municipale avemu lanciatu una mudificazione di u regulamentu di zona per permette di limità l’impatti visuali è nant’à l’ambiu.
Però, a nostra pretensione à incarnà a rumpitura hè sempre forte, perchè chì à u cuntrariu di i nostri predecessori è di i nostri avversarii, ùn previdemu nisuna custruzzione nant’à i siti sensibili di Balistra, Tonnara è Cannetu. Dinù, avemu l’intensione di riesce nant’à u pianu suciale, chì dapoi u 1986 in Bunifaziu nisun allogiu suciale hè statu custruitu. Ci travagliemu. A rumpitura ùn si riassume sola à i cartulari di Cala Longa è di l’urbanisimu, d’astri cartulari impurtanti sò da agguantà.>>>

Mentre chì in Corsica si parla di « désanctuariser » u liturale è di custruisce unepochi di golfs pè turisti ricchi, in Sardegna è in Spagna si cerca à u cuntrariu di prutege ciò ch’ellu ferma di vèrgine.
In Sardegna, u presidente Renato Soru hà pigliatu una misura forte pè prutege u liturale di l’isula surella : e custruzzione nove vicine di u mare sò difese nant’à 1.760 chilòmetri. À cantu, a nostra piccula « banda di i centu metri » face piuttostu pietà. Prugetti di cumplessi tùristichi sò stati suspesi nant’à a Costa Smeralda. A Sardegna vene dinù di creà un organisimu incaricatu di cumprà e piaghje pè prutegelle, nant’à u mudellu di u Cunservatoriu di u Liturale.>>>

U cullettivu Parlemu Corsu hà un annu. À chì ne site ?
« Parlemu Corsu ! » hà un annu, è pudemu fà un prima bilanciu. L’uriginalità di a dimarchja hè chì u cullittivu d’una parti faci dumandi à i puderi pùblichi è d’una antra parti cerca d’agiscia di manera cuncreta à nantu à u tarrenu. L’aspettu rivindicativu hè matirializatu cù a noscia pitizioni : oghji conta dighjà più di 2500 signaturi ! Avemu, a sapeti, un situ internet (www.parlemucorsu.com) è po prisintemu a noscia pitizioni in i diffarenti fieri artigianali di l’ìsula. Par ciò ch’eddi sò l’azzioni cuncreti emu giniralizatu a pràtica di i « stondi ». Stondi ci n’hè statu in Portivechju, Patrimoniu, Ghisunaccia, Sartè è Corscia. Veni à dì ch’è no spassighjemu in a Còrsica sana è pà i mesa ch’affàccani parechji sò privisti. Ci hè dunqua una dumanda è u cuncettu t’hà u successu. Hè ripresu daltrondi in certi loca : Lucu di Nazza, Figari o ancu Bastìa (cù i “caffè in corsu”). À cantu à i stondi emu sviluppatu un antru cuncettu : quiddu di u dibàttitu in lingua corsa cù a missa à dispusizioni di parsoni incaricati di traducia in francesu par l’aienti ch’ùn capìscini micca.
L’emu pruvatu cù succesu davanti à un pùblicu di 200 parsoni à a sinemateca di Portivechju dopu à a prughjizzioni di u filmu di Robin Renucci « Sempre Vivu ! ». L’idea hè di muscià ch’ùn ci voli à intirdìsciasi di parlà corsu è chì di sicuru, participà à u so rinnovu dumanda u sforzu di tuttu inghjunu.>>>